Danieli 5 - Gourmanchéma Bible

¹ Dayenli o bado Belisasa den tieni mi jaanjecianma ki yini o paatieba ke bi pundi niba tudili. O den taani ki ñuni mi daama leni ba.

² Wan den ñuni mi daama yeni, o den yedi ke ban cuani o kani o baa Nebukanesa n den fie yaa wula tadiñokaamu leni yaa ŋanjilifa tadiñokaamu Jelusalema jaandieli nni ke wani o bado leni o paatieba, leni o puoba leni o poconcona n ño mu niinni.

³ Lani bi den taa mu wula tadimu, ban den fie yaamu U Tienu diegu yaagu n ye Jelusalema nni, ki cuani mu ke o bado leni o paatieba leni o puoba leni o poconcona ñuni mu niinni.

⁴ Bi den ñuni duven ki pagi bi *buli yi n tie wula leni yi n tie ŋanjilifa leni yi n tie kumoandi leni yi n tie kuboandi leni yi n tie daadi leni yi n tie tana kuli.

⁵ Laa yogunu u nisaalinuu den leti ki diani o bado dieli bilinu po, ban den boali yu leni li muanli. U nuu yeni den diani ki kuu u fidisantuankaanu. O bado den laa u nuu yeni ke u dangi.

⁶ Lani o nunga den gbidi, o yama mo den yagi, o gbanu den wudi, o duna mo den pua aya.

⁷ Wani o bado den tiani ki yedi ke ban yini Babilona ñoagidanba: bi baabuuba leni bi buligbandanba leni a lingida ban cua o kani. Lani o bado den yedi Babilona ñoagidanba yeni: «Yua n fidi ki cogi yaa diani n tie ne ki bundi npo kuli, n baa teni ban lani o ti badijatiamoandi leni u wula laanu. O baa tua o nitaalo mi diema bali danba siiga.»

⁸ O bado ñoagidanba kuli den nagini, ama baa den fidi ki cogi i diani yeni ki bundi opo.

⁹ Lani yaa po o bado Belisasa yama den yagi ke o nunga mo gbidi ki pugini. O paatieba moko den jie ki duodi.

¹⁰ O bado naa den gbadi o bado leni o paatieba fuugu ki kua ban den taani mi jaanjiema po yaa dieli nni ki yedi: «O bado, ŋan yaa ye hali yaa yogunu kuli. A yama n da yagi, a tugusoama mo n da sani.

¹¹ O ja ye a diema nni ke U Tienu Yua n Gagidi ki ŋani banma ye o niinni. A baa n den ye yaa yogunu, bi den laa o niinni mi yanyendima leni u fanu leni yaa yanfuoma n tie U Tienu Yua n Gagidi ki ŋani yaama. Lani yaa po yo ke a baa o bado Nebukanesa den tuni o a lingida leni bi baabuuba leni bi buligbandanba leni bi ñoagidanba kuli yuli,

¹² kelima bi den laa ke wani Danieli, o bado n den lebidi yua yaa yeli ki yini o Belisasa, pia yaa yantiali n ŋani ki cie, leni mi bandima leni mi yanfuoma, ki fidi ki bundi ti dangidi leni mi kpanjañuanma, ki go fidi ki galiti yaala n gali. Lani yaa po ŋan teni ban yini wani Danieli, o baa bundi apo laa diani n yedi yaala.»

Danieli bundi o bado po i diani yeni n yedi yaala

¹³ Bi den cuani Danieli o bado kani. O bado den buali o: «Fini n tie Danieli, ban cuo yaaba siiga, n baa o bado n den ñani yaaba Juda diema nni ki cuani ne yeni?

¹⁴ N gbadi ke bi maadi a maama ki tua ke U Tienu Yua n Gagidi ki ŋani banma ye a niinni, ke a pia mi yanyendima leni u fanu leni yaa yanfuoma n yaba.

¹⁵ Bi cuani n kani bi ñoagidanba leni bi baabuuba ke ban cogi npo yaa diani n tie ne ki bundi npo, ama baa fidi ki bundi npo.

¹⁶ N gbadi ke fini wani baa fidi ki bundi yaa maama n ñoa, ki galiti yaala n gali. To, a yaa fidi ki cogi i diani ne ki bundi npo, bi baa lani a ti badijatiamoandi leni wula laanu. A baa tua o nitaalo mi diema bali danba siiga.»

¹⁷ Danieli den yedi o: «A kubi a paabu, bi ŋan pa nitoa. Ama baa yeni, n baa cogi i diani ne ki go bundi apo.

¹⁸ O bado, Tanpojoma Tienu den dini a baa Nebukanesa li bali ke o tua badiciamo ki go puni o ti kpiagidi leni ti jigidi ki ñani o yeli.

¹⁹ Kelima wani U Tienu n den ñani o yeli maama po, i nibuoli kuli leni diema kuli yaaba leni i mabuoli kuli den jie o ki digibi o nintuali. O den kpaani wan bua ki kpa yaaba, ki ŋaani wan bua ki ŋa yaaba. O den duondi wan bua yaaba, ki jiindi wan bua ki jiini yaaba.

²⁰ Ama wan den fiini o yuli ki juagi o pali ki cuoni leni ti japaadi yaa yogunu, bi den ga o bali, ki fie o kpiagidi.

²¹ Bi den deli ki ñani o bi nisaaliba siiga. O yama den lebidi ki tua nani ti yandi yaama yeni. O den taa ki ye leni i fuaŋunbi. Bi den tendi o ti muadi ke o ŋmani nani i ne yeni, ke ku mangu soangidi o, hali wan den ban bandi ke Tanpojoma Tienu n die bi nisaaliba diema kuli, ki tendi wan bua yua li bali.

²² Ama fini Belisasa o bijua mo, ŋaa miini a yuli baa ke a bandi laa bonla kuli.

²³ A fiini a yuli ki koani leni Tanpoli Diedo ki teni ke bi cuani a kani yaa tadiñoakaamu n den ye o diegu nni ke yi ñuni mi daama mu niinni, fini leni a paatieba leni a puoba leni a poconcona. A pagi i buli yaala n tie ŋanjilifa, yaa ka wula, yaa ka ti kumoandi, yaa ka ti kuboandi, yaa ka ti daadi, yaa ka a tana, yaala n kaa gba, kaa bani liba mo. Ŋaa kpiagi U Tienu yua n kubi a miali leni a cabili kuli o nuu nni.

²⁴ Lani n teni ke o soani u nuu ke u diani i diani ne.

²⁵ Yaala n diani tie line: MENE, MENE, TEKEL leni PADISINI.

²⁶ Mi bundima nne: MENE bua ki yedi ke bi coadi. U Tienu coadi a bali dana ki gbeni a.

²⁷ TEKEL bua ki yedi ke bi biigi. U Tienu biigi a leni li *bonbiigikaala ki sua ke a poadi.

²⁸ PADISINI bua ki yedi ke bi boagidi. U Tienu boagidi a diema ki teni Medi yaaba leni Pelisa yaaba.»

²⁹ Lanyogunu Belisasa den teni ke bi lani Danieli ti badijatiamoandi leni wula laanu ki kpaani ki puni o o nitaalo kaanu mi diema bali danba siiga.

³⁰ Laa ñiagu liga bi den ku Babilona diema bado Belisasa.