Danieli 6 - Gourmanchéma Bible

¹ Medi yua Daliyusa den ga li bali ki pia piiluoba n bina lie.

Danieli yudanlieba bua ki janbi o

² Daliyusa den sua ke li ŋani wan gandi niba kobiga n piilie ki dini ba li bali ban yaa tie gufeneelinba yaaba n baa kakali mi diema nni kuli ki yaa die ki gobidi.

³ O go den gandi yudancianba taa, gufeneelinba yeni n baa yaa wangi yaaba mi diema maama kuli n cuoni maama ke o bado *ŋantaado oba kuli n da poadi. Danieli den tie laa yudanciantaadiba siiga yendo.

⁴ Danieli den cie o yudanlieba leni gufeneelinba yeni kuli kelima o den pia o niinni yaa yantiali n ŋani ki cie bikuli. Lani o bado den jagi ke o baa dini Danieli li bali wan todi o ki yaa die mi diema kuli.

⁵ Lani Danieli yudancianlieba leni gufeneelinba den lingi ban baa kuli o leni yaala mi diema ŋantaadi nni. Ama baa den baa kuli ban baa kuli o leni yaala kelima o den tie nimoano. Baa den laa o kani tudimaba kuli.

⁶ Lanwani bi jaba yeni den yedi: «Ti kan le tin baa kuli Danieli leni yaala li yaa tie o Tienu *bali maama nni yaaka.»

⁷ Lani yaa puoli bi yudancianliediba leni gufeneelinba yeni den jaligi ki gedi o bado kani ki yedi o: «O bado Daliyusa, ŋan yaa ye hali yaa yogunu kuli.

⁸ Tinba mi diema yudancianba leni gufeneelinba leni bi cancantieba leni a koanbala kuli taani yanyenma ki sua ke li ŋani ŋan ñani li ñoabonli ki teni ban kpaani ki yedi ke dana piitaa bianu oba kuli n da jaandi ki kpiagi buloba bi nisaaloba kuli kaa tie fini o bado. Yua n yie laa ñoabonli kuli, ban lu o i yangbanli buogu nni.

⁹ To, o bado, ŋan ñani laa ñoabonli ki tieni a maalima ke li kan lebidi, nani Medi yaaba leni Pelisa yaaba balimaama n kan lebidi maama.»

¹⁰ Lanwani o bado Daliyusa den ñani li ñoabonli yeni ki tieni o maalima.

Bi luni Danieli i yangbanli buogu nni

¹¹ Danieli n den bandi ke laa ñoabonli diani, o den kuni o denpo. O tanpodieli diebona den tiegi Jelusalema. O den luodi a. Li tanpodieli yen niinni Danieli den gbaandi ki jaandi ki miadi U Tienu taalima taa daali kuli nani wan den maani ki tiendi maama.

¹² Lani o yibalinba yeni den jaligi ki kua o dieli nni ki sua ke o gba ki jaandi ki miadi o Tienu.

¹³ Lanwani bi den gedi o bado kani ki maadi leni o li ñoabonli yeni maama ki yedi o: «Ŋaa den bili ke yua n jaandi ki kpiagi buloba yaaka nisaaloba kaa tie fini o bado, bi baa lu o i yangbanli buogu nni te?» O bado den goa ki yedi: «Yeni de, li bili ki kan lebidi mo nani Medi yaaba leni Pelisa yaaba balimaama n kan lebidi maama.»

¹⁴ Lanwani bi den yedi o bado: «Danieli, ban den cuo Juda yaaba siiga yua, waa nua fini o bado ke a tie pu, waa fangi ŋan bili yaa ñoabonli. O jaandi o Tienu taalima taa daali kuli.»

¹⁵ O bado n den gbadi mi maama yeni, o pali den biidi boncianla. O den cuo o yama nni ke o baa faabi Danieli. O den moandi wan fidi maama kuli hali li yenjoabaanli ki bua ki ga o.

¹⁶ Ama bi jaba yeni den jaligi ki guani o bado kani ki yedi o: «O bado, ŋan tiadi ke Medi yaaba leni Pelisa yaaba balimaama bili ke o bado n ñani yaa ñoabonli bi yaa mabilikaama kan lebidi.»

¹⁷ Lani o bado den teni ke bi cuani Danieli ki luni o i yangbanli buogu nni. O bado den yedi Danieli: «A Tienu, ŋan ŋua yua yaa yogunu kuli n ga ŋa!»

¹⁸ Bi den cuani li tanli ki biini ku buogu ñoabu. O bado den taa o ñoagima yaama n pia o maalima, ki go taa o paatieba yaa ñoagima yaama n pia bi maalima ki ñii ki tabini ke liba kuli n da lebidi Danieli po.

¹⁹ Lani, o bado den goa ki kua o diegu nni. O den dua waa dini, mi guama den yie o, waa den tuo ki tieni liba kuli ki mangi o pali mo.

Danieli ñani i yangbanli buogu nni

²⁰ Lan den fii ki faa, o bado den jaligi ki gedi i yangbanli buogu po hali ke li daa yendi.

²¹ Wan den nagidi ku buogu, o den tiani leni li paboanli ki yini Danieli ki yedi: «Danieli, U Tienu yua n fo naacemo, wani a Tienu, ŋan ŋua yua yogunu kuli fidi ki ga ŋa i yangbanli kani bi?»

²² Danieli den goa ki yedi: «O bado, ŋan yaa ye hali yaa yogunu kuli.

²³ N Tienu soani o maleki ke o mubini i yangbanli ñoana. Baa tieni nni bonbiadiliba kuli kelima o sua ke mii pia opo tagiliba kuli. Mii tudi fini o bado mo yaa po.»

²⁴ Lani o bado pali den mangi boncianla ke o teni ke bi ñani Danieli ku buogu nni. Ban den ñani o, baa den laa opo poagilimaba kuli kelima o den dugi U Tienu po.

²⁵ O bado den teni ke bi cuani yaa jaba n den kuli Danieli yeni, ki luni ba i yangbanli buogu nni, bani leni bi puoba leni bi bila. I yangbanli den cuo ba ki mumudi bi kpaba kuli hali ke bi daa pundi ku buogu tinga.

²⁶ Lani yaa puoli o bado Daliyusa den soani i nibuoli kuli, leni mi diema kuli yaaba leni i mabuoli kuli, yaaba n ye ŋanduna nni kuli po ki yedi ba: «Mi yanduanma n yaa pugidi yipo.

²⁷ N bili ke yinba yaaba n ye n diema nni kuli n fangi Danieli Tienu bonŋanla, Kelima wani n tie U Tienu yua n fo, O baa yaa ye hali yaa yogunu kuli. O bali kan gbeni hali abada, O baa yaa die hali yaa yogunu kuli.

²⁸ Wani n ciadi ki faabidi, Ki tieni sinankeeninba leni mi bancianma, Tanpoli leni ki tinga nni kuli. Wani n ga Danieli i yangbanli kani.»

²⁹ Danieli bali den pugini o bado Daliyusa bali jama nni leni o bado Silusa yua n den tie Pelisa diema yua yaa bali jama nni kuli.