1 Samueli 1 - Gourmanchéma Bible

Elikana pua Ana maama fuuli

¹ O ja den ye ki tie Lamatayi-Tisofimi yua. Laa dogu den ye Efilayima juana nni. O ja yeni den yi Elikana ki tie Yufilata buolu yua. O den tie Jeloami yaa bijua, Jeloami mo den tie Elihu bijua. Elihu mo den tie Tohu bijua, Tohu mo n yaa tie Tisufi yaa bijua.

² Elikana yeni den pia puoba lie. O yendo den yi Ana, o lielo mo Penina. Penina den pia a bila, ama Ana wani ki den pia biga.

³ Binli kuli Elikana den yen fii o dogu nni ki gedi Silo dogu ki ban kpiagi Li Miali Diedo, U Paaciamu Daano, ki padi opo a pada. Eli bijaliediba Ofini leni Finea den ye likani ki tie Li Miali Diedo kopadicianba.

⁴ Elikana yaa den padi o padili yaa daali kuli, o den yen teni o pua Penina leni wan pia opo yaa bonjala leni yaa bonpola kuli bi biinu.

⁵ Ama o den yen teni Ana wani biyaba n ga maama taalima lie kelima o den bua Ana boncianla baa ke Li Miali Diedo den teni ke o tie ŋoaliga.

⁶ Ana polielo Penina den yen ñuadi o ki teni ke o pali fiidi opo, kelima Li Miali Diedo n teni ke o tie ŋoaliga yeni yaa po.

⁷ Li den tie yeni binli kuli Ana yaa den gedi Li Miali Diedo diegu po yaama kuli, Penina den yen ñuadi o yeni. Lanwani binyenli, Ana n den buudi ki yie ke o kan je,

⁸ o calo Elikana den buali o: «Ana, be yaa po ke a buudi, kaa go bua ki je mo? Be yaa po ke a pali biidi? Nani mii cie apo bonjala piiga?»

⁹ Ban den dini ki go ñuni Silo dogu nni, Ana den fii ki gedi Li Miali Diedo diegu buliñoabu kani. O kopadiciamo Eli den kaa li bonkalikaala po ki kuu Li Miali Diedo diegu buliñoakpianu daadi dayengu kani.

¹⁰ Ana pali den biidi boncianla. O den jaandi ki mia Li Miali Diedo ki buudi.

¹¹ O den niani li nianli ki yedi: «Li Miali Diedo U Paaciamu Kuli Daano, a yaa tuo ki diidi mini a yonbo fala, a yaa tiadi kaa sundi npo, a yaa puni mini a yonbo bonjaga, n baa goa ki pa o fini Li Miali Diedo hali o miali dana kuli. Pengu kan maani o yuli po.»

¹² Wan den waagi ki jaandi, Eli den diidi o ñoabu.

¹³ O den sua ke o ñoacuuna yegibi, ama waa den gba o nialu kelima o den jaandi o pali nni. Lani yaa po Eli den tama ke o ñuni ki gaadi

¹⁴ ke o yedi o: «Mi daama baa yaa kubi a ki pundi hali u laa yogune? Teni a daama n kagidi apo.»

¹⁵ Ana den goa ki yedi: «A-a, n daano, mii ñuni ka. N tie ti yanyagidi n kubi yaa pua. N cua ki doagidi ki waani Li Miali Diedo n payianu.

¹⁶ Ŋan da nuali mini a bisalo nani n tie yaa pua n bia ka, kelima li tie n yanyagiciandi leni n paboancianli yaa po n teni ke n baa maadi hali moala.»

¹⁷ Eli den goa ki yedi o: «Fii ki yaa kuni leni mi yanduanma. Isalele yaaba Tienu n pa ŋa ŋan mia o yaala.»

¹⁸ Ana den yedi: «Ŋanbi mini a bisalo po.» Li yaa puoli o den fii ki ñani likani ki ban dini. O nunga den goa ki mangi.

¹⁹ Elikana leni o pua Ana den yagidi ki gedi Li Miali Diedo diegu po ki gbaani ki kpiagi o ki lebidi ki goa ki kuni bi denpo Lama. Elikana den taani leni Ana ke Li Miali Diedo tiadi opo ki nuali ki laa opo.

Samueli madi

²⁰ Laa binli Ana den punbi ki mali bonjaga. O den yini o Samueli kelima o den yedi: «N mia o Li Miali Diedo.»

²¹ Li yaa puoli o calo Elikana den goa ki gedi Silo, wani leni o denpo yaaba kuli ki ban padi Li Miali Diedo po binli kuli padili leni wan den niani U Tienu yaa nianli.

²² Ama Ana wani ki den gedi. O den yedi o calo: «N yaa babidi ki biga n baa gedini o wan ban sedi Li Miali Diedo nintuali ki di yaa ye lankani hali yaa yogunu kuli.»

²³ O calo Elikana den yedi o: «Tieni ŋan sua maama, guudi hali a yaa babidi o. Li Miali Diedo n kuani o ñoabonli be.» Lanwani Ana den sedi deni ki ŋaandi o biga hali wan ban babidi o.

²⁴ Wan den babidi o, o den taa o ke bi gedi Silo. O den taa naatona taa leni mi yoma baabuogu leni mi daama dayuagu. O den ban kuani o Li Miali Diedo diegu nni baa ke o da tie bonwaaga.

²⁵ Bi den kodi a naatona ki gedini ki biga Eli kani.

²⁶ Ana den yedi: «N daano, i moamoani, n tie yaa pua n den sedi ne a nintuali ki miadi Li Miali Diedo.

²⁷ N den jaandi ki miadi ki naa bige. U Tienu mo tuo ki puni nni min den mia o yaala.

²⁸ Lani yaa po n bua ki pa o Li Miali Diedo. O miali dana kuli o baa yaa ye Li Miali Diedo po.» Lani bi den labini ki kpiagi Li Miali Diedo likani.