Danieli 1 - Gourmanchéma Bible

Danieli leni o lieba ye Babilona diema nni

¹ Juda diema bado Yeojakimi bali bintaali binli, Babilona bado Nebukanesa den cua leni o toatieba ki baa Juda diema dociamu Jelusalema bu toabu. Bi den gaani ki cebini u ki guu.

² O Diedo den taa Juda diema bado Yeojakimi ki teni Nebukanesa nuu nni, ki teni ke o taa wani U Tienu diegu tiadi ti tiandi. Nebukanesa den taa a kpaada leni mu tadimu ki gedini Sineala diema nni. O den kuani ti tiadi yeni o *bulo dieli nni ki bili ti li ŋalimandieli nni.

³ O bado Nebukanesa den puogi o moagilimu yudaano Asepenasi ke wan gandi Isalele buolu nni bi bulicinba bi bi paatieba bila siiga bi jawatianba ki cuani ba.

⁴ Laa jawaaba kan yaa pia bi gbanu po poadoba kuli. Bi baa yaa pia mi jawaama ki fani, ki pia mi yanfuoma leni mi bandima ki nan fidi ki yaa tuuni wani o bado diegu nni. Bi baa bangi ba Kalide yaaba diani leni bi maama.

⁵ O bado den bili ke ban yen ñani wan di yaa jiema leni wan ñu yaa daama ki yaa tendi ba daali kuli, ki go yaa bangi ba mi bangima hali bina taa. Laa bina yaa pendi, bi baa yaa tuuni wani o bado po.

⁶ Bi jawaaba yeni siiga, den pia Juda buolu yaaba. Bani n tie Danieli, Hanania, Mikayeli leni Asalia.

⁷ Mu moagilimu yudaano den lebidi bi yela ki yini Danieli Belisasa, Hanania Sadilaki, Mikayeli Mesaki, Asalia mo Abedi-Nego.

⁸ Danieli den jagi ke o kan *joagini o yuli leni o bado n di yaa jiema leni wan ñu yaa daama. Lane o den mia mu moagilimu yudaano ke wan da tieni paalu ki teni wan joagini o yuli.

⁹ U Tienu den teni ke o mangi o nunga Danieli po ki cengi o miabu.

¹⁰ Ama o den yedi Danieli: «N daano o bado n bili yin baa yaa di ki go ñu yaala. N jie ke o baa ti le ke yii gbengi ki pundi yi lieba. Li yaa tua yeni yi baa kuani nni o bado biili nni wan ti kpa nni.»

¹¹ Lanwani Danieli den yedi mu moagilimu yudaano n den puogi yua wan yaa kubi wani Danieli, Hanania, Mikayeli leni Asalia:

¹² «Canbaa, n mia ŋa ŋan biigi ti dana piiga, ki yaa tendi ti ti kpinfaadi tin yaa di, leni mi ñima tin yaa ñu.

¹³ Lani yaa pendi ŋan boagini ti nunmu leni yaa jawaaba n di o bado jiema yaa nunmu ki tieni tipo nani ŋan laa maama.»

¹⁴ O den tuo bi miabu ki biigi ba dana piiga.

¹⁵ Ki danpiiga yeni n den pendi bi nunmu den ŋanbi ki cie yaa jawaaba n den di o bado jiema kuli, bi gbanu mo den yieni ki cie ba.

¹⁶ Lani yaa po yua n den kubi ba yeni den suagi liiga ki tendi ba ti kpinfaadi ki cedi o bado yaa jiema.

¹⁷ U Tienu den puni bi jawaanaadiba yeni mi bandima leni mi yanfuoma u cogu leni mi bangima nni. Danieli mo go den baa fidi ki bandi ki go bundi li bonlekaala leni ti dangidi kuli.

¹⁸ O bado Nebukanesa n den bili ban cuani ban den gandi yaa jawaaba yeni kuli o kani yaa yogunu n den pundi, mu moagilimu yudaano den gedini ba o kani.

¹⁹ O bado den boe leni ba. Bi jawaaba yeni kuli siiga oba kuli ki den pundi Danieli leni Hanania leni Mikayeli leni Asalia. Lanwani bi den taa ba ke bi tuuni o bado po.

²⁰ O bado n den buali ba yaala kuli yaa niinni, yaala n bua yanfuoma leni banma kuli, o den sua ke bi cie yaa lingida leni yaa baabuuba n ye o diema nni kuli taalima piiga.

²¹ Danieli den tuuni yeni hali o bado Silusa bali binkpiali binli.