1 Pieri 1 - Gourmanchéma Bible

I fuondi

¹ Mini Pieli, Jesu Kilisiti tondo, n diani li tili yinba U Tienu n gandi yaaba ke bi yayadi ki ye ku cangu Ponta, Galati, Kapadosi, Asi leni Bitini diema kuli nni.

² U Tienu yua n tie Baa den gandi yi nani wan den tuodi ki bani ki jagi maama, ki teni ke o Fuoma gagidi yi ke yin yaa tuodi ki tiendi Jesu Kilisiti n yedi yaala, ke o soama mo n mii ki ŋanbi yi. Li *ŋanbili leni mi yanduanma n yaa pugidi yipo boncianla.

Yaa suginma n fo

³ U Tienu ti Diedo Jesu Kilisiti yaa Baa n baa ti pagidi! O niñingbadicianma po teni ke ti pia li miapanli, leni yaa suginma n fo kelima Jesu Kilisiti fiima bi tinkpiba siiga yaa po.

⁴ Ti gu U Tienu n bili tipo yaa ŋalimani tanpoli po, yi n kan bodi ki kan *joagini, ke yi ŋamu mo kan yindi.

⁵ O bili la yinba yaa po, wani U Tienu paaciamu n kubi yaaba kelima li *dandanli po, yaa *tindima n baa yuandi ki doagidi mi juodima yogunu po.

⁶ Lanwani mangi mani yi pala boncianla, baa li yaa tie tiladi ke moala po biigima buoli boncianla teni ke yi ye leni li pabiidili u yogunu waamu po.

⁷ Laa bonla cua ki baa doagidi yi dandanli n moani maama. Wula, baa ke o tie bonmoanla, baa fidi ki biidi, ama bi yen biigi o leni mi fantama. Li tie yenma leni yi dandanli, yaala n tie bonmoanla ki cie wula ban baa biigi yaali ki bandi lin moani maama, ke yin baa ti pagidi leni ti kpiagidi leni ti jigidi Jesu Kilisiti n baa doagidi yaa yogunu.

⁸ Baa ke yi daa laa o, yi bua o. Baa ke moala yii nua o, yi daani o, ki pia yaa pamancianli n pia ti kpiagidi, ki pendi bu ñoabu yedima,

⁹ kelima yi baa yi dandanli panpaani, lani n tie yi tindima.

¹⁰ Bi sawalipuaba yaaba n den pua sawali U Tienu n den bili yipo yaa ŋanbili po, den lingi ki buali ki bua ki bandi laa tindima maama fuuli.

¹¹ Kilisiti Fuoma yaama n den ye bi niinni den tuodi ki waani ba Kilisiti n baa le yaa fala leni wan baa yuandi ki baa yaa kpiagidi. Bi den moandi ki bua ki bandi lankuli n baa tieni yaa yogunu leni li yogunu n baa tie maama.

¹² U Tienu den doagidi ki waani ba ke ban soagindi yaa maama yeni ki tie bani biba po ka, li tie yinba yaa po. Moala yi gbadi laa bonla maama yaaba n wangi yi o Laabaaliŋamo kani. Bi den baa o U Tienu Fuoma Yua paalu, U Tienu n soani yua ke o ñani tanpoli po ki cua ŋanduna nni, ki wangi yi la. Baa malekinba bua hali boncianla ki diegi ki bandi laa bonla n tie yaala.

Tin yaa gagidi mani ti yula U Tienu po

¹³ Lani yaa po yin bogini, yi yantiana mo n yaa se kaanyendu, ki bili yi suginma yin baa baa yaa ŋanbili nni Jesu Kilisiti n baa doagidi yaa yogunu.

¹⁴ Yin yaa tie yaa bila n tuodi ki tiendi U Tienu n yedi yaala, ki da go ŋua yin den kpa pia yaa bonbuaka-biadila, yi yama n den pii yaa yogunu.

¹⁵ Ama, nani yua n yini yi n gagidi ki ŋani maama, yi mo n gagidi ki yaa ŋani yeni yi tagi kuli nni.

¹⁶ Kelima li diani ki yedi: «Yin gagidi ki yaa ŋani, kelima mini n gagidi ki ŋani.»

¹⁷ Li yaa tie ke yi miadi U Tienu ki go yini o yi Baa, wani yua n ja nilo kuli ti buudi nani o tuona n tie maama, ki naa tiendi gagidima bi niba siiga, lani yaa po yin yaa ye mani leni li fangili o nintuali yin ye ŋanduna nni ki tie canba yaa yogunu bianu kuli.

¹⁸ Kelima yi bani ke U Tienu ki den taa yaa bonla n baa bodi nani ŋanjilifa leni wula yeni ka, ki da ki faabi yi leni yaa yema n tie fanma fanma, yin den baa yaama yi yaajanba kani.

¹⁹ Ama, o den da ki faabi yi leni Kilisiti yaa soama, yaama n pia mayuli hali boncianla ki tie nani ban padi yaa pebiga n ki pia poadoba kuli yaama maama yeni.

²⁰ U Tienu den tuodi ki gandi wani Kilisiti lankuli po hali ke ŋanduna daa tagi, ki doagidi o ŋanduna juodima yogunu yinba yaa po.

²¹ Li tie kelima wani Kilisiti yaa po ke yi daani U Tienu wani yua n den fiini o bi tinkpiba siiga ki puni o ti kpiagidi, ke yin yaa pia li dandanli leni mi suginma wani U Tienu po.

²² Moala yi ŋanbi yi yula leni yin ŋua i moamoani ke yin fidi ki yaa pia yaa buama n kaa pia tuonanma yi kpiiba po. Lanwani yin yaa bua mani yiyaba hali boncianla leni yi pala kuli.

²³ Lani yaa po yi pia li miapanli. Yii pia li ke li ŋua leni yaa bonbuoli n baa bedi ka. Ama leni yaali n kan bedi. Lan tie U Tienu maama yaama n fo ki baa ye hali yaa yogunu kuli po.

²⁴ Kelima li diani: «Bi nisaaliba kuli tie nani ti muadi yeni, Bi kpiagidi kuli moko tie nani ti muadi puuma yeni. Ti muadi kuodi ke ti puuma mo suodi,

²⁵ Ama o Diedo maama baa ye hali yaa yogunu kuli.» Laa maama tie ban den wangi yi yaa Laabaaliŋamo.