Amosi 4 - Gourmanchéma Bible

¹ Yinba yaa popiada n ye Samali juali po, Ki gbengi nani Basana tialu naañuana yeni, Cengi mani yaa maama n tie na: «Yi mabindi taliginba, ki ŋmaadi ki midi a luoda, Ki tua yi ciaba: ‹Taa mi daama ki cuani tin ño.› »

² O Diedo, Li Miali Diedo poli O gagidiŋanma nni ki yedi: «A dana kpendi ke bi baa dadi ki ñani yi ne, Ki taani yi siiga baa yaaba n ban ŋua hali puoli, Nani mu jandiamu n yen cuo i jami ban dadi Ki ñani ba maama yeni.

³ Bi baa ñani yi u dogu bilinciamu bona kani, Yua kuli leni wan nagi yaa bonli kani, Bi baa lu yi u kaanpaalu nni.» Li Miali Diedo n yedi yeni.

Isalele yaaba pajuagili

⁴ Isalele yaaba, gedi mani Betela Ki ban yaa tiendi ti *tuonbiadi! Gedi mani Giligali moko ki ban yaa tiendi ti tuonbiadi ki pugidi! Yaa padi mani yi pada tiŋaagu kuli, Ki yaa tendi nni yi *dim dana tataa kuli.

⁵ Yaa taani mani ban pua yaa dupen leni li *dabinli Ki padi i tuondi pada, Kpaani mani ki waani yin kpendinni npo yaa paabu yi yama po. Kelima yi nan bua yene, yinba Isalele yaaba. O Diedo, Li Miali Diedo n yedi yeni.

⁶ Mini mo den tuuni mi koma yi dogi nni kuli, Ki go tendi ke mi jiema poadi yi diedi nni kuli. Ama baa leni lani kuli yii den lebidi ki guani n kani. Li Miali Diedo n yedi yeni.

⁷ N den yie yipo ki sieni ki taaga Hali ke u jetaagu da sieni ŋmaali taa. N den yen teni ke ki taaga n mii u naa dogu nni Ki lagidi ki ŋa u naa dogu. N den yen teni ki taaga n mii u naa kuanu nni, Ki cedi u naa kuanu mo n luo ga ki kuodi.

⁸ N den teni ke dogi lie bi dogi taa yaaba caa dotogu nni Ki bua mi ñinñokaama, Bi ñunñuunu naa den gbendi. Ama baa leni lani kuli, yii den lebidi ki guani n kani. Li Miali Diedo n yedi yeni.

⁹ N den yen teni yi kuani n faani Ki teni ke a baayuana mo n kua yi. N den teni ke a sidibila ŋmani yi sadinginba Yaaba yaa coali n yaba leni duven tiidi kuani Leni i kankanŋuke kuani leni *olifie kuani. Ama baa leni lani kuli yii den lebidi ki guani n kani. Li Miali Diedo n yedi yeni.

¹⁰ N den soani yi siiga u yianbiadipuodiko yu n naani leni Ejipiti yu, Ki teni ke bi ku yi nipanba leni mu jugisiemu, Ki fie yi taami mo. N den teni ke yi toanagili kpiema nuulibiadu kua yi. Ama baa leni lani kuli yii den lebidi ki guani n kani. Li Miali Diedo n yedi yeni.

¹¹ N den bolini yi siiga bi tianba, Nani min den bolini Sodoma leni *Gomola dogi maama yeni. Yi siiga yaaba n sieni den tie nani ban kuudi Yaa datala mi fantama nni yeni Baa leni lan kuli, yii den lebidi ki guani n kani. Li Miali Diedo n yedi yeni.

¹² Li tie lani yaa po ke yi baa le Min baa soani yi maama yinba Isalele yaaba. Lanwani, kelima min baa soani yi maama yaa po Yin bogini mani ki tuogi yi Tienu.

¹³ Diidi mani, U Tienu n tagi a juana leni u faalu, O wangi bi nisaaliba o yantiana. O yen teni mi yenma n lebidi ki tua *biigili O cuoni ki tinga joaciama po. O yeli n tie Li Miali Diedo U Tienu U Paaciamu Kuli Daano.