Danieli 2 - Gourmanchéma Bible

¹ Nebukanesa bali binlieli binli, o den dangi ti dangidi. O yama den yagi ke waa go fidi ki guani.

² O den teni ke bi yini a lingida leni bi baabuuba leni Kalide ñoagidanba kuli ke ban waani o o dangidi. Bi den cua o bado kani.

³ O den yedi ba: «N dangi ti dangidi. N yama yagi ke n bua yin waani nni n dangidi n bua ki yedi yaala.»

⁴ Kalide ñoagidanba den maadi Alama maama nni ki yedi o bado: «O bado, ŋan yaa ye hali yaa yogunu kuli. Waani tinba a naacenba ti dangidi yeni, ti baa bundi ti apo.»

⁵ O bado den goa ki yedi ba: «Min jagi ki bili yaala tie ke yi yaa waani nni ti dangidi yeni leni ti bundima, bi baa pedi ki jendijendi yi ki mumudi yi diena ŋan tua diegbena.

⁶ Ama yi yaa waani nni ti dangidi yeni leni ti bundima mo, n baa pa yi bu paabu boncianla leni yaa kpiagidi n yaba. Lanwani waani nni mani ti dangidi yeni leni ti bundima.»

⁷ Bi den goa ki yedi o mi liema: «O bado n waani tinba a naacenba ti dangidi yeni ti baa bundi ti apo.»

⁸ O bado den goa ki yedi ba: «N bani i moamoani ke yi bua ki baa u folu bebe kelima yi laa ke min jagi ki bili yaa yogunu kan gandi.

⁹ Yi yaa waani nni ti dangidi yeni, buyendi n baa baa yikuli po. Yi juogi ki baa yaa pua nni mi faama leni i boandi hali u yogunu n lebidi. Waani nni mani ti dangidi yeni, lani n baa bandi ke yi baa fidi ki bundi ti npo.»

¹⁰ Kalide ñoagidanba den goa ki yedi o bado: «Laa pia ŋanduna nni yaa nilo n baa fidi ki waani a ŋan puogi ti yaala ne. Ti daa laa ŋanduna badicianba siiga, baa o kpiagidi leni o paalu n yaba maama kuli, yua n mabini lingido bi baabuulo bi buligbandaano n waani o yaa bonla n tie na buolu.

¹¹ O bado n puogi yaala pa, nilo kuli ki ye yua n baa fidi ki waani a, li yaa tie i *buli, yi yaa diedi n ki ye bi nisaaliba siiga yaaka.»

¹² Lanwani o bado pali den fii ki beni boncianla. O den ñani li ñoabonli ke ban kpa Babilona ñoagidanba kuli.

¹³ Bi den kpaani li ñoabonli yeni, ke bi cili ki baa kpa a banda. Bi den lingi Danieli leni o lieba ki baa bolini bani moko.

U Tienu waani Danieli o bado dangidi leni ti bundima

¹⁴ Lanwani Danieli den maadi leni o bado guudikaaba yudaano Aliyoki yua n den ñani ki baan kpa Babilona ñoagidanba. O den maadi leni o dindini leni mi yanfuoma,

¹⁵ ki yedi o: «Be yaa po ke o bado ñoabonli bia nande?» Aliyoki den waani Danieli mi maama yeni kuli.

¹⁶ Lanwani Danieli den gedi o bado kani ki mia o wan pa o u yogunu waamu wan bundi opo o dangidi.

¹⁷ Lani yaa puoli Danieli den kuni o denpo ki ban waani o lieba Hanania, Mikayeli leni Asalia mi maama fuuli.

¹⁸ O den yedi ba ke ban yaa miadi Tanpoli Tienu wan gbadi bipo mi niñima ki doagidi bipo li bondoaginkaala yeni ke ban da taani ki bodi leni Babilona ñoagidanba yaaba n sieni.

¹⁹ Lanwani li bondoaginkaala yeni den doagidi Danieli po ku ñiagu ti dangidi nni. O den jaandi ki kpiagi Tanpoli Tienu.

²⁰ Danieli den yedi: «U Tienu yeli n yaa pia ti kpiagidi hali yaa yogunu kuli. Wani n die mi yanfuoma leni u paalu kuli.

²¹ O lebidi jama leni i yogini. O fiindi bi badiciantianba bi gbandi po, Ki kaandi toaba mo ti gbandi po. Wani n puuni bi yanfodanba mi yanfuoma, Ki go puuni mi banma danba mi bandima

²² O doagidi yaala n duagi cain, O bani yaala n ye li *biigili nni Kelima mi yenma gaani ki lindi o

²³ N baanba Tienu, N jaandi a ki pagi a Kelima a puni nni mi yanfuoma leni u fidu, Ki go teni ke n bandi tin mia ŋa yaala, Lani n tie ke a doagidi tipo yaala n paki o bado.»

²⁴ Li yaa puoli Danieli den gedi Aliyoki kani, o bado n den puogi yua ke wan kpa Babilona ñoagidanba. O den gedi o kani ki yedi o: «Ŋan da kpa Babilona ñoagidanba. Ciani nni o bado kani ke n baa bundi opo o dangidi.»

²⁵ Aliyoki den jaligi ki ciani Danieli o bado kani ki yedi o: «O bado, n laa ban den cuo yaaba Juda diema nni siiga yaa ja n baa fidi ki bundi apo a dangidi.»

Danieli waani o bado o dangidi ki go bundi ti opo

²⁶ O bado den yedi Danieli, ban den lebidi yua yaa yeli ki yini o Belisasa: «Gbadi, a baa fidi ki waani nni min dangi yaa dangidi ki go bundi ti npo?»

