Amosi 1 - Gourmanchéma Bible

¹ U Tienu den doagidi Amosi yua n den tie Tekoa dogu yankpaaba siiga yendo po. O den baa li bonlekaala yaala n tie Isalele diema po. Li den tie Osiasi n den tie Juda bado ke Joasi bijua Jeloboami mo tie Isalele diema bado yaa yogunu. Li den sua ke li sieni bina lie mi tindigibima n tieni.

² Amosi den tua: «Li Miali Diedo ye Siyono ki buoni. O ye hali Jelusalema ki kpaani. A yankpaafuana kuodi Kalimeli juali yuli po kuodi.»

U Tienu fu Isalele leni Juda diema leni yaa diema n lindi ma Sili yaaba

³ Li Miali Diedo den yedi mi ne: «Damasa yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi den ŋma ki midi Galaadi diema yaaba Leni yaa teliti yaa taana n pia ti kudi ke ti sondi.

⁴ N baa soani mi fantama man buoni o bado Asayeli puoliŋuani. Mi baa je o bado Beni-Adadi badidiegu.

⁵ N baa mudi Damasa sendabila ya n luondi u dogu buliñoabu. N baa bolini Bekati Afeni yaaba, N baa bolini yaa bado n kaa Beti-Edena. Sili niba mo baa gedi ti yonbidi Kili dogu po. Li Miali Diedo n yedi yeni.»

Filisiti yaaba

⁶ Li Miali Diedo yedi mi ne: «Gasa yaaba tieni tuongunda taa, Li pundi baa bona naa ya n teni ke n kan lebidi min jagi yaala. Bi cuo nibuomunu kuli ki baa teni Edomi diema.

⁷ N baa soani mi fantama Gasa dogu bilini nni, Mi baa je likani dieŋama.

⁸ N baa bolini Asidodi dogu yaaba, Asikaloni dogu yeni mo, min bolini likani bado, Ki pegidi ki baa Ekiloni dogu, Filisiti yaaba, yaaba n sieni baa bodi. O Diedo, Li Miali Diedo n yedi yeni.»

Fenisi yaaba

⁹ Li Miali Diedo yedi mi ne: «Tili yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi cuo nibuomunu kuli ki teni Edomi yaaba Ki naa tiadi yaa *ŋantaado n den loli bani Tili yaaba Leni bi kpiiba, Isalele yaaba.

¹⁰ N baa soani mi fantama Tili dogu bilini nni, Mi baa je likani dieŋama.»

Edomi yaaba

¹¹ Li Miali Diedo yedi mi ne: «Edomi yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi den ŋoadi ki deli bi kpiiba leni ki jugisiega Kaa gbadi bipo niñimaba kuli. Bi pala yaa fii, ŋaa pia ke a jiidi, Baa pia sugili.

¹² Lani yaa po n baa soani mi fantama bi dogu Tema nni. Mi baa je Botisila dogu dieŋama.»

Amoni yaaba

¹³ Li Miali Diedo yedi mi ne: «Amoni yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi den lidi a tugipunba Galaadi diema nni, Ban den fii ki bua ki pugini bi diema.

¹⁴ Lani yaa po n baa soani mi fantama Laba dogu bilini nni, Mi baa je likani dieŋama, mi janjanma daali, Bu toabu kuudi siiga, Li baa yaa tie nani ku tafaabiadigu siiga yeni.

¹⁵ Bi bado mo baa gedi ti yonbidi, Wani leni o koanbala. Li Miali Diedo yedi yeni.»