1 Samueli 20 - Gourmanchéma Bible

¹ Dafidi den fii Najoti ki kuu leni Lama ki sani ki goa ki cua Jonatan kani ki yedi o: «N tieni be? N tagili tie be? N tudi a baa po be ke o lingi ki bua ki kpa nni.»

² Jonatan den goa ki yedi o: «Li kan tua yeni, a kan kpe. N baa kan tieni bonliba, li yaa yaba leni li yaa wa kuli, ki kan waani nni. Be n baa teni wan wuoni nni laa bonla? Laa tie yeni.»

³ Dafidi den poli ki yedi: «Hali U Tienu po, li tie yeni. A baa bani ke a pali mani npo ke o jagi o yama nni ki yedi: ‹Jonatan n da bandi laa bonla ke lan da biidi o pali?› Ama i moamoani hali Li Miali Diedo po leni a yaa po kuli, mini leni mi kuuma ki foagi.»

⁴ Lani Jonatan den yedi Dafidi: «N baa tieni apo ŋan bua yaala kuli.»

⁵ Dafidi den goa ki yedi o: «Saala tie o ŋmapaano*jaanma, n bi baa kali ki je leni o bado, ama ŋan cedi min gedi ki wuoni u kuanu nni hali li dataali daali ku yenjuogu.

⁶ A baa yaa tiadi ki buali npo, ŋan yedi o: ‹O den mia nni ke min cedi wan sani ki gedi o dogu Betelema, kelima o deni yaaba pia ban maani ki padi yaa padili binli kuli likani.›

⁷ A baa yaa yedi: ‹To, li ŋani›, lanwani mini a naacemo kan go yaa jie liba. Ama o yaa fiini o pali, ŋan bandi ke o kubi yaala n bia o pali nni.

⁸ Ŋan doagidi mini a naacemo po a buama, kelima a kuani o*ŋantaado leni mini a naacemo Li Miali Diedo nintuali. I tagili yaa ye n kani mo, ŋan kpa nni fini aba. Kelima be yaa po ke a baa gedini nni a baa po wan kpa nni?»

⁹ Jonatan den yedi o: «Ŋan da kuani a yama nni ke n kan waani a. N yaa bandi ke n baa kubi apo mi biadima o pali nni, laa pia kuli mine, n baa waani a.»

¹⁰ Lanwani Dafidi den yedi Jonatan: «A baa yaa goa ki maadi a mi pabiendanmaama, ŋme baa waani nni?»

¹¹ Jonatan den yedi Dafidi: «Cua na tin gedi i kuani po.» Lani, bani bonba lie kuli den ñani ki gedi i kuani po.

¹² Lanwani Jonatan den yedi Dafidi: «Li Miali Diedo, Isalele yaaba Tienu tie n siedo. N baa biigi n baa saala bi wonlitunma. Li yaa tie ke o pali mani fini Dafidi po, n yaa soani nilo a kani wan waani a,

¹³ Li Miali Diedo n cuo mini Jonatan o cuonbiadu. Li yaa tie ke n baa bua ki tieni mi biadima, n baa waani a lani moko, ki cedi ŋan fii ki gedi leni laafia. Li Miali Diedo n yaa ye leni a nani wan den ye leni n baa maama.

¹⁴ N yaa baa ye leni li miali, ŋan ŋanbi npo nani Li Miali Diedo n bili maama.

¹⁵ N yaa kpe mo, ŋan da cedi a *ŋanbili n diegu po, baa Li Miali Diedo n baa bolini fini Dafidi yibalinba kuli ki tinga nni yaa yogunu.

¹⁶ Kelima mini Jonatan, n loli ku danligu leni fini Dafidi buolu. Li Miali Diedo n pa a yibalinba bi panpaanbiadi.»

¹⁷ Jonatan go den teni ke Dafidi go poli hali wan pia o po yaa buama yaa po kelima wani Jonatan den bua o nani wan bua o yuli maama yeni.

¹⁸ Lani yaa puoli Jonatan den yedi o: «Saala tie o ŋmapaano. Bi baa le ke ŋaa ye likani kelima a kalikaanu o ŋmapaano jaanjiema kani baa yaa tie kaankuomu.

¹⁹ Li dataali daali ŋan jaligi ki gedi ŋan den wuoni naani landaali yeni. Ŋan sedi ki nagini Eseli tanciangu kani.

²⁰ N baa toa piemi taa ki teli lipo nani n jagi ki bua ki cuo liba yeni.

