Danieli 4 - Gourmanchéma Bible

¹ Mini o bado Nebukanesa den ye n diegu nni, n den ye likani leni mi yemanma.

² N den dua n duanu po ki dangi yaa dangidi n yagi n yama. Min den dangi ki laa yaa bonlekaala den pia i jeje boncianla.

³ N den teni ke bi yini Babilona ñoagidanba kuli ke ban cua n kani ki bundi npo ti dangidi yeni.

⁴ A lingida leni bi baabuuba leni bi buligbandanba leni bi ñoagidanba kuli den cua. N den waani ba ti dangidi yeni ama baa den fidi ki bundi npo.

⁵ Danieli den yuandi ki cua, wani ban den lebidi yua yaa yeli ki yini o Belisasa, n *bulo n yi maama. U Tienu Yua n Gagidi ki ŋani yaa banma ye wani Danieli niinni. N den waani o ti dangidi yeni ki yedi o:

⁶ ‹Belisasa, a lingida yudaano, n bani ke U Tienu Yua n Gagidi ki ŋani banma ye a niinni, bondoaginkaalaba ki paki a. Bundi npo min den laa yaa bonlekaala n dangidi nni.

⁷ N den dua n duanu po ki dangi ki la yaa bonlekaala n tie ne: N den laa ke yaa tibu n kpedi boncianla se ŋanduna kuli siiga.

⁸ Bu tibu yeni den kpedi ki yabidi ki pa. Bu joma den pundi hali tanpoli. Yua n den ye baa u tinbianu den baa yaa nua bu.

⁹ Bu faadi den ŋani. Bu bonluonkaala mo den yaba ki dagidi, Ke yaala n fo kuli den baadi li bonjekaala bu kani. Ti fuayandi den ye bu soangu nni Ti bonyugiditi mo den tiendi bi tiana bu beni nni, Yaala n fo kuli den baadi li jiema bu kani.

¹⁰ Min den dua n duanu po ki dangi yaa yogunu, N den sua ke malekinba siiga yendo ñani tanpoli ki jiidi.

¹¹ O den paagi oba ki kpaani ki yedi: Pedi mani bu tibu ne ki cuadicuadi bu beni. Ki suodi bu faadi ki yadi bu bonluonkaala Ti yandi n sani ki ña bu soangu nni, Ti bonyugiditi mo n ña bu beni nni.

¹² Yin ŋa mani li ñiali leni i jiini, Ki loli li ti kumoandi leni ti kudi kuseseli. Lin yaa se li fuali moasoangidi siiga. Ku mangu n yaa soangidi li, Lin yaa ŋmani ti muadi nani ti yandi yeni.

¹³ O nisaali-yantiali n lebidi ki tua yanga yaa yantiali Wan yaa tie yeni hali bina lele n pendi.

¹⁴ Malekinba n cuani mi maama yeni. Yeni de, bani n caa li ñoabonli yeni, ke yaaba n fo kuli n bandi ke Tanpojoma Tienu n die bi nisaaliba diema ki dindi wan bua yua li bali, ki fiindi lienni yua n tie taliga ki cie o lieba.

¹⁵ Mini o bado Nebukanesa n den dangi yaa dangidi n yeni. Belisasa, ŋan bundi ti npo kelima yaa ñoagidanba n ye n diema nni kuli ki fidi ki bundi ti npo. Ama fini, a baa fidi kelima U Tienu Yua n Gagidi ki ŋani yaa banma ye a niinni.› »

Danieli bundi o bado Nebukanesa po o dangidi

¹⁶ Lani Danieli, ban go den yi yua Belisasa, gbanu den wudi u yogunu waamu. O yama mo den yagi. Lani o bado den yedi o: «Belisasa, ti dangidi ne leni ti bundima n da yagi a yama.» Belisasa den goa ki yedi o: «N daano, ti dagidi ne n yaa tie a yibalinba po, ti bundima n yaa tie a nando po.

¹⁷ A den laa yaa tibu n yaba ki pa ke bu joma pundi hali tanpoli, ke baa yua n den ye u tinbianu baa yaa nua bu.

¹⁸ Bu faadi den ŋani, bu bonluonkaala den yaba ki dagidi ke yaala n fo kuli baadi li bonjekaala bu kani. Ti fuayandi den ye bu tinga, ti bonyugiditi mo den tiendi bi tiana bu beni nni.

