2 Samueli 1 - Gourmanchéma Bible

Dafidi gbadi Sayula kuuma

¹ Dafidi n den paadi Amaleki yaaba ki guani o deni Sikilagi, li den sua ke Sayula kpe no. Wan den tieni likani dana lie,

² o ja den ñani Sayula toanagili po ki cua Dafidi kani li dataali daali. O paboanli po o den padi o tiadi, ki wuli o yuli po mi tama. Wan den pundi Dafidi kani o den labini ki pugi o.

³ Dafidi den buali o: «A ñani le?» O den goa ki yedi o: «N ñani Isalele yaaba toanagili nni ki sani ki cia.»

⁴ Dafidi den buali o: «Be n tieni lipo? Waani nni.» O den goa ki yedi o: «Isalele yaaba ñani bu toabu nni ki sani. Bi niba boncianla kpe. Baa Sayula oba leni o bijua Jonatan kuli kpe.»

⁵ Dafidi den buali yaa jawaalo n cuani laabaali yeni: «A bandi lede ke Sayula leni o bijua Jonatan kpe?»

⁶ O jawaalo yeni den goa ki yedi o: «Li den sua ke n ye Giliboa juali po. Sayula den caani o kpaanli ki labini lipo ke Filisiti yaaba toateliti leni bi tandanba kuli mo bua ki pundi o kani.

⁷ O den gbegi ki laa nni ki yini nni. N den yedi: ‹Mini nne.›

⁸ O den yedi nni: ‹A tie ŋme?› N den goa ki yedi o: ‹N tie Amaleki yua.›

⁹ Lanwani o den yedi: ‹Nagini ki kpa nni kelima n nunga fu baa ke li daa naani ke n baa kpe.›

¹⁰ N den nagini o ki ku o kelima wan den baa ki poagili maama, n den bani ke o kan go yaa ye. N den ñani o yuli po ki badifogiliga ki pidi o biali ki cuani likuli fini n daano kani.»

¹¹ Dafidi den cuo o tiadi ki padi. Yaa niba n den ye o kani kuli moko den cuo bi yaa tiadi ki padi.

¹² Bi den ye leni mi kuuma paboanli ki buudi ki loli bu ñoabu hali ku yenjuogu kelima Sayula leni o bijua Jonatan po, leni Li Miali Diedo niba Isalele yaaba po kelima bi den kpe bu toabu nni.

¹³ Dafidi den buali yaa jawaalo n den puni o laabaali yeni: «A tie lepo yua yo?» O den goa ki yedi o: «N tie nilamo, Amaleki buolu.»

¹⁴ Dafidi den yedi o: «Be n teni ke a tandi a nuu ki ku Li Miali Diedo n gandi yua ki naa jie?»

¹⁵ Dafidi den yini o naacenba siiga nni yendo ki yedi o: «Nagini ki kpa o.» O ja yeni den pua Amaleki yua ke o kpe.

¹⁶ Dafidi den yedi: «Ŋan bi yedi ke a ku Li Miali Diedo n gandi yua yeni, a ñoabu n cuo ŋa. Lani yaa po a soama tagili n goa ki baa a yuli po.»

Dafidi mua Sayula leni Jonatan po i kumoe

¹⁷ Dafidi den ñani Sayula leni o bijua Jonatan po bu kuyanbu.

¹⁸ O den teni ke bi bangi bu Juda yaaba. Bu yeli tie li dabanli yanbu. Bu diani ban den yi yua o Niteginka tili nni. Buni n tie na:

¹⁹ Isalele diema yaaba, bi ku yi jakoanda, Yaaba n tie yi kpiagidi, yi juana po. A jakoanda yudanba n kpe maama ne te?

²⁰ Da kpaani mani laa laabaalo Gati dogu niinni, Da doagidi mani laa laabaalo Asikaloni dogu sani nni, Ke Filisiti yaaba bisiaba n da mangi bi pala lipo Ke a jifola yeni bisiaba n da gbengi bi yula lipo.

²¹ Yinba Giliboa juana, Ku mangu bi ki taaga n da go suodi yipo, Yaa kuani n luoni ke bi ñandi yi niinni li bonluonkaala Ki puuni U Tienu, n da go ye yipo, Kelima bi fiagi a jakoanda gbankoanditi yi yula po, Baa Sayula yaa gbankoandigu moko, bi den fiagi gu, Baa go duundi mi kpama ki ŋanbidi gu.

²² Mi soama n den wuliti naani, A jakoanda kpama n den ña naani, Jonatan dabanli ki den guani puoli baa yenma. Sayula jugisiega mo ki den guani ki ŋuuni fanma.

²³ Sayula leni Jonatan den bua biyaba bi miali dana kuli. Baa mi kuuma nni baa paadi leni biyaba. Bi den jaligi ki cie jiebaninba, Bi fidu den cie i yangbanli yu.

²⁴ Isalele diema bisiaba, yin yaa mua mani Sayula po, Wani yua n den yiendi yi ti tiamoanŋandi, Ki joangi yi tiadi wula ti jafandi po.

²⁵ A jakoanda yudanba n kpe bu toabu siiga maama ne te? Jonatan n kpe yi juana po maama ne te?

²⁶ N buado Jonatan, n ye leni li paboanli kelima apo, Fini n den tie n pamanli kuli, A buama npo den tie bonmoanla ki cie bi puoba yaa buama.

²⁷ A jakoanda yudanba n kpe maama ne te? Bi toatiadi n bodi maama ne te?