Danieli 12 - Gourmanchéma Bible

¹ Maleki go den yedi nni: «Li yogunu malekinba yudanciamo *Miseli, yua n guu fini Danieli nibuolu, baa fii. Li baa yaa tie fala yogunu. Laa fala baa yabidi hali maama ke o buolu daa tieni ki cili ŋanduna cilima ki yaa caa hali laa yogunu. Lanyogunu a nibuolu yaaba siiga nni lan baa sua ke yaaba yaa yela n diani li tili nni n baa ciadi.

² Yaaba n goa a kula nni siiga boncianla baa fii. Bi nitianba baa fii yaa miali n kan gbeni fiima, bi tianba mo baa fii yaa fe n kan gbeni yaa fiima.

³ Yaaba n pia mi yanfuoma baa yendi nani tanpoli yenma yeni, bani yaaba n bangi yaa niba n yaba ke bi lebidi ki ŋoadi mi *teginma, baa yendi nani a ŋmabila yeni hali yaa yogunu kuli.

⁴ Fini Danieli, ŋan kubi mi maama yeni lan yaa tie ŋasiili, ŋan da doagidi li tili yeni n yedi yaala hali mi juodima yogunu n pundi. Li yogunu bi niba boncianla baa cogi li bi bandima n pugini.

⁵ Mini Danieli n den diidi li bonlekaala yeni yaa yogunu, nitoaba, bonba lie den doagidi. Yendo den se li naa boanjaali po, one mo nepo yaa boanjaali po.

⁶ Bi siiga yendo den buali yaa ja n yie yaa tiadi n luni leni *len gaali, wani yua n den yiini u kpenciamu po yeni li bonlidikaala yeni n baa tieni ki gbeni yaa yogunu.

⁷ Yua n den yie len tiadi yeni den yugidi o ganu leni o jienu ki tegini tanpoli, ki taa yua n ye hali yaa yogunu kuli yeli ki poli ki yedi ke li baa yaa tiendi ki pundi bina taa leni boagidima. O go den yedi ke li bonla yeni baa tieni ki gbeni U Tienu n den gagidi ki ŋanbi yaa nibuolu fidu n baa gbeni cain yaa yogunu.»

⁸ N den gbadi o maama, ama mii den fidi ki ga ma. Lanwani n den buali o: «Laa bonla kuli baa juodi lede?»

⁹ O den goa ki yedi nni: «Danieli, ŋan da yagi a yama kelima li baa yaa tie ŋasiili ki puabi ki bili hali mi juodima yogunu.

¹⁰ Bi niba boncianla baa ŋuudi ki pendi paipai ki ŋanbi nani ban yen jugi ti kudi ki ñani ti joagindi maama yeni. Bi nibiadiba baa yaa tiendi mi biadima, bi siiga nni oba kuli kan ga liba, ama yaaba n pia mi yanfuoma baa ga.

¹¹ A yaa cili ki coadi hali ban teni ke bi cedi daali kuli padili leni ban kuani ki sieni ti caginciandi yaa yogunu, li baa yaa tie tudili n kobilie n dana piiyia (1 290).

¹² Yua n baa guudi ki pundi tudili n kobitaa n piitaa n dana muu (1 335) kuli baa baa mi yemanma.

¹³ Fini Danieli, ŋan sedi bonŋanla hali mi juodima. A baa ti fuodi ki go ti fii ki sedi ki ga a panpaani ŋanduna juodima yogunu.»