3 Jan 1 - Gourmanchéma Bible

I fuondi

¹ Mini o nikpelo n diani li tili fini n buado Gayusa min bua yua leni i moamoani.

² N buado, n sugini ke a yema kuli dagidi apo, ke a pia laafia a gbanandi po nani ŋan pia laafia a naano po maama.

³ Ti kpiiba yaa den cua yaa yogunu ki tieni siedi ke a tie moamoandaano ki cuoni i moamoani yaa yenma nni, n pali yen mangi hali boncianla.

⁴ Yaala n mangi n pali ki cie tie ki yaa gba ke n bila ŋua i moamoani.

Gayusa tie nidugika

⁵ N buado, a doagidi ke a tie nidugika leni ŋan tiendi yaala ti kpiiba po, baa yaaba n tie bi canba.

⁶ Bi den togidi Kilisiti n yini yaaba taanli siiga ŋan pia yaa buama. Li baa ŋani ŋan todi ba ban suagi liiga bi sancenli po nani lan dagidi U Tienu po maama.

⁷ Kelima bi den fii ki gedi Jesu Yeli po, ki naa ga liba bi nilanba kani.

⁸ Lani yaa po li pundi ke tinba n yaa gaani laa nibuolu cangu, ke ti mo n taani leni ba i moamoani wangima tuonli nni.

Diotefe yiema, Demetilusa ŋanma

⁹ N den diani mi maama waamu Kilisiti n yini yaaba po. Ama Diotefe, yua n bua ki yaa tugi li yuli bi siiga yeni naa tuo tipo.

¹⁰ Lani yaa po, n yaa cua, n baa togidi wan tiendi yaala kuli leni wan maadi tipo yaa mabiadima leni yaa faama kuli. Laa tie lani bebe. O go yie, waa gaani ti kpiiba cangu. Baa yaaba n bi bua ki ga bi cangu mo, waa tuo bipo, ki go deli ki ñani ba Kilisiti n yini yaaba nitaanli nni.

¹¹ N buado, ŋan da togidi yaala n bia, ama ŋan yaa togidi yaala n ŋani. Yua n tiendi yaala n ŋani tie U Tienu yua, ama yua n tiendi yaala n bia daa laa U Tienu.

¹² Bi niba kuli, leni i moamoani iba tiendi Demetilusa po yaa siedo n ŋani. Ti moko tiendi opo laa siedi. A bani ke ti siedi tie moamoani.

I fuondijuodike

¹³ N pia mi maama boncianla ki bua ki diani apo, ama mii bua ki diani leni mi tidianñima leni u tidianmuanu.

¹⁴ N sugini ke n baa le ŋa ke li kan waagi, tin fidi ki boe.

¹⁵ Mi yanduanma n yaa ye leni a. A danlinba fuondi a. Ŋan fuondi ti danlinba kuli yendo yendo.