Danieli 11 - Gourmanchéma Bible

¹ N moko den todi wani *Miseli ki paagi o pali Medi diema yua Daliyusa bali binkpiali binli.

² Moala n baa waani a i moamoani. Diidi ki le, batieba taa go baa je li bali ki ŋoaŋoadi biyaba ki diedi Pelisa diema. Li yaa puoli o badinaalo baa baa mi piama ki cie bikuli. O paalu yaa pugini boncianla kelima o piama yeni po, o baa taani o diema yaaba kuli ban tuogi leni Gileka diema yaaba bu toabu.

Nijienu leni niganu diema badiba tuogi biyaba bu toabu

³ Ama o jakoando baa je li bali ki yaa die Gileka diema leni u paaciamu ki yaa tiendi wan bua yaala kuli.

⁴ Ama o paalu yaa yabidi hali boncianla, o diema baa mumudi ki boagidi kaani naa, nintuali leni puoli leni niganu leni nijienu. O puoliŋuani kan diedi ma, mi paalu mo kan go yaa yaba nani man den kpa tie maama, kelima mi baa boagidi boagidi nitoaba n yaa die ma ke laa tie o puoliŋuani.

⁵ Yua n baa diedi niganu po diema yaa paalu baa yabidi ki cie o yu, wan diedi. O diema baa yaa yaba.

⁶ Binaba yaa pendi, wani leni nijienu po yaa diema yaa bado baa danli. Niganu po diema bado bisalo baa kuni nijienu po diema bado ki teni ku danligu n yaa pa. O pua yeni paalu kan suagi ki yaa ye, o calo kan yaa ye, bi biga mo kan yaa ye. Ama wani leni yaaba n den ciani o leni o baa leni o calo yua n den baa yaa kubi o baa kpe.

⁷ O pua yeni baa diegu nni yua yendo baa cua ki tuogi leni nijienu po bado toagoli bu toabu ki kua o toadieli yaali n pa niinni, ki tieni wan bua maama likani ki paadi ba.

⁸ O baa fie bi *buli leni ban den duadi yaa nannana ki ŋua ŋa, leni bi tiamoandi yaadi n tie ŋanjilifa leni wula kuli, ki gedini Ejipiti po. Lani, o baa tieni binaba kaa tuogi leni nijienu po diema bado bu toabu.

⁹ Lani yaa puoli nijienu po diema bado baa kua wani niganu po bado diema nni, ama o baa goa ki lebidi ki kuni.

¹⁰ Nijienu po diema bado bijaba baa bogini bu toabu ki taani yaa toagola n yaba hali boncianla. Bi siiga nni yendo baa suagi liiga ki gedi ganu po ki kandi nani u kpenciamu ñima yeni. O yaa lebidi ki goa ki kuni o denpo, o baa baa niganu po diema bado toadieli yaali n pa.

¹¹ Lani niganu po diema bado pali baa be wan ña ki tuogi leni nijienu po diema yaa bado. Nijienu po diema bado yeni baa taani yaa toatieba n yaba, ama o toagola yeni kuli baa baa niganu po diema bado nuu nni.

¹² Wani niganu po diema bado baa paadi li toagoli yeni ki gbengi o yuli. O baa kpa bi niba tudatuda bam, ama baa yeni o kan yaa pa ki caa.

¹³ Kelima nijienu po diema bado baa goa ki taani yaa toagola n yaba ki cie mi kpiama. Binaba yaa pendi o baa goa ki cua leni yaa toagola n yaba leni yaa toatiadi n yaba boncianla.

¹⁴ Laa yogunu bi niba boncianla baa fii ki yie niganu po diema bado. Fini Danieli nibuolu siiga nni mi janjanma danba baa fii ke li bonlekaala yeni n tieni. Ama bi baa gbali.

¹⁵ Lanwani nijienu po diema bado baa cua ki pundi yaa dogu n pa ki dogini mi tama man kpedi ki pundi yaa bilinciamu n gaani ki cebini u dogu yuli po, ki cuo u. Niganu po diema bado toagola leni o jakoanda kan fidi ki koani leni o, kelima bi fidu naa dagidi maama ke bi baa fidi ki sedi o nintuali.

