Danieli 10 - Gourmanchéma Bible

¹ Pelisa diema bado Silusa bali bintaali binli, U Tienu ñoabonli go den doagidi Danieli, ban go yi yua Belisasa po. Li ñoabonli yeni tie moamoani, ama li gbadima den pa boncianla. Danieli den baa li doagidima li bonlekaala nne.

² Laa yogunu mini Danieli den ye leni li paboanli hali piilie n dayenli.

³ Mii den di jemanmaba, nandi bi daama ki den kua n ñoabu nni, mii den tiendi tulale ki ŋanbidi nba hali piilie n dayenli yeni n ban pendi.

⁴ Li bintaali yeni yaa ŋmakpialo yaa piilie n danaali daali n den se yaa kpenciamu n yi Tigili kpenu boanjaali po.

⁵ Min den diidi yaa yogunu n den laa o ja ke o yie yaa tiadi n luni leni *len yaa gaali. O den ñaagi ban taa o wulamoano ki tieni yaa ñagidu.

⁶ O gbanu den ñuliti nani kilisoliti tanmoanli yaali n pia mi jawaama ke li dunga pa boncianla yeni. O nunga moko den yieni nani mi tañigima yeni. O nuni den naani leni mi fantanlanma. O buadi leni o taana den ñuliti lonloni nani ban ŋuudi yaa kumoandi yeni. O nialu den naani leni yaa niligu n yaba yaa fuugu.

⁷ Mini Danieli bebe n den laa li bonlekaala yeni. Yaaba n den ye leni nni ki den laa la ama ti jawaanciandi den cuo ba ke bi sani ki wuoni.

⁸ Mini bebe n den sedi ki laa li bonlekacianla yeni. N fidu kuli den gbeni, n nunga den gbidi, n gbanu den kpe cain.

⁹ N den gbadi o ja yeni nialu ke o maadi. Min den gba ke o maadi yeni, n den baa ki pabi ki laabi.

¹⁰ Nuu den mubini nni ki fiini nni ke n gbaani ki ñii ki digibi.

¹¹ O ja yeni den yedi nni: «Danieli, U Tienu buado, U Tienu soani nni a kani moala ne. Lanwani ŋan sedi ki moandi ki ga min baa yedi a yaala.» Wan den yedi nni yeni, n den fii ki sedi ki digibi.

¹² O go den yedi nni: «Danieli, ŋan da jie liba kelima hali ŋan den cili yaa daali ki kuani a yama ki bua ki bandi yaala n tiendi, ki go miini a yuli a Tienu nintuali, o ga a miabu. Li tie a miabu yeni yaa po yo ke n cua.

¹³ Yaa maleki n tie Pelisa diema yudaano den yiedi npo hali piilie n dayenli, ama malekinba yudancianba siiga yendo, *Miseli, den cua ki todi nni. Lanwani bi den sieni nni Pelisa diema badiba kani.

¹⁴ N cua a kani ki baa waani a yaala n baa ti faa ki cua a nibuolu yaaba po. Kelima li go pia li bonlekaala laa yogunu po.»

¹⁵ Wan den maadi leni nni laa maama, n den tibini ki nua tiipo ki kan fidi ki yedi liba.

¹⁶ Lani, yua n den naani leni o nisaalo den sii n ñoacuuna. N den fidi ki yaadi n ñoabu ki maadi. N den yedi yua n den se n nintuali yeni: «N daano, li bonlekaala ne po teni ke ti jawaandi cuo nni ke n gbanu kpe.

¹⁷ Mini a naacemo baa ga lede ki maadi leni fini n daano? Kelima n fidu kuli gbeni, mii go fidi ki fuo mo.»

¹⁸ Lani, yua n naani leni o nisaalo yeni didi go den sii nni ki paagi nni.

¹⁹ O den yedi nni: «N Tienu buado, da jie liba, duani a yama. Goa ki paagi a pali ki paagi aba.» Wan den maadi leni nni yeni, n go den goa ki baa u fidu ki yedi o: «N daano, maadi, kelima a goa ki paagi nni.»

^20-21 Lani o den yedi nni: «A bani yaala yaa po ke n cua a kani bi? N cua ki baa waani a yaala n diani i moamoani tili nni. Ama n baa goa ki gedi ki ban tuogi leni yaa maleki n tie Pelisa diema yudaano. Lani yaa puoli yaa maleki n tie Gileka diema yudaano baa cua ki tuogi leni nni. Oba kuli ki todi nni ke n togidi leni ba bu toabu, li yaa tie yaa maleki n tie yinba Isalele yaaba yudaano Miseli yaaka.