Amosi 5 - Gourmanchéma Bible

¹ Yinba Isalele yaaba, Cengi mani yaa maama n tie na! Cengi mani min baa wanli yipo yaa kuwanli!

² Isalele yaaba baa nani yaa jafaano n kpe ki daa bani ja yeni. O panma nni, o baa ki kan go fii, O bili tiipo, Oba kuli kan fiini o.

³ O Diedo, Li Miali Diedo yedi yaa maama n tie na: «Isalele yaaba dogi siiga Yu n bi caani niba tudili bu toabu, Niba kobiga bebe n baa sieni. Yua n bi caani niba kobiga, Niba piiga bebe n baa sieni.»

⁴ Li Miali Diedo yedi Isalele yaaba yaa maama n tie na: «Lingi mani mini, yi baa fo.

⁵ Yin da go lingi nni Betela, Da go gedi mani Giligali moko. Yin da go gedi mani Beli-Seba Kelima bi baa gedini Giligali yaaba ti yonbidi, Ki bolini Betela mo.»

⁶ Lingi mani Li Miali Diedo ki yaa fo. Lani yaaka o baa cua nani mi fantama Josefi puoliŋuani siiga, Ki buoni yaala n ye Betela kuli, Ke oba kuli kan fidi ki gbindi ma.

⁷ Yinba yaaba n lebidi mi *teginma Ke mi to nani ti tontondi yeni. Yi yiedi mi teginma ki ŋmaadi ma.

⁸ Wani U Tienu n den tagi Ŋmasoali leni bi Naadiaba O yen teni li *biigili n lebidi ki tua yenma, O yen teni u yensiinu n lebidi ki tua ñiagu, O tendi ke mi ñincianma ñima yugi ki caa tanpoli Ke o goa ki wuliti ma ki tinga po. O yeli n tie Li Miali Diedo.

⁹ O yen guliti bi paatieba, Ki bolindi i kaanpaali.

¹⁰ Yinba Isalele yaaba, yi nani yua n ye U bujiakaanu nni ki tundi yi, Yi nani yua n maadi i moamoani.

¹¹ Yi ŋmaadi o luodo, Ki fenli o kani *ŋalikama. Li tie lani yaa po ke yin maa yaa dieŋama Leni a tankpiekaana yeni Yi kan kua a niinni, Yin ŋu yaa duven tiidi ke yi ŋani hali boncianla Yeni yi kan ño yi duven.

¹² Mini U Tienu bani yi *tuonbiadi coali n yaba maama Leni yi tagili n pugidi maama. Yi mabindi bi niteginkaaba, ki gaani a suuna, Ki yiedi ke ban da jia o luodo po yaa buudi n tiegi.

¹³ Li tie lani yaa po ke o yanfodaano cedi Ki ŋmini yaa yogunu n tie na, Kelima li tie yaa yogunu n bia.

¹⁴ Moandi mani ki yaa tiendi yaala n ŋani Ki cedi yaala n bia, Yeni, yi baa yaa fo. Lanwani, Li Miali Diedo U Tienu, U Paaciamu Kuli Daano baa yaa ye leni yi, Nani yin tua ke o ye leni yi maama.

¹⁵ Nandi mani yaala n bia tienma, Ki bua yaala n ŋani yaa tienma, Yin yaa ja ti buudi leni mi teginma u bujiakaanu. Daalinba, Li Miali Diedo, U Tienu, U Paaciamu Kuli Daano, Baa gbadi mi niñima, Josefi puoliŋuani, yi n sieni po.

¹⁶ Lani yaa po, Li Miali Diedo, U Tienu, U Paaciamu Kuli Daano, O Diedo yedi yaa maama n tie na: «Bi niba baa mua i kumoe u dogu nitaankaani nni Leni i sani nni kuli ki yedi: ‹Ŋain!› Bi baa yini baa bi kpakpaaba, ban cedi bu kpaabu, Ki cua ki mua i kumoe, Bi baa yini yaaba n bani i kumoe ban cua ki mua.

¹⁷ Bi niba baa mua i kumoe i duven tiidi kuani nni kuli, Lani kuli baa tieni kelima n kpendi Ki baa bu ki cuo yi.» Li Miali Diedo n yedi.

U Tienu pabienli daali

¹⁸ Fala baa baa yaaba n bua Li Miali Diedo pabienli daali n cua. Yi guu ki tama ke li daali yeni baa yaa tie lede? Li baa yaa tie biigili daali, Li kan yaa tie yenma daali ka.

¹⁹ Li baa yaa naani leni yaa nilo n tiini o yangbanlo, Ki tuogi yaa fuayanbiadiga n yi ulisi, Bi wan sani ki pundi o deni ki ñii o nuu li goanli po, O wa mo n ñidi o.

²⁰ Naani Li Miali Diedo pabienli daali tie yenma daali yo? A-a, li tie biigile. Li tie biigili daali, lii pia yenma baa waamu.

U Tienu n nani yaa jaanma buolu

²¹ Li Miali Diedo yedi: «N sengi yin kpendi n diegu nni ki jaandi nni yaa jaandi Mii bua ki go le laa jaandi, Mii go bua ki ga yi badi laabaali.

²² Yi yaa cuani yi padijuukaana leni yi paabu, Laa go pia yankualiba kuli. Mii go faami Yi taanyenma pada leni yi naatonbiwubida kuli po.

²³ Foagidi mani n kani leni yi yani fuugu, Mii cengi yi kogiditi moe.

²⁴ Teni mani yaa bujiali n tiegi N yaa puubi yi siiga nani mi ñima yeni. Yin teni mani mi teginma n yaa ye yi siiga Nani yaa kpenu n kan ñuudi yeni.

²⁵ Isalele yaaba, naani yi den padi npo a pada Yin den ye mi fanpienma nni bina piinaa bi?

²⁶ Lanwani, yin tugi mani yi *buli, Yii n yi Sikuti leni Kiyuni, Yin tagi yi yi yula po yeni.

²⁷ Kelima n baa gedini yi ti yonbidi hali Damasa dogu liiga. Yua yaa yeli n tie Li Miali Diedo U Tienu, U Paaciamu Kuli Daano, n yedi yeni.»