¹⁹ Bu tibu yeni tie fini o bado yo. A yeli kpedi, a paalu yabidi, a bali kpiagidi yabidi ki pundi hali tanpoli, a diema mo yabidi ke a diedi hali ŋanduna bianu kuli.

²⁰ A go den laa ke malekinba siiga yendo ñani tanpoli ki jiidi ki yedi: ‹Pedi mani bu tibu ne ki bolini bu. Ama yin ŋa mani li ñiali leni i jiini, ki loli li ti kumoandi leni i kuseseli lin yaa se li fuali moasoangidi siiga ku mangu n yaa soangidi li, ti moasoangidi n tua lini leni ti yandi biinu hali bina lele n pendi.›

²¹ O bado, ti bundima n tie ne, Tanpojoma Tienu bili ke lini n baa cua fini n diedo po:

²² Bi baa deli ki ñani a bi nisaaliba siiga. A baa yaa taa ki ye leni ti fuayandi, bi baa yaa tendi a ti muadi ke a ŋmani nani i ne yeni, ku mangu baa yaa soangidi a. Li baa yaa tie apo yeni hali bina lele n pendi, hali ŋan baa bandi ke Tanpojoma Tienu n die bi nisaaliba diema kuli, ki dini wan bua yua li bali.

²³ Lan den bili ke ban ŋa li ñiali leni i jiini yeni bua ki yedi ke a yaa ti bandi ke Tanpojoma Tienu n die li bali, a go baa diedi a diema.

²⁴ Lani yaa po o bado, tuo ki ga n tundi ne: cedi a *tuonbiadi ki yaa tiendi yaala n tiegi. Cedi a biadima ki yaa gba fala danba po mi niñima, daalinba yeni a baa yaa baa ye.»

Ti dangidi n yedi yedi yaala yeni tieni

²⁵ Li bonla yeni kuli den tieni o bado Nebukanesa.

²⁶ Piiga n ŋmaali lie n den pendi, o den ye ku badidiegu doangu yuli po Babilona niinni ki goadi.

²⁷ O den yedi: «Mini ka maa Babilona dogu ne ke u tua badidogu te? U doagidi n paalu n yaba maama leni n bali n pia yaa kpiagidi.»

²⁸ Hali ke o bado daa maadi ki gbeni, u nialu den ñani tanpoli po ki yedi: «O bado Nebukanesa, cengi yaa maama n tie ne: Bi ga a bali.

²⁹ Bi baa deli ki ñani a bi nisaaliba siiga, a baa yaa taa ki ye leni ti fuayandi. Bi baa yaa tendi a ti muadi ke a ŋmani nani i ne yeni. Li baa yaa tie apo yeni hali bina lele n pendi, hali ŋan baa bandi ke Tanpojoma Tienu n die bi nisaaliba diema kuli, ki tendi wan bua yua li bali.»

³⁰ Lanyogunu liga li bonla yeni den tieni Nebukanesa. Bi den deli ki ñani o bi nisaaliba siiga. O den ŋmani ti muadi nani i ne yeni. Ku mangu den soangidi o gbanandi. O yudi den yabidi nani jiebani kobidi yeni, o niñadi mo den noadi ki foagidi nani ti bonyugiditi taajenñadi yeni.

Bi goa ki teni Nebukanesa o bali

³¹ Nebukanesa den yedi: «Yaa yogunu n den bili npo n den pendi, mini Nebukanesa den yaadi n yuli ki diidi tanpoli, ke n yama guani. N den jaandi Tanpojoma Tienu, ki go pagi ki kpiagi wani yua n ye hali yaa yogunu kuli, wani yua yaa diema n ki pia bianu ke o bali mo ye nifiima n tu nifiima.

³² Ki tinga kuli niba buli ki tie opo pu. O tiendi tanpoli yaaba leni ŋanduna yaaba kuli wan bua yaala. Oba kuli ki ye yua n baa fidi ki yie opo ke o kan tieni wan bua yaala, yaaka ki buali o: ‹A tiendi be nne?›

³³ Laa yogunu n yama den guani. Bi den goa ki teni nni n bali kpiagidi leni n bali jilima moko. N koanbala leni n paatieba go den cua ki taa nni. Bi den goa ki teni nni n bali, n paalu mo den pugini ki cie kpiama.

³⁴ Moala mini Nebukanesa, n pagi ki go kpiagi Tanpojoma Tienu ki jigini o yeli. O tuona kuli tiegi moamoani, o bontienkaala kuli dagidi. O fidi ki jiidi yaaba n cuoni leni ti japaadi.»