Danieli 7 - Gourmanchéma Bible

¹ Babilona bado Belisasa bali binkpiali nni, Danieli den dua o duanu po ki dangi ki laa li bonlekaala. O den yuandi ki diani ti dangidi yeni ki togidi ti maama fuuli.

² O den yedi: «Ku ñiagu n den laa li bonlekaala n dangidi nni ke yaa faali n ñani ki tinga ñoakunnaadi kuli den figi ki fiindi mi ñincianma.

³ Yanciandi naa den ñani mi ñincianma nni. Oba kuli ki den naani leni o yua.

⁴ Ki yankpiaga den naani leni o yangbanlo ama ki pia i fiabi nani jiebani yeni. Min diidi yaa yogunu bi den ŋabi o fiabi ki teni ke o yaadi ki sedi taana lie nani o nisaalo yeni, ki puni o o nisaalo yantiali.

⁵ Ki yanliega den naani leni yaa fuayanbiadiga n yi ulisi. O den se kaliyendu yaa taana po ki babi kali taa leni o ñina. Bi den yedi ke wan fii ki ŋmani ti nandi boncianla.

⁶ Li yaa puoli n go den nuali ki laa yantoaga ke ki naani leni o namunpieno. O den pia ti bonyugiditi yaa fiabi boninaa o puoli po leni yula naa. Bi den dini o li bali.

⁷ Ku ñiagu yeni n bonlekaala nni, n go den laa ki yannaaga, yaaga yaa noanlima n den pia i jeje hali hali boncianla. Ki pia u fidu hali ke li kandi, ki pia a ñincianma ke a tie kudi. Ki den ŋmani kan cuo yaala ki papadi la ki ŋmaadi kan ki ŋmani yaala. Kaa den naani leni ti yantaadikpiadi. Ki den pia yina piiga.

⁸ Min den diidi a yina yeni yaa yogunu, n den laa ke yintoali, yaali n wa ki cie aya, pudi a siiga ki ŋabi ya n den kpa ye yeni siiga yina taa. Ki yinbiga yeni den pia i nuni nani o nisaalo yeni, ki go pia bu ñoabu ki maadi mi japaamaama.

U Tienu jia ti buudi

⁹ N go den nuali ki laa ke bi sieni li bali kalikaani ke jakpeloba cua ki kali. O tiayiekaadi den pieni paipai. O yudi mo den pieni nani mi kunkunyoma yeni. O bali kalikaanu den yieni nani mi fantanlanma yeni. Li bali kalikaanu n den maa yaa taana po moko den yieni nani u mupienu yeni.

¹⁰ Mi fantama den puubi ki ña o nintuali nani u kpenu yeni. Niba tudatuda den tuuni opo, tudatuda bam den se o kani. Bi bujiaba den kakali ke a tila poabidi.

¹¹ N go den diidi kelima ki yinbiga yeni n den maadi yaa japaamaama po. Min den diidi yaa yogunu, bi den ku ki yannaaga yeni. Bi den luni ki gbanandi mi fantama nni ki buoni ti.

¹² Bi den ga yaa yandi n sieni yaa bali, ama bi den cedi ke bi suagi ki ye ki fo ki pundi hali yogunuba.

¹³ N go den laa ku ñiagu bonlekaala yeni niinni ke yua n naani leni o nisaalo ye ti tawadi po ki kpendi ki tiegi o jakpelo yeni ke bi ciani o ke o pundi o kani.

¹⁴ O den dini o nisaalo yeni li bali ki puni o ti kpiagidi leni mi diema ke i nibuoli kuli leni mi diema yaaba kuli leni i mabuoli yaaba kuli n tuo ki yaa ŋua o. O bali baa yaa ye hali yaa yogunu kuli, li kan gbeni, o diema mo kan bodi abada.

Danieli baa o bonlekakpiala bundima

¹⁵ Mini Danieli yama den yagi boncianla. Min den laa yaa bonlekaala den pia npo i jeje boncianla.

¹⁶ N den nagini yaaba n se yeni siiga yendo kani ki mia ke wan bundi npo ki waani nni li bonla yeni kuli n tie yaala moamoani. O den waani nni ki bundi npo la ki yedi:

¹⁷ ‹Ti yangbenginaaditi ne tie diema naa yaama n baa ti fii ki tinga nni.

¹⁸ Ama Tanpojoma Tienu nigagidiŋanba baa ti yuandi ki ga mi diema ki yaa die ma hali yaa yogunu kuli.›

¹⁹ Li yaa puoli n den bua ki bandi cain ki yannaaga bundima moamoani. Kaa den taa leni ki lieba. Ki noanlima den pia i jeje boncianla. Ki den pia yaa ñina n tie kudi leni yaa taajenñadi, n tie kudi. Ki den ŋmani kan cuo yaala ki papadi la, ki ŋmaadi kan ki ŋmani yaala.

²⁰ N go den bua ki bandi ki yannaaga yeni n den pia yaa yinpiiga ki yuli po leni yaa yintoali n go den pudi ki ŋabi yina taa yeni maama fuuli. Laa yinli n den pia i nuni ki go pia yaa ñoabu n maadi mi japaamaama, ki yabidi ki cie li yinliela yeni. N go den bua ki bandi li yaa maama fuule.

²¹ Min den diidi yaa yogunu, li yinli yeni den tuogi leni U Tienu nigagidiŋanba bu toabu ki paadi ba

²² hali ke o jakpelo den cua ki jia ti buudi ki puni wani Tanpojoma Tienu nigagidiŋanba i moamoani. U yogunu n den pundi, bi nigagidiŋanba den baa li bali.

²³ Min den buali yua yeni den yedi nni: ‹Ki yannaaga yeni tie mi dienaama, yaama n baa je ŋanduna diema kuli, ki papadi ki yaa ŋmani ma.

²⁴ Yina piiga yeni tie badiba piiga yaaba n baa ŋoaŋoadi biyaba mi diema yeni niinni. Li yaa puoli baditoa baa fii. O kan yaa taa leni yaaba n den kpa fii yeni, o baa jiini badiba taa.

²⁵ O baa maadi ki sugi Tanpojoma Tienu, ki yaa mabindi o nigagidiŋanba. O go baa jagi ke o baa lebidi wani U Tienu niba jaanma yogini leni bi *balimaama, ki teni U Tienu nigagidiŋanba yeni o nuu nni hali lan pundi bina taa leni boagidima.

²⁶ Lani yaa puoli li bujiali baa tieni ban ga ki yannaaga yeni bali kuli ki bolini ga yaa yogunu kuli po.

²⁷ Bi baa teni U Tienu niba, wani Tanpojoma Tienu nigagidiŋanba yeni yaa diema n ye ŋanduna nni kuli bali leni mi kpiagidi, ban yaa die. Bi diema baa yaa ye hali yaa yogunu kuli. Ŋanduna bali danba kuli baa tuo bi maama ki yaa tuuni bipo.›

²⁸ Li maama gbenma n yeni. Mini Danieli yama den yagi, i jeje den cuo nni ke n tugusoama sani ke n nunga gbidi. N den kubi mi maama yeni n pali nni.