Proverbios 8 - Biblia Yanowamö

Bufi Jaducäwä tänö täbä lä nacaö wei tä a̦

¹ Bufi Jaducäwä tä lä cui a wa̦ i̦cali faö. Bufi Dao tä lä cui a wa̦ nacläaö.

² Tä ulufi lä ösöblai jamö a läo, bä lä fublaaö wei jamö.

³ Ala nacö jamö yocabä lä joleblai jamö a ublao, shabono a mashi jamö. Bä lä fablaaö wei jamö a wa̦ nacli faö. Bufi Jaducäwä tä lä cui, abenaja a cuu.

⁴ —Cafä wamacö bluca lija ya wa̦ i̦cali faö lä cule, bluca wamacö lä bälöblai wamacö lija.

⁵ Wamacö bufi jaducäa lä mlai, bä bufi daa fe da yadiicu. Wamacö bufi jaducäwämi nö lä beblalobe, bä yömöca da daicu.

⁶ Wamale a̦ da ji̦lilä. Tä a̦ lä doblao wei ya tä a̦ nia malä wäyäö wei. Camiyä ya wa̦ faö däjä, bejedi tä a̦ nia yai ji̦lio.

⁷ Camiyä ya wa̦ faö ja, bejedi tä a̦ lä cui, ya tä a̦ shi̦lo nia malä taö wei. Jolemou ya tä a̦ nofi bluca wa̦libou.

⁸ ’Camiyä Bufi Jaducäwä ya lä cui, showadi ya wa̦ bejedi. Ya bä joleblabä ya wa̦mi. Ya bä yacläjamabä mlai.

⁹ Bä bufi lä dao wei bä lä cuinö wale a̦ nia cadidiwä dablaöje. Bä bufi lä damamou wei bä lä cuinö wale a̦ nia bejedi dablaöje.

¹⁰ ’Blada wama bä nofi yaibobä mlai, camiyä lija wamacö damamobä, tä a̦ nofi yai da yaiboje. Olo bä yai lä dodijidai mlai, wamacö bufi damamobä tä a̦ shi̦lo da yailöje.

¹¹ Maa mabä baushi wai lä tabolajei mabä nowa ma bluca wei ma cui, camiyä Bufi Jaducäwä ya lä cui, ya nowa shi̦lo yai bluca dodijiwä malä cui. Wama täbä bufijabä täbä ma bluca wei ma cui, camiyä Bufi Jaducäwä ya lä cui, wamale nofi shi̦lo da blucabo.

¹² ’Bufi Jaducäwä tä lä cui, camiyä ö̦jö lä ya. Bufi Dao tä lä cui sho yafäcö cua lä cule. Täbä damamobä ya läa, täbä bufi ca̦i walalaobä.

¹³ ’Jeobaa a nö quili lä taö wejei bä lä cuinö tä nofi wa̦lidiwä wa̦libouje. Camiyä Bufi Jaducäwä ya lä cuinö, bä dodijidawä lä jimöo wei ya tä nofi wa̦libou, “Camiyä cä yai”, bä lä cuu wei. Bä nofi lä jushuaö wei ya tä nofi ca̦i wa̦libou, bä lä jolemou wei tä ca̦i.

¹⁴ ’Bufi moyawe ya bä yai taamaö. Bä cuaaö lä bädao wei jamö bä dodijabä, camiyänö ya etä jibäaö. Ya bä bufi jaducämabou dao. Ya bä lofotomabou dao.

¹⁵ Bada bä lä bälöblai, camiyänö ya bä bayelibou cudeenö bä nosiemou. Bada bä lä cublai bä a̦ faö cadidiobä, ya bä a̦ bayeliblaö.

¹⁶ Täbä ca̦i lä culajei, camiyänö ya bä lämabou. Bita jamö bä lä nosiemou wei bä lä cui, ya bä bada tabou.

¹⁷ ’Camiyä Bufi Jaducäwä ya lä cuinö, wale lä nofimaö wejei ya bä nofimaö mö feduo. Wale lä dayäadii wejei bä lija ya nia dablamou.

¹⁸ Camiyänö ya bä nö madofiböblamaö dao, täbä madofi lä cudile täbä ja. Dodijidawä bä nofi tabobeje, ya tä ca̦i jibäaö dao. Ya bä doblamabou dao.