²¹ Lanwani n baa soani ki biga ki yedi o: ‹Gedi ki ban lingi i piemi.› N yaa yedi o: ‹I piemi ye ki goa neponba nne, guani ne ki taa yi›, lanwani ŋan guani ki cua kelima, hali Li Miali Diedo po, li baa yaa mani apo, yaala n bia naa ye a po.

²² Ama n yaa yedi ki biga: ‹I piemi ye a liiga›, lanwani ŋan fii ki yaa tiini, kelima Li Miali Diedo soani a ŋan gedi foagima.

²³ Timo n den bili yaa ŋantaado ti siiga yeni, Li Miali Diedo ye ti siiga ki tie siedi lipo hali yaa yogunu kuli.»

²⁴ Lani yaa puoli Dafidi den gedi ki ban wuoni i kuani po. O ŋmapaano n den ñani yaa daali o bado den kali ki baa je mi jaanjiema.

²⁵ O den kali yaa kalikaanu n kuu li goanli nani wan maani ki kaa maama. Jonatan den kali o nintuali, Abineli mo den kali ki bali o. Ama Dafidi yaa kaanu den tie kaankuomu.

²⁶ Sayula naa den yedi liba laa daali kelima o den nua o yama nni ke bonludikaaliba n baa teni ke o *joagini U Tienu po. O den bungi o pali nni: «Waa baa dagide.»

²⁷ Ama o ŋmapaano dalieli daali Dafidi kaanu go den tie kaankuomu. Lanwani Sayula den yedi o bijua Jonatan: «Be teni ke wonli leni dinla kuli *Isayi bijua Dafidi ki cua mi jaanjiema po?»

²⁸ Jonatan den goa ki yedi Sayula: «Dafidi den mia nni ki tigini nni ke min cedi wan gedi Betelema.

²⁹ O den yedi: ‹N mia ŋa, cedi min gedi kelima n deni yaaba pia li padili u dogu nni, n kpelo mo yini nni. Lanwani a pali yaa mani npo, ŋan cedi min gedi tontoni ki ban le n kpiiba.› Li tie lani yaa po ke waa cua fini o bado saajekaanu.»

³⁰ Lani, Sayula pali den fii Jonatan po ke o yedi o: «O poyenyiedo bijua ne, n bani ke a gandi Isayi bijua ki danli leni o, ke li baa tua fini leni a naa kuli po fe.

³¹ Isayi bijua yaa fo ki tinga nni, a kan yaa ye ki buali ŋan je bali. Lani yaa po moala ŋan soani ban ban lingi o ki cuani o npo, kelima li pundi wan kpe.»

³² Jonatan den goa ki yedi o baa Sayula: «Be yaa po ke o baa kpe? O tieni be?»

³³ Sayula den yoagini o kpaanli ke o baa muu o. Lani Jonatan den bandi ke o baa bili ke o li baa kpa Dafidi.

³⁴ Lanwani Jonatan pali den beni ke o den fii ki ñani u saajekaanu kani waa go den taani leni ba ki dini liba o ŋmapaano dalieli jaanjiema kani, kelima o pali den biidi kelima o baa den fiagi Dafidi.

³⁵ Laa daali yaa fiifaama ku tiŋaagu, Jonatan den gedi i kuani po, wani leni Dafidi n den bili yaa kaanu, ke ki biga yegi leni o.

³⁶ O den yedi ki biga yeni: «Sani ki ban taa min baa toa yaa piemi.» Ki biga n den tiini yaa yogunu, Jonatan den toani u piemu ke u gedi o liiga.

³⁷ Ki biga n den nagini u piemu yeni kani, Jonatan den tiani opo ki yedi: «Naani u piemu ki ye a liiga ka?

³⁸ Jaligi tontoni, da sedi.» Lanwani ki biga den taa u piemu ki guani o canbaa kani.

³⁹ O naa den bani liba kuli lienni. Jonatan leni Dafidi bebe n den bani lan tie yaala.

⁴⁰ Lanwani Jonatan den teni ki biga o luoli leni o dabanli ki yedi o: «Taa ki gedini u dogu po.»

⁴¹ Ki biga n den gedi, Dafidi den wuodi ganu po ki cua ki gbaani ki pugi Jonatan taalima taa. Bi den gobini biyaba leni mi buama ke bikuli den buudi. Dafidi den buudi hali boncianla.

⁴² Lanwani Jonatan den yedi Dafidi: «Ŋan gedi leni mi yanduanma kelima ti poli ki niani tiyaba ki taa Li Miali Diedo yeli ki yedi ke wani Li Miali Diedo baa yaa ye mini leni fini siiga ki tie siedi ki go yaa ye n yaabila leni a yaa yaabila siiga ki tie siedi hali yaa yogunu kuli.»