Danieli 3 - Gourmanchéma Bible

¹ O bado Nebukanesa den teni ke bi tieni li wula nisaali-nannanli. Li kpedima den tie nukpanduna piiluoba, li pianu mo nukpanduna luoba. O den teni ke bi sieni li Dula tialu nni ki ye Babilona balinma niinni.

² Lani o bado Nebukanesa den soani ban ban yini gufeneelinba, bi cancantieba, a koanbala, mi diema ligikubida, bi bujiaba, bi saliyajiaba, bi badijaba leni bi paatieba kuli. O den soani ban ban yini ba ke ban cua ki jaani yaa jaanma n baa gagidi o bado Nebukanesa n den teni ke bi sieni yaa nisaali-nannanli yeni.

³ Lanwani bi yudanba yeni kuli den cua ki baa taani ki jaani yaa jaanma n baa kpiagi o bado n den teni ke bi sieni yaa nisaali-nannanli yeni. Bi den sedi li nannanli yeni nintuali.

⁴ O kpakpaanlo den kpaani ki yedi: «Yinba i nibuoli kuli niba leni diema kuli niba leni i mabuoli kuli niba, bi bili yipo yaa ñoabonli n tie na:

⁵ Yi yaa gbadi a naatuntuna, mu yelimu, ti kogiditi, mu sielimu, a kogididajena, ti tankpelundi leni yaa baantiadi n sieni kuli fuugu yaa yogunu, yin labini mani ki kpiagi o bado n teni ke bi sieni yaa wula nisaali-nannanli yeni.

⁶ Yua n ki labini ki kpiagi li kuli bi baa cuo o lanyogunu liga ki lu o yaa buaga n yigidi ki tuoni niinni.»

⁷ Lanwani i nibuoli kuli niba leni diema kuli niba leni i mabuoli niba n den gbadi a naatuntuna, mu yelimu, ti kogiditi, mu sielimu, a kogididajena leni yaa baantiadi n sieni kuli fuugu, bikuli den labini ki kpiagi o bado Nebukanesa n den sieni yaa wula nisaali-nannanli yeni.

Danieli lieba yie ke bi kan kpiagi li nisaali-nannanli

⁸ Laa yogunu Kalide diema yaaba siiga bi tianba den nagini ki kuli Jufinba o bado kani.

⁹ Bi den yedi o: «O bado, ŋan yaa ye hali yaa yogunu kuli.

¹⁰ A den ñani li ñoabonli ki yedi ke yua n gbadi a naatuntuna leni mu yelimu, leni ti kogiditi, leni mu sielimu leni a kogididajena leni yaa baantiadi n sieni kuli fuugu, wan labini ki kpiagi li wula nisaali-nannanli ne.

¹¹ Yua n ki labini ki kpiagi li kuli mo, bi baa lu o yaa buaga n yigidi ki tuoni boncianla niinni.

¹² To, o bado, Sadilaki, Mesaki leni Abedi-Nego, ŋan den dini yaa Jufinba ke bi tua Babilona tinkundogi koanbala yudanba yeni naa tuo a ñoabonli. Baa ŋua a *buli, baa kpiagi ŋan sieni yaa wula nisaali-nannanli mo.»

¹³ Lani Nebukanesa pali den fii ki beni hali boncianla ke o yedi ke ban cuani Sadilaki, Mesaki leni Abedi-Nego o kani. Bi den cuani ba o nintuali.

¹⁴ Wani Nebukanesa den yedi ba: «Sadilaki, Mesaki leni Abedi-Nego, naani li tie moamoane ke yii ŋua n buli, kaa kpiagi min teni ke bi sieni yaa wula nisaali-nannanli yeni mo?

¹⁵ Moala yin bogini mani, yi yaa go gbadi a naatuntuna, mu yelimu, ti kogiditi, mu sielimu, a kogididajena leni yaa baantiadi n sieni kuli fuugu, lanyogunu liga yin labini ki kpiagi min teni ke bi tieni yaa nisaali-nannanli yeni. Yi yaa pugi li, lanyogunu-lanyogunu bi baa lu yi yaa buaga n yigidi ki tuoni niinni. O laa bulo n baa fidi ki faabi yi n nuu nni?»

¹⁶ Sadilaki, Mesaki leni Abedi-Nego den goa ki yedi o bado: «Ti kan moandi ke ti baa maadi ki ga ti yula.

