1 Jan 1 - Gourmanchéma Bible

Li miali yaa maama

¹ Ti diani ki wangi yi li miali maama, Yaama n den ye hali mi cilima, Tin den gbadi, ki laa yaala leni ti nuni, Ki diidi ki go sii yaala leni ti nii.

² Li miali yeni den doagidi ke ti laa li. Ti tiendi lipo siedi ki wangi yi yaa miali n kan gbeni, Yaali n den ye Baa kani, wan den doagidi tipo yaali yeni.

³ Tin laa ki go gbadi yaala, ti wangi lane Ki bua yi mo n yaa pia yanyenma leni ti, Nani tin pia yaa yanyenma leni Baa leni o Bijua Jesu Kilisiti maama yeni.

⁴ Ti diani yipo yaala n tie na ke ti pamanli n dagidi cain.

U Tienu tie mi yenma

⁵ Tin den gbadi yaa maama o kani ki wangi yi tie Ke U Tienu tie mi yenma. Li *biigili naa ye o niinni baa waamu.

⁶ Ti yaa tua ke ti pia yanyenma leni o, ki nan ye li biigili nni, Ti pua faama, tii ŋua i moamoani.

⁷ Ama ti yaa ye mi yenma nni nani U Tienu wani oba n ye mi yenma nni maama, Ti pia yanyenma leni tiyaba, O Bijua Jesu yaa soama mo baa ŋuudi ti pala Ki ñandi tipo ti *tuonbiadi kuli cain.

⁸ Ti yaa tua ke tii pia tuonbiadi, ti boandi ti yula, I moamoani ki ye ti niinni.

⁹ Ti yaa tuo ti yaa tuonbiadi, O tie tin fidi ki dugi yua po ki go tiegi mo. O baa pa ti sugili ti tuonbiadi po Ki go ŋuudi ki ñani tipo ti biadima kuli cain.

¹⁰ Ti yaa tua ke tii tieni tuonbiadi, Ti yedi ke U Tienu tie tuofaadaano, o maama ki ye ti niinni.