2 Pieri 1 - Gourmanchéma Bible

I fuondi

¹ Mini Simono Pieli, Jesu Kilisiti naacemo leni o tondo, n diani li tili yipo, yinba yaaba n taa leni ti ki baa yaa *dandanli n tie bonmoanla, kelima ti Tienu leni Jesu Kilisiti ti Candaano *teginma po.

² Li *ŋanbili leni mi yanduanma n yaa pugidi yipo boncianla, kelima U Tienu leni ti Diedo Jesu yaa bandimoanma po.

U Tienu yiinu leni o gandima

³ U Tienu yaa paaciamu po, o den puni ti li bonla kuli yaala n baa todi ti li miali nni leni U Tienu tuoma nni, ki teni ke ti bandi wani yua n den yini ti o kpiagidi leni o ŋanbili po.

⁴ Li tie lani yaa po ke o puni ti wan den niani yaa ñoanianciami yi n tie bonbuadimoanla, ke yin tua yaaba n pia U Tienu tagu kelima yini yaa po, ki faabi leni mi yanbuabiadima n cuani yaa *joagindi ŋanduna nni.

⁵ Kelima lankuli yaa po yin moandi mani bonŋanla ki yaa pugidi yi dandanli po u tagiŋamu, ki go yaa pugidi u tagiŋamu po mi bandima,

⁶ ki go yaa pugidi mi bandima po li yukubili, ki go yaa pugidi li yukubili po li juunli, ki go yaa pugidi li juunli po U Tienu tuoma,

⁷ ki go yaa pugidi U Tienu tuoma po mi kpiilibuama, ki go pugidi mi kpiilibuama yeni po mi buamoanma.

⁸ Kelima laa bonŋanla yaa ye yi niinni ki pugidipugidi, li baa teni yin yaa tuuni, ki go teni yin yaa kpedi ti Diedo Jesu Kilisiti yaa bandima nni ki pugidi.

⁹ Ama yua n kaa pia la, o tie juamo, ki sundi ke U Tienu ñani opo wan den tieni yaa *tuonbiadi hali yogu ki ŋanbi o.

¹⁰ Lani yaa po n kpiiba, yin moandi mani ki cie mi kpiama, ki teni U Tienu n yini yi ki gandi yi maama n yaa se ki pa bonŋanla. Kelima yi yaa tiendi yeni yi kan tudi ki baa hali abada.

¹¹ Yeni, yi baa baa U Tienu n luodi ki yaani yipo ti Diedo leni ti Candaano Jesu Kilisiti diema yaama n kan pendi hali abada yaa niinni.

¹² Li tie lani yaa po ke n baa tiadi yi laa bonla yogunu kuli baa ke yi bani la, ki go se ke li pa yin baa yaa moamoani bangima nni.

¹³ N sua ke li pundi min tigini yi leni laa tiadima hali ke n da ye li naa gbandieli nni, lani n tie n gbanandi,

¹⁴ kelima n bani ke n baa ña n gbandieli yeni niinni ke li kan go waagi, nani ti Diedo Jesu Kilisiti n den doagidi npo maama.

¹⁵ N go baa tieni ania ki teni ke n yaa ti ye, yi baa fidi ki yaa tiani laa bonla po yogunu kuli.

Yaaba n den laa Kilisiti kpiagidi

¹⁶ Tin den waani yi ti Diedo Jesu Kilisiti goacuama leni o paalu maama, tii den ŋua bi niba n bungi ki ñani yaa telimi leni bi nunfanbu ka. Ama ti den laa o bali kpiagidi leni ti nunceli.

¹⁷ O den baa ti jigidi leni ti kpiagidi U Tienu yua n tie Baa yaa kani. Li tie yaa yogunu ke u nialu den ñani U Tienu bali kpiagidi nni ki yedi: «One n tie n *Bijabuadiga, n pali n mani yua yaa po hali boncianla.»

¹⁸ Ti den gbadi u nialu yeni tiba ke u maadi tanpoli po tin den ye leni o yaa juali n gagidi ki ŋani yuli po yaa yogunu yo.

¹⁹ Lanwani ti dugi ke bi sawalipuaba maama tie moamoani cain. Li pundi yin fangi laa maama bonŋanla, kelima mi tie nani yaa fidisanga n yieni yaa kaanu n biigi niinni yeni hali lan baa fandi, mi yenma n yendi, ke ki tiŋaŋmabiga mo n pudi yi pala nni.

²⁰ Yaala n tugi li yuli tie line, yin bandi ke oba kan fidi ki bundi baa mayenma yaa sawali maama n ye i Diani nni o yuli po,

²¹ kelima sawali maamaba kuli ki den tieni o nisaalo yanbuama po. Ama o U Tienu Fuoma Yua n den tudi ba ke bi maadi U Tienu n yedi yaala.