¹⁷ Ti Tienu, tin ŋua yua baa fidi ki faabi ti. O baa ñani ti yaa buaga n yigidi ki tuoni niinni ki go ga ti fini o bado nuu nni.

¹⁸ Ama baa o yaa bua ki faabi ti, ŋan bandi ke ti kan ŋoadi a buli, ti kan kpiagi ŋan teni ke bi sieni yaa wula nisaali-nannanli yeni mo.»

¹⁹ Lani yaa po Nebukanesa pali den beni ke li kandi ke o nunga lebidi ki biagi Sadilaki, Mesaki leni Abedi-Nego po. O den teni ke bi tongi ki buaga ke li cie ban den yen tongidi ga maama taalima lele.

²⁰ Lanwani o den puogi o toatieba siiga yaaba n pia u fidu ki cie ke ban loli Sadilaki, Mesaki leni Abedi-Nego ki lu ba yaa buaga n yigidi ki tuoni yeni niinni.

²¹ Bi den loli bi jaba yeni leni bi kpataana, ki luni ba yaa buaga n yigidi ki tuoni yeni niinni.

²² Kelima o bado ñoabonli n den pa maama, leni ki buaga n den yigidi ki tuoni ke li kandi maama, mi fantanlanma den ku yaa jaba n den luni Sadilaki, Mesaki leni Abedi-Nego yeni.

²³ Bi jataadiba yeni, Sadilaki, Mesaki leni Abedi-Nego den baa yaa buaga n yigidi ki tuoni yeni niinni ki luo.

U Tienu faabi Danieli danlitaadiba ki buaga nni

²⁴ Laa yogunu ti jawaandi den cuo o bado Nebukanesa ke o fii tontoni. O den yedi o koanbala: «Tii bi loli jaba taa ka ki luni mi fantama nni?» Bi den goa ki yedi o: «Ti daano, yeni de!»

²⁵ O den goa ki yedi: «N nan nua niba naa yo ke baa luo mo. Bi cuoni mi fantama nni ke pu kuli ki pia ba. O ninaalo bugima tie nani tienu yeni.»

²⁶ Lanwani Nebukanesa den nagini yaa buaga n yigidi yeni buliñoabu kani ki kpaani ki yedi: «Sadilaki, Mesaki, leni Abedi-Nego! Yinba Tanpojoma Tienu naacenba, ña mani ki cua ne.» Sadilaki, Mesaki leni Abedi-Nego den ñani mi fantama nni.

²⁷ Gufeneelinba, bi cancantieba leni a koanbala den taani ki diidi ki laa ke mi fantama ki fidi ki tieni bi jaba yeni gbanandi pu, bi yudi ki den sia, bi tiayiekaadi moko ki den biidi, baa den nuu fantama mo.

²⁸ Nebukanesa den yedi: «Sadilaki, Mesaki leni Abedi-Nego Tienu n baa ti kpiagidi, wani yua n soani o maleki ki faabi bani o naacenba yaaba n dugi opo ki yie mini o bado yaa ñoabonli. Bi luni bi miana kaa tuo ki kpiagi bontoala kuli se bi Tienu bebe.

²⁹ Lani yaa po, n bili yaa ñoabonli n tie na: yua n maadi yaala n bia Sadilaki, Mesaki leni Abedi-Nego Tienu po kuli, wan tie yaa mabuolu yua kuli bi baa pedi ki jendijendi o, ki mumudi o diegu mo kun tua diegbengu, kelima tientoa kuli ki ye yua n baa fidi ki faabi o niba nande.»

³⁰ Li yaa puoli o bado den pugini Sadilaki, Mesaki leni Abedi-Nego bala.

O bado Nebukanesa dangiliedi

³¹ O bado Nebukanesa den soani i nibuoli kuli, leni mi diema kuli yaaba leni i mabuoli kuli, yaaba n ye ŋanduna nni kuli po yaa maama n tie ne ki yedi ba: «Mi yanduanma n yaa pugidi yipo.

³² N sua ke li ŋani min waani yi Tanpojoma Tienu n tieni yaa sinankeeninba leni yaa bonlidikaala.

³³ O sinankeeninba yaba boncianla. Wan tieni yaa bancianma mo pia u paalu boncianla. O baa die hali yaa yogunu kuli, o bali baa yaa ye hali nifiima n tu nifiima.