¹⁶ O baa tieni wan bua maama ke oba kuli kan yie opo. O baa kali yaa diema n ŋani ki cie diema kuli niinni ki yaa bolindi yaala n baa o nuu nni kuli.

¹⁷ Lani yaa puoli wani nijienu po bado baa jagi ke o baa fii leni o diema toagola kuli ki cua ganu po yaa bado yaa diema nni. O baa kpali ke o ŋua mi *teginma ki teni o o bisalo wan tua o pua ki bua ki janbi o ki bolini o. Ama laa nunfanbu kan cuoni opo.

¹⁸ Li yaa puoli o baa jigidi ki diidi yaa diema n baali mi ñincianma ki paadi laa diema siiga mi diema boncianla. Ama toayudancaano baa gbeni o japaadi yeni ki teni i fe yeni n goa ki baa o yuli po.

¹⁹ Lani, nijienu po diema bado yeni baa jigidi ki diidi o yaa diema toadiena, ama o baa gbali. O baa kpe kaa ŋa buolu.

²⁰ Yua n baa ga o kaanu baa soani nipaalo o diema nni naanpo n ŋani ki cie mikuli niinni. Ama danaba yaa pendi, bi baa kpa o bado yeni ŋasiili nni ke laa tie toabu nni.

Nijienu po diema badibiado

²¹ Ban ki faadi yua baa ga o kaanu, ama o kan yaa pia badikpiagidi. O baa cua bi niba yama n dua ke baa bangi liba yaa yogunu, ki fie li bali kelima ti ñoamandi leni i janbi po.

²² O baa paadi yaa toagola n cua ki baa o kuli, ki go bolini U Tienu n den bili o *ŋantaado leni yaa nibuolu yaa yudaano yendo.

²³ Nibuotoe baa ti danli leni o, ama o baa janbi ba. O paalu baa yaa yabidi ki pugidi baa ke o niba ki fuu.

²⁴ Bi niba yama n dua ke baa bangi liba yaa yogunu, o baa kua mi diema kuli siiga yaa kaanu n pia li baali ki cie niinni, ki tieni o baanba bi o yaajanba n ki den tieni yaala. O baa fagi mi diema ki boagidi boagidi o toatieba ti fagidi leni mi piama boncianla. O baa jagi ke o baa tuogi leni yaa dogi n pia u fidu bu toabu, ama li baa yaa tie u yogunu waamu bebe.

²⁵ O baa taani yaa toagoli n yaba ki gedi leni u paalu leni li papaali ki tuogi leni niganu po diema bado bu toabu. Niganu po diema bado yeni mo baa taani yaa toagoli n yaba ki pa, ki tuogi leni o, ama o kan fidi ki tuogi leni o lan gedi kaanu kelima bi baa juogi opo ki janbi o.

²⁶ Yaaba n taa leni o saatiagu baa janbi o. O toagoli baa sani ki yayadi, bi siiga boncianla baa kpe.

²⁷ Bani bi batielieba yeni baa taani saajekaanyendu, bi baa pua biyaba mi faama kelima mi biadima n baa yaa gbie bi pala nni. Ama ban jagi yaala kan cuoni kelima mi juodima yogunu daa pundi.

²⁸ Nijienu po diema bado baa lebidi ki kuni o denpo leni yaa piama n yaba. Ama o pali nni o baa jagi ke o baa tieni yaala n bia ki biidi U Tienu n den bili yaa ŋantaadi-gagidiŋamo leni o niba. O go baa tieni wan den jagi yaa biadima kuli ki pendi ki kuni.

²⁹ U yogunu yaa pundi, o go baa fii ki gedi ki ban tuogi leni niganu po diema bu toabu. Mani wani li kan tua nani mi kpiama yeni.

³⁰ Kitima yaaba ñinbiadi baa cua ki tuogi leni o bu toabu. O gbanu baa wudi wan lebidi. Lani, o pali baa be boncianla U Tienu n den bili yaa ŋantaadi-gagidiŋamo po, wan tieni o ŋantaado yeni yaala n bia. O yaa kuni o baa juogi leni yaaba n ŋa U Tienu ŋantaadi-gagidiŋamo yeni.

