Abidiasi 1 - Gourmanchéma Bible

Abidiasi pua sawali ke Edomi yaaba baa bodi

¹ Abidiasi n den baa yaa bonlekaala. O Diedo, Li Miali Diedo den maadi Edomi yaaba po ki yedi: «Ti gaa laabaali ke o ñani Li Miali Diedo kani. O soani o tondo i nilanbuoli siiga ke o yedi: ‹Fii mani tin tuogi leni Edomi yaaba bu toabu.› »

² Li Miali Diedo yedi Edomi yaaba: «N baa teni yin yaa tadi ki cie i nibuoli kuli. Bi niba kuli baa fali yi.

³ Yi japaaciandi biani yi, Yinba yaaba n kaa ti tanlondi nni Yaa kaani n kpedi boncianla, Ki tua yi yama nni: ‹Ŋme baa fidi ki ñani ti likani?›

⁴ Baa yi yaa ban ye naani n kpedi Nani jiebani tiali yeni, Baa yi yaa ban tieni yi yekaanu hali a ŋmabila siiga, N baa ñani yi likani ki tudi ki jiini yi. Mini Li Miali Diedo n yedi yeni.

⁵ A concona yaa tie ki cua ku ñiagu U nafanu pua ŋa n yeni! Naani bi kan su yaala n pia bipo mi fuoma te? Yaaba n cenli duven tiidi bonluonkaala yaa kua a kuanu nni Naani baa baa suodi likuli kaa?

⁶ Diidi ki le ban fidi yi tiadi maama yinba Edomi yaaba, Bi wuodi baa yin den wuoni yaa ŋalimani.

⁷ Yin den kuani o *ŋantaado leni yaa nibuoli deli yi Ki ñani yi yi diema nni, ki janbi yi. Yi danlinba paadi yi, ki diedi yi. Yaaba n den taagi ki di leni yi dia yi ti diadi. Bi maadi yi maama ki tua: ‹Diidi mani ban luo mi yama maama!›

⁸ Naani laa daali ka ke n baa teni Bi yanfodanba n bodi Edomi diema nni, Ki teni mi yanfuoma n bodi Esayu juana nni? Mini Li Miali Diedo n yedi yeni.

⁹ Fini Temana dogu ti jawaanciandi baa cuo a jakoanda, Mi diema nni toatieba kuli mo baa kpe.

Edomi yaaba dini Isalele yaaba yebiadima ñuadi

¹⁰ Yinba Edomi yaaba den tieni Yi kpiiba Jakobo puoliŋuani mi biadima. Lani n teni ke yi baa le i fe, Ki bodi cain hali yaa yogunu kuli po!

¹¹ Yaa daali ke bi yibalinba den paadi Yi kpiiba toagola ki kua bi dogu nni, Yi den ye likani. Ban den toani tiatia ki baa boagidi Jelusalema dogu ŋalimano, Yi moko den tie yenma leni bani bi nilanba yeni.

¹² Edomi yaaba, yi kan den mangi yi pala Yi kpiiba Juda yaaba fala daali, Yi kan den mangi yi pala u nafanu n pua ba yaa daali, Bi ki sugi ba bi pabiidicianli daali.

¹³ Yi kan den kua n niba dogu nni bi bodima daali. Yi kan den nuali bi fala bi bodima daali. Yi kan den fie yi kpiiba piama bi bolinma daali.

¹⁴ Yi kan den jia a sankada nni ki baa yaa kpaani Yaaba n tiini ki bua ki cia. Yi kan den yaa co yaaba n tiini ki bua ki ciadi Ki goa tendi ba bi yibalinba bi bolinma daali.

¹⁵ Kelima mini Li Miali Diedo pabienli daali nagini, Ke n baa jia i nibuoli kuli ti buudi. N baa soani yi nani yin den soani nitoaba maama. Yi tuona baa goa ki jiidi yi yula po.

Isalele yaaba baa tu Edomi yaaba bi panli

¹⁶ Yinba Isalele yaaba, yi ñuni n joagagidikaali po, Yeni, yaa nibuoli n sieni moko baa ño yogunu kuli. Bi baa ño, bi baa nali ki guo ki yuandi ki bodi cain.

¹⁷ Ama yaaba n cia baa ye Siyono juali po. Min go baa goa ki diedi yaali cain N niba Jakobo puoliŋuani baa goa Ki diedi mi diema.

¹⁸ N niba Jakobo puoliŋuani baa tie nani mi fantama yeni, Josefi puoliŋuani mo baa tie nani mi fantanlanma yeni. Ama Esayu puoliŋuani baa tua nani mi fenma yeni. Bi baa bolini Esayu puoliŋuani nani mi fantama N yen buoni mi fenma maama yeni. Oba kuli kan cia Esayu puoliŋuani siiga. Mini Li Miali Diedo n yedi yeni.»

Bi baa goa diedi yaa diema n gaani ki lindi ba

¹⁹ N niba, Juda yaaba, baa diedi Edomi diema niganu po. Yaaba n ye Sefela baa diedi Filisiti yaaba diema. Bi baa diedi Efilayima buolu diema leni mi dociamu Samali. Benjamina buolu yaaba baa diedi Galaadi diema.

²⁰ Bi nilanba n den cuo yaaba ti yonbidi Isalele yaaba siiga, Baa diedi Kanana yaaba diema ki pundi hali Salepita dogu. Ban den cuo yaaba Jelusalema ki gedini ti yonbidi Sefanadi dogu nni, Bani mo baa diedi ganu po yaa dogi.

²¹ Ban den cuo Jelusalema yaaba, yaaba ti yonbidi Ke bi ye Sefanadi dogu nni, Jelusalema dogu jakoanda baa cua ki baa Edomi diema ki diedi ma. Li Miali Diedo wani oba n baa tua o bado!