1 Timote 1 - Gourmanchéma Bible

I fuondi

¹ Mini Polo, n tie Jesu Kilisiti tondo kelima U Tienu ti Candaano yaa ñoabonli po, leni Jesu Kilisiti yua n tie ti suginma yaa po.

² N diani apo li tili, fini Timote, yua n tie n bimoanga li*dandanli nni. U Tienu yua n tie Baa leni ti Diedo Jesu Kilisiti yaa *ŋanbili leni o niñingbadima leni o yanduanma n yaa ye leni a.

Polo waani Timote n fangi o yuli leni mi bangifaama

³ N bua ki tiadi a min den puogi a yaala min den baa fii ki gedi Maseduana diema yaa yogunu, ke ŋan yaa ye Efesa ki tundi bi nitianba ke ban da bangi bangitoama.

⁴ Ŋan go yie bipo ke ban da pa bi yula i telimi togida, leni bi yaajanba togida ya n kaa pia gbenma nni. Kelima laa bonla kuli fiindi mi niama ki naa todi ke U Tienu tuonli suagi liiga li dandanli nni.

⁵ Laa tundi n baa cuani yaala tie yaa buama n ña yaa pali n pieni niinni, leni yaa pali siedi n ŋani, leni li dandanmoanli.

⁶ Bi nitianba lebidi ki ŋa laa bonla, ki yaadi ki ŋua mi mafanma.

⁷ Bi bua ki yaa tie li *bali maama bangikacianba, ama baa bani ban maadi yaala leni ban bangi yaala leni li papaali yeni n bua ki yedi yaala.

⁸ To, ti bani ke U Tienu *balimaama ŋani, li yaa tie ke o nilo ŋua ma nani lan bili maama.

⁹ Ti go bani ke baa bili li balimaama yeni o niteginka po, ama bi bili ma bi nibiadiba leni yaaba n yie li bali leni U Tienu yiekaaba leni ti *tuonbiadi danba po, leni yaaba n kaa ŋua U Tienu sanu kaa fangi o mo yaa po, leni yaaba n ku bi baanba leni bi naanba, leni nikpalo kuli po,

¹⁰ leni mi conconma danba leni yaa jaba n taagi leni biyaba po, leni yaaba n kuadi bi niba, leni bi tuofaadanba leni yaaba n tiendi mi siedifaama po, leni yaala n nia leni bangiŋanma po kuli.

¹¹ Laa bangiŋanma ŋua o Laabaaliŋamo, U Tienu yua n pundi ki yaa baadi ti kpiagidi ki go pia mi yemanmoanma n piani nni yua.

Polo tuondi U Tienu o niñingbadima po

¹² N tuondi ti Diedo Jesu Kilisiti yua n puni nni u paalu, ki sua ke n tie nidugika ke o kuani nni o tuonli nni,

¹³ mini yua n den kpa sugidi o, ki wangi o fala, ki tiendi o yaala n bia. O den gbadi npo mi niñima kelima n den tiendi yeni n yanpiima po leni n dandanluoma po.

¹⁴ Ti Diedo den ŋanbi npo hali ke li kandi, ki puni nni yaa dandanli leni yaa buama n ñani Jesu Kilisiti kani.

¹⁵ Yaa maama n tie na tie mi madugikaama, ki pundi ke bi niba n ga ma cain ke Jesu Kilisiti den cua ŋanduna nni ki baa tindi ti tuonbiadi danba. Bi siiga nni mini n cie.

¹⁶ Ama o den gbadi npo mi niñima line yaa po: Jesu Kilisiti cili ki doagidi o juunli mini yaa kani, ke min tua li bontogidikaala yaaba n baa daani o ki baa yaa miali n kan gbeni kuli yaa po.

¹⁷ U Tienu, yua n tie o Badiciamo hali yaa yogunu kuli kaa pia kuuma, tin ki nua yua, wani yua bebe n tie U Tienu n yaa baadi ti jigidi leni ti kpiagidi yaa yogu n tu yaa yogu. Amina.

¹⁸ N biga Timote, n teni a yaa ñoabonli n tie na, nani ban den kpa pua apo yaa sawali ki yedi maama lani n tie ŋan yaa koani li dandanli koanŋanli,

¹⁹ ki yaa kubi li dandanli leni yaa pali siedi n ŋani. Bi nitianba den ŋa laa bonla ke bi dandanli bodi.

²⁰ Imene leni Alesanda tie laa niba siiga yaaba. N den teni ba Sutaani, ke lan bangi ba ban da go sugidi U Tienu.