³¹ Wan soani yaa toatieba baa bolini daali kuli padili ki kuani ki sieni ti caginciandi U Tienu *kaangagidiŋamu nni leni li kaanpaalu nni.

³² Leni o ñoamandi o baa tulini yaaba n miidi U Tienu ŋantaado. Ama U Tienu nibuolu siiga yaaba n bani wani bi Tienu yeni baa yaa se bonŋanla.

³³ Bi siiga nni yaaba n pia mi yanfuoma ki cie baa todi bi niba boncianla bani mo n baa mi yanfuoma. Ama bi siiga nni bi baa kpa bi nitianba leni mu jugisiemu, bi tianba leni mi fantama, ki gedini bine ti yonbidi, ki fie bi tianba mo yaa piama. Li baa yaa tie yeni hali danaba.

³⁴ Fala yeni siiga, bi baa baa mi todima waamu bebe. Kelima yaaba n baa taani bipo siiga boncianla baa taani bipo leni i janbe.

³⁵ Bi siiga bi yanfodanba boncianla baa kpe. Bi kuuma baa ŋanbi bi nibuolu yaaba ki teni ban pendi paipai nani ban yen jugi ti kudi ki ñani ti joagindi maama yeni. Li baa yaa tie yeni hali mi juodima yogunu n pundi, kelima mi kan tieni se u yogunu pundi.

³⁶ Nijienu po diema bado yeni baa yaa tiendi wan bua yaala kuli. O baa gbengi oba ki kpiagi o yuli ki tama ke o cie U Tienu leni i buli kuli, ki go maadi U Tienu yua n cie ban ŋua yaala kuli po mi biadikandikaama. Wan tieni yaala kuli baa cuoni opo bonŋanla hali U Tienu pabienli n doagidi. Lanwani U Tienu n den bili yaala kuli baa tieni.

³⁷ O bado yeni kan yaa fangi o baanba buli bi bi puoba bubuado. O kan yaa fangi buloba kelima o baa yaa tama ke o cie bikuli.

³⁸ O baa cedi bani ki yaa kpiagidi yaa bulo n die i kaanpaali, o baanba n ki den bani yi. O baa kpiagi o bulo yeni leni yaa paabu n tie wula leni ŋanjilifa leni yaa tanmoana n pia mi jawaama ke a dunga pa boncianla leni tiamoantoadi.

³⁹ O bulamo yeni baa todi o wan baa i kaanpaali. Yaaba n tuo ki ŋoadi o, o baa dini ba li bali ban yaa die bi niba boncianla ki pa ba mu tinmu boncianla mun tua bi panpaani.

⁴⁰ Mi juodima yogunu yaa pundi, niganu po diema bado go baa tuogi leni nijienu po diema yaa bado bu toabu, ama wani nijienu po diema bado baa baa opo nani ku tafaaciangu yeni leni ti toateliti leni bi tandanba leni yaa toañinbiadi n yaba boncianla. Wani nijienu po diema bado yaa kpendi, o baa poandi mi diema boncianla nni ki kandi i biani nani a ñingola yeni.

⁴¹ O baa kua yaa diema n ŋani ki cie mi diema buoli kuli niinni. Bi niba boncianla baa kpe, ama Edomi yaaba leni Moabi yaaba leni Amoni yaaba yudanba baa cia.

⁴² O baa ga dietoama ki diedi o diema. Ejipiti diema moko kan ciadi.

⁴³ O baa fie Ejipiti yaaba n pia yaa bonmoanla yaala n tie wula leni ŋanjilifa leni bi tiamoandi kuli. Ogi baa diedi Libi diema yaaba leni Etiopi diema yaaba, ban ŋoadi o.

⁴⁴ Ama yaa laabaalo n ñani puoli po leni nijienu po baa cua ki jieni o. O pali baa be boncianla wan fii ki gedi ki ban bolini bi niba boncianla.

⁴⁵ O baa tii o badigbandiena mi ñincianma leni yaa joagagidiŋanli n pia ti kpiagidi yaa siiga. Lani mi kuuma baa ludi o ke oba kuli kan todi o mo.»