²⁷ Danieli den maadi o bado nintuali ki yedi: «O bado, ŋan buali yaa bondoaginkaala yeni, bi ñoagidanba leni bi baabuuba leni a lingida leni bi buligbandanba kan fidi ki waani a la.

²⁸ Ama tanpoli pia yaa Tienu n doagidi li bondoaginkaala. O bado, wani n waani a yaala n baa ti faa ki cua.

²⁹ O bado, ŋan den dua a duanu po, yaa bonla n baa ti cua yaa yogunu n tie ne yaa pendi, den kua a yantiali nni. Yua n doagidi yaa bonla n wuo den waani a yaala n baa ti cua.

³⁰ Li bondoaginkaala yeni n doagidi npo yeni, laa tie ke n yanfuoma cie yaaba n fo kuli ka, ama li tie ke fini o bado n baa ki bandi a dangidi bundima ki go bandi a yama n jagi yaala.

³¹ O bado, a den laa nisaali-nannancianli. Li nisaali-nannanli yeni den yaba ki go ñuliti hali ke li kandi. Li den se a nintuali ke li bugima pia ti jawaandi.

³² Li nisaali-nannanli yeni yuli den tie wulamoano cain, li benli leni li buadi den tie ŋanjilifa, li tugu leni li pana den tie kumoandi.

³³ Li taana den tie kudi, li taafaadi moko den tie kudi ke ti kakali leni ku yoagu.

³⁴ Ŋan den diidi li nisaali-nannanli yeni, o nisaalo nuu n ki lugidi yaa tanli den ñani li juali po ki baa ki pua li nisaali-nannanli yeni taajenfaadi yaadi n tie kudi ki kali leni ku yoagu yeni, ke ti mudi.

³⁵ Lanwani ti kudi leni ku yoagu leni ti kumoandi leni ŋanjilifa leni wula yeni den taani ki mudi yenma ki tua nani yaa fenma n ye u jalu nni ku fawaagu yogunu yeni. U faalu den liebi ki ñani likuli ke pu kuli ki sieni likani. Ama yaa tanli n den pua li nisaali-nannanli yeni den tua joacianli ki gbieni ki tinga kuli.

³⁶ A dangidi n yeni, o bado. Ti bundima mo nne:

³⁷ A tie bi badiba kuli bado kelima tanpoli Tienu puni a li bali leni u paalu leni u fidu, leni ti kpiagidi.

³⁸ O mubini a bi nisaaliba leni ti fuayandi leni ti bonyugiditi kuli a nuu nni. Fini n die ba ban ye naankani kuli. Fini n tie li wulayuli yeni.

³⁹ A yaa puoli dietoama baa fii, yaama n kan pundi a yaama. Lani yaa puoli dietoama, mi bontaama, yaama n tie kumoandi baa diedi ki tinga kuli.

⁴⁰ Li yaa puoli mo dietoama mi bonnaama, yaama yaa paalu n naani leni ti kudi, baa ŋoadi. Nani ti kudi n fidi ki mudi ki foagidi li bonla kuli maama yeni, mi dienaama yeni baa mudi ki foagidi mi diema yeni kuli yene.

⁴¹ Nani ŋan den laa ke ti taajenfaadi leni a taajenbila poyendu tie kudi, ke poyendu mo tie yoagu maama yeni, laa diema moko boagidi yeni. Ama yaala n naani leni ti kudi paalu baa yaa ye laa diema nni nani ŋan den laa ke ti kudi kali leni ku yoagu maama yeni.

⁴² Nani a taajenbila n tie kudi ki kali leni ku yoagu maama yeni, mi dienaama yeni baa yaa pia u fidu poyendu, ki tadi poyendu.

⁴³ Nani ŋan den laa ke ti kudi kali leni ku yoagu maama, ama bi kan yaa taa yanyenma leni biyaba nani ti kudi leni ku yoagu n ki taa leni biyaba maama yeni.

⁴⁴ Mi diema yeni batieba yogunu Tanpoli Tienu baa fiini dietoama yaama n kan bodi hali abada. Nibuoto kan fidi ki diedi ma. Mi baa mudi ki gbeni mi diekpiama yeni kuli, ama mani miba baa yaa ye hali yaa yogunu kuli.

⁴⁵ Ŋan den laa yaa tanli ke li ñani li juali po ke nisaalo nuu ki lugidi li ke li pua ki mumudi ti kuboandi leni ti kudi leni ku yoagu leni ŋanjilifa leni wula yeni, waani lane. U Tienu, yua n pia u paaciamu kuli waani a yaala n baa ti cua yo. Ti dangidi yeni waani moamoani, tama mo kuli ki ye ti bundima nni.»

⁴⁶ Lani o bado Nebukanesa den labini ki pugi Danieli ki yedi ke ban padi a pada opo ki go juu opo tulale.

⁴⁷ O bado den yedi Danieli: «I moamoani, a Tienu tie U Tienu ki cie bi niba n ŋua yaala kuli, ki go tie bi badicianba kuli Diedo. Wani bebe n doagidi li bondoaginkaala kelima a fidi ki doagidi npo li bondoaginkaala yeni.»

⁴⁸ Li yaa puoli o bado den puni Danieli ti kpiagidi ki puni o yaa paabu n yaba ki pia mayuli boncianla. O den dini o li bali ke o die Babilona leni o tinkundogi kuli, ki go tuni o Babilona ñoagidanba yuli.

⁴⁹ Danieli den mia o bado ke o fiini Sadilaki, Mesaki leni Abedi-Nego ke bi tua Babilona tinkundogi koanbala yudanba. Danieli den taagi leni o bado cancantieba.