¹⁹ ’Ya tä lä jibäaö wei tä nowa bluca. Olo bä nowa ma bluca wei ma cui, bä olo yai lä dodijidai bä nowa bluca ma dodijii ma cui, camiyänö ya tä lä jibäaö wei tä nowa yai fe dolejewä showawä. Blada bä yai lä dodijidai bä nowa ma bluca wei ma cui, camiyä lija tä lä doaö wejei tä nowa shi̦lo yai bluca fe balojowä.

²⁰ ’Camiyä Bufi Jaducäwä ya lä cui, ya cadidou. Dodijidawä tä jamö ya cudia.

²¹ Wale lä nofimaö wejei ya bä nö madofiböblamaö. Täbä nowa lä bluca wei, cama bä yafibö ja, ya täbä fe lajoblaö.

Bufi Jaducäwä tä lä cui yedu jamö a jaba lä cuono wei tä a̦

²² Bufi Jaducäwä tä lä cui, abenaja a cuu. —Bufi Jaducäwä ya lä cui, Jeobaanö wale tablalema. Yedu jamö, a jaba lä ojodamono wei däjä, ai täbä tablano mlai ja, camiyä wale tablaö balölayoma. Jaba ya e cuoma.

²³ Yedu jamö, bita a jaba cumou showaono mlai ja, ya e cuo balöoma.

²⁴ Modu u o̦qui lä dodijii u cuo mlao däjä wale tablalema, mau ubä lä jojoblai jamö, ubä faö showao mlao däjä.

²⁵ Jeobaanö maa mabä bada lofotoamaö showao mlao däjä, wale tablalema, jefu bä ca̦i cua mlai ja.

²⁶ ’Bita a tablano mlai ja, nii bä döamobä tä ulufi cuo showao mlao däjä, wale tablalema, mashita jamö bä jaba coshi coshi cuo showao mlao däjä.

²⁷ Modu u bada befitämabobä, judu mösö lelea lä fedumaqueno wei däjä, ö̦jamö camiyä Bufi Jaducäwä ya lä cui, ya cuo waiquioma.

²⁸ Judu mösö jamö öjölashi bä lä tano wei däjä ma cui, modu ubä fe lajoblobä ubä lä bläshäblamaleno wei däjä ma cui, ö̦jamö ya cuo showaoma.

²⁹ Modu u fe wädöobä, tä nabä lä shimano wei däjä, camiyä ya cuoma. Bita a colo jaba lä lofotomaqueno wei däjä ca̦i.

³⁰ ’Jeobaanö camiyä Bufi Jaducäwä wale ajedemaboma, täbä madofi tablaöje däjä, täbä dodijidablaö lä daö wejei, bä ajedemabou lä cuaaö wejeinaja showawä. Camiyä Bufi Jaducäwä ya lä cui lija a bufi doblalodima. Cama lija ya bufi showadi doblaablaloma.

³¹ Bita a lä tablaleno wei a ja, ya bufi doblaloma. Yanowamö täbä lä tablaleno wei täbä ja, ya bufi ca̦i doblalou dodijioma.

³² ’Bei. Ijiluyä wamacö. Wamale a̦ da ji̦li. Wale a̦ nofi lä jaducäbou wejei bä bufi shi̦lo yai doblao.

³³ Bämacö yömölaö ja, wamale a̦ da ji̦lilä. Bä bufi da jaducäicu. Wamale a̦ waii dijä.

³⁴ Wale a̦ lä ji̦liaö wei a lä cui, a bufi shi̦lo doblalou. Iba yafi jamö yoca lä jolele ja a läa. Bä lä fablaaö wei jamö a nö dao.

³⁵ Camiyä wale yai lä dablaö wei a lä cui, a nia demi lä cudio wei tä yai dablaö malä cui. Jeobaanö a nofi fa ojodadanö a nia lä bayelibou wei tä ca̦i.

³⁶ Ö̦jö ma cui, wale dablaö lä mlai a lä cui, cama a nö nia bleaamamou. Wale nofi lä wa̦libou wejei bä bluca lä cuinö, bä nia lä nomablou wei tä yai nofimaöje. Bufi Jaducäwä tä lä cui, einaja a cuu.