Amosi 6 - Gourmanchéma Bible

¹ Fala baa baa yaaba n ye Siyono leni mi yanduanma, Leni yaaba n ye Samali juali po kaa bangi liba. Fala baa baa laa paatieba, Yaaba n tie i nibuoli kuli siiga yaa nibuolu n tugi li yuli, Isalele yaaba n caa bani yaaba yaa kani, ke bi todi ba.

² Gedi mani ki ban diidi Kaline dogu Ki ña lankani ki gedi hali Hamati, u dociamu, Li yaa puoli, yin gedi mani Filisiti yaaba dogu Gati po. Naani laa dociami pia mi piama ki cie yi dieliedima bi? Naani bi diema yaba ki cie yi yaama yo?

³ Yi tama ke yi foagidi fala daali, Ama yi tiendi yaala n teni ke u paabiadu diema nagindi.

⁴ Yi dua ban tabini yaa duani a luonñina, Yi dua yaa cabiladikaana n dingi bonŋanla po, Yi ŋmani i yankuli pebila, Leni a naatonbiwubida.

⁵ Yi pua ti kogiditi, Ki tama ke bi bani ti baantiadi nani Dafidi yeni.

⁶ Yi ñu duven yaa tadibuomu n pia yaa niinni, Yi sogini yaa kpama n ŋani ki cie, Ama yi pala ki yia Josefi puoliŋuani bodima po.

⁷ Li tie lani yaa po ke yi baa kua ban baa gedini yaaba ti yonbidi liiga, Yin mangidi yi pala yaa jaanma badi nni baa gbeni.

Samali bolinma

⁸ O Diedo, Li Miali Diedo taa wani oba yeli ki poli, Li Miali Diedo U Tienu, U Paaciamu Kuli Daano yedi yaa maama n tie na: «N nani Jakobo puoliŋuani japaadi, N nani bi dieŋama, N baa taa bi dogu Samali leni yaala n ye u niinni, Ki teni bi yibalinba.

⁹ Baa niba piiga yaa sieni diegu nni, bi moko baa kpe.

¹⁰ Yua n kpe kpiilo yaa cua ki taa o yaa yogunu ki baa n juu, O yaa ñani o kpaba li dieli nni yaa yogunu, O baa buali yua n ye li dieli liiga po: ‹Naani nitoa go ye leni a lienni bi?› O nilo yeni baa goa ki yedi o: ‹Oba kuli ki ye leni nni.› Yua n buali yeni baa goa ki yedi: ‹Suo! Laa tie yaa yogunu ke ti baa taa Li Miali Diedo yeli.› »

¹¹ Li Miali Diedo ñani li ñoabonli ki yedi: «N baa teni a dieciama n tua tangbangbiana, N baa teni a diebila n pua i yiani.»

¹² Naani i taami baa sani ku tangu po? Naani nilo baa ko kupo leni i ne bi? Ama yinba Isalele yaaba wani lebidi yaa bujiali n tiegi Ke li tua nani ti loabidi yeni, Yi lebidi mi *teginma n mali yaala Ke li tua nani ti tontondi yeni.

¹³ Yi mangidi yi pala kelima yi diedi Lodebadi, Yi tua: «Naani tii fidi ki cuo Kanayima yaaba leni ti paalu kaa?»

¹⁴ Li tie lani yaa po ke Li Miali Diedo U Tienu, U Paaciamu Kuli Daano yedi: «N baa fiini nibuolu wun tuogi leni yinba, Isalele yaaba, bu toabu, Ki waani yi fala ki cili jienu po, yaa sanu n caa Hamati, Ki ban pundi yaa kpenu n tiini ki ña Alaba ki caa ganu po.»