2 Jan 1 - Gourmanchéma Bible

I fuondi

¹ Mini o nikpelo n diani li tili fini Cannaa po, U Tienu n gandi yua, leni a bila kuli po, min bua yinba yaaba leni i moamoani. Laa tie mini bebe ka bua yi, yaaba n bani i moamoani kuli bua yi.

² Ti bua yi kelima i moamoani yaa po, yi n ye ti niinni ki go baa ye leni ti hali yaa yogunu kuli.

³ U Tienu yua n tie Baa leni Jesu Kilisiti yua n tie Baa bijua n pa ti li *ŋanbili ki yaa gba tipo mi niñima, ki go yaa puuni ti mi yanduanma, i moamoani nni leni mi buama nni.

I moamoani leni mi buama

⁴ N pali den mangi boncianla min den laa ke a bila siiga bi tianba cuoni i moamoani nni nani Baa n bili tipo li *bali maama maama.

⁵ Lanwani moala, Cannaa, min mia ŋa yaala tie line: Tin yaa bua tiyaba. Min diani apo yaama yeni naa tie balimapanma ka, ama li tie tin den pia yaama hali mi cilima.

⁶ Mi buama yeni tie tin yaa cuoni nani U Tienu balimaama n bili maama. Lani n tie yin baa ŋua yaa balimaama tiladi nani yin den bandi maama hali mi cilima.

⁷ Kelima mi tulinma danba boncianla cua ki yayadi ŋanduna nni, yaaba n naa tuo ke Jesu Kilisiti den cua ki tua nisaalo. Laa nibuolu n tie mi tulinma daano leni *Kilisiti-yieka.

⁸ Fangi mani yi yula ke ti tuonli bonluonkaala n da bodi, ama ke yin baa yi panpaani kuli.

⁹ Yua n suagi liiga ki naa ye Kilisiti yaa bangima nni kuli, waa pia U Tienu. Ama yua n se mi bangima yeni niinni, wani n pia Baa leni Bijua kuli.

¹⁰ O nilo yaa cua yikani ki naa kubi laa bangima, yin da ga o cangu, ki da yedi o: «Biala biala.»

¹¹ Kelima yua n yedi o: «Biala biala,» taani leni o o tuonbiada nni.

¹² N go pia mi maama boncianla ki bua ki diani yipo. Die mii bua ki diani leni mi tidianñima li tili nni ka. Ama n sugini ke n baa cua yikani tin le tiyaba ki boe, ke ti pamanli n dagidi cain.

¹³ A kpiilo, U Tienu n gandi yaa pua yaa bila fuondi a.