Salmo 69 - Biblia Yanowamö

¹ Amowa täbä a̦ ja bä a̦ lä lulubou wei lijamö, ei David yanö ya tä a̦ oni shimaö. Oco bä jole jamö tä a̦ amowa lä yädäle tä a̦ ji̦limamou lä culenaja, ei tä a̦ ji̦limamou cuwä mö feduwä. ¡Yai Bada wa tä! ¡Wale da bayeliblalö! Bei ya olami ja ubä fe wädöa waiquia lä cule.

² U cawäjäwä lä o̦cole jamö, ya dalou waiquia lä cule, ya mamicö lofotoobä tä cua lä mlale jamö. Ubä yai lä o̦qui wei jamö ya fa cuicunö, mau unö ya fe bao baomou.

³ Ya ö̦cöö modaaö waiquia lä cule. Ya olami jushiaö waiquia. Wale bayeliblabä, cafä Yai Bada bä lä bufiblale bä nö dabodii ja, ya mamocu shi doaaö.

⁴ No mlai ja wale nofi lä wa̦libou wejei, bä bluca fe balojowä. Bei ya feta u̦cu lä culenaja mlai, ö̦jö bä fe yai dolewä fe balojowä. Wale mö watäblaö bufi lä doblao wejei bä lofote, jole täbä a̦nö wale waicaö bufi lä doblao wejei bä lä cui. Ya tä däanomi ja, ¿wedinaja ya tä nowa li co̦amaö cuobä?

⁵ ¡Yai Bada wa tä! Ya bufi shominajaaö si lä ijejei wa tä daö. Ya doblono lä mlai, cafä lija tä jitäami.

⁶ ¡Yai Bada wa Bada lofote lä ayai! Wale da bayeliblalö, camiyä ya lä cuaaö wei tänö, wa nofi lä mölabou wejei bä lä cui bä möfe quilili boo mlaobä. ¡Isaeli ebä lija, Yai Bada wa tä lä bufiblamole! Wale da bayeliblalö, camiyä ya lä cuaaö wei tänö, afä wa lä bufiblaö wejei bä dobloimi jimamou mö feduo mlaobä.