2 Timote 1 - Gourmanchéma Bible

I fuondi

¹ Mini Polo yua n tie Jesu Kilisiti tondo kelima U Tienu yanbuama po, wan soani yua min yaa wangi wani U Tienu n den niani yaa miali n ye Jesu Kilisiti nni yaa maama.

² N diani li tili fini Timote n bibuadiga po. Ti Baa U Tienu leni ti Diedo Jesu Kilisiti n pa ŋa li *ŋanbili paabu leni mi yanduanma ki go gbadi apo mi niñima.

Polo tuondi U Tienu ki tundi Timote

³ N tuondi U Tienu min tuuni yua po leni yaa pali siedi n ŋani, nani n yaajanba n den tuuni opo maama. U yensiinu leni ku ñiagu kuli n yaa jaandi U Tienu, n miadi o apo ki tuondi o kaa cedi.

⁴ N tiadi a ninsiidi ki bua ki le ŋa boncianla n pali n go mangi lan kandi.

⁵ N go tuondi U Tienu kelima n tiadi a dandanmoanli po, a yaa Lowisa leni a naa Yunisa n den kpa pia yaa *dandanli buolu, n bani cain ke a moko pia laa dandanli.

⁶ Lani yaa po n bua ki tundi a ŋan yaa tigi nani mi fantama yeni U Tienu n den puni a yaa ŋanbili-paabu min den maani apo n nii yaa yogunu.

⁷ Kelima U Tienu ki puni ti yaa Fuoma n pia i jeje, o puni ti yaa Fuoma n pia li papaali leni mi buama leni li yukubile.

⁸ Lanwani ŋan da jie i fe ŋan tiendi yaa siedi ti Diedo po yaa po, leni mini o kpaadili po moko. Ŋan taani leni nni o Laabaaliŋamo fala nni kelima U Tienu paalu po.

⁹ O den faabi ti ki yini ti yaa yiinu n gagidi. Waa den tieni yeni kelima ti tuonŋama po ka, li tie kelima o yanjagili leni o ŋanbili po, wan den tieni tipo yaala Jesu Kilisiti nni hali ke ŋanduna daa tagi.

¹⁰ Ti Candaano Jesu Kilisiti cuama ŋanduna nni doagidi tipo laa ŋanbili moala. Wani Jesu den paadi mi kuuma paalu ki doagidi tipo li miali, yaali n baa ye hali yaa yogunu kuli, kelima o Laabaaliŋamo wangima yaa po.

¹¹ U Tienu den puogi nni ke min tua laa Laabaaliŋamo wangika leni o tondo leni o bangika.

¹² Li tie lani yaa po ke n laadi yaa fala n tie na moala, ama mii jie i fe lipo baa waamu kelima n bani min daani yua, ki go bani ke o pia u paalu ki baa fidi ki kubi n pianli hali li daali n pundi.

¹³ Ŋan den gbadi n kani yaa mamoanma baa tie apo li bontogidikaala. Ŋan yaa ŋua ma, ki se ke li pa li dandanli leni mi buama nni, tin pia yaala Jesu Kilisiti nni.

¹⁴ Ŋan yaa kubi U Tienu n den piani a yaa pianmoanli kelima o U Tienu Fuoma Yua yua n ye ti niinni yaa paalu po.

¹⁵ A bani ke ti Diedo yaaba yaaba n ye Asi diema lebidi ki ŋa nni. Fijela leni Elimojena tie bi siiga yaaba.

¹⁶ O Diedo n yaa gba Onesifola leni o deni yaaba po mi niñima kelima o den yen duani n yama ki mangidi n pali, waa den jie i fe n kpaadi po.

¹⁷ Wan den cua Loma yaa yogunu o den tieni ania ki lingi nni hali ki laa nni.

¹⁸ O Diedo n gbadi opo mi niñima o goacuama daali. A bani ki cie nilo kuli wan den todi nni yaa todima kuli min den ye Efesa.