Proverbios 7 - Biblia Yanowamö

¹ U̦asi. Wale a̦ nofi da jaducäbo. Cafä lija ya tä tamaö lä bufii wei tä a̦ nofi mö yai da blucabo.

² Bä nowa lä taö wei tä a̦ nofi bluca da jaducäbo, dodijidawä wa cuobä. Ya tä a̦ lä wäyäö wei tä a̦ nofi bluca da jaducäbo. Bei wa mamocu yai nowamöo lä culenaja, wa tä a̦ nowamaö cuobä.

³ Bei wa imicö ajedea lä culenaja, tä a̦ da ajedelä. Ö̦jö wa tä a̦ bufibolanö wa cuobä.

⁴ Amiyäfä wa bä nofi lä tabolenaja, bufi jaducäwä tä lä cui tä nofi yai da tabo.

⁵ Ö̦jö däjä, wa̦lo bä yabäcaö si lä ijejei a suwä lä cui lija, bufi jaducäwä tänö wa nia nowamöo. Wa bufi taamabä a wa̦ faö ma dodijiablalou wei ma cui, wa nia luluamoimi.

A fiya lä joleblaliyono wei tä a̦

⁶ Iba yafi jamö ya culanö, täca lä läle jamö ai däjä ya täbä möma. Fibä lä läblai jamö culanö ya täbä möö ja,

⁷ bä bufi jaducäa lä mlai bä lä fuu wei jamö, fiya ya bä dalalema. Ai a fiya lä cui, a bufi daonomi dodijiwä.

⁸ A fuu fa cuaafälönö, suwä a nö mayo lä bale jamö a fuu ajedoma. Ö̦jö e yafi jamö a cadidofälöbä, a baquema.

⁹ Tä mö dödöjöoma. Tä mö jaba ji̦cocaö däjä a fa funö,

¹⁰ yedu suwä a mö baamalema. Bä suwä lä dodoo wei sicö lä culenaja sicö cuwä ja, a didioma. A nia lä lulubou wei tä ja, a bufi daeoma.

¹¹ ¿Ö̦jö tawä? Bä a̦ nofi lä jushublalou wei, ö̦jö a suwä cuoma, bä wasömamou dao lä mlai. Cama bä yafibö jamö bä suwä cudio lä mlai, a cuoma.

¹² Bä lä fublaaö wei jamö a cudia balöa. Nii bä lä lulublaaö wejei jamö nomöjöwä. Bei yobä lä bablai jamö, a nö ca̦i dao.

¹³ Ö̦jö däjä, fiya a lä cui, a fa fuwälönö a öbölema. Quilijou mlai ja a möö fa shalilionö, a wa̦ suwä fama.

¹⁴ —Yalo ya bä dodobobä tä cuoma cudeenö, ya wa̦ nö lä wäono wei fei däjä ya bä dodobou cublei.

¹⁵ Ö̦jö cudeenö, bä mö nia fa baamanö, ya falayou lä cufe. Ya bufi shi jalijilanö bä nia dayäaö cuaama. ¿Ö̦jö tawä? Fei däjä bä dablaö waiquia lä cule.

¹⁶ Ya lä maqueo wei ya täcö jo̦yablaö waiquia, acadafu sibä badanö. Ejido jamö dodijidawä, shuducaje ubä lä doaö wejei ubänö, sibä bada liyäjäwä lä diyäblamou wei.

¹⁷ Fii fibä nö lä cle̦deli wei fibä möcashinö, ya täcö nö cle̦deliblamaö waiquilayoma.

¹⁸ ’Jabo, ö̦jö lä —a suwä cuma—. Bäfäcö yacao fe jalubä. Bäfäcö bufi doblalou ca̦i dodijobä.

¹⁹ Iba wa̦lo a cua malä mlai. Blajai jamö a fulayoma.

²⁰ Blada bluca bä ca̦i besi fuma yalo, a nia waloo jaöomi. Belibo a loo co̦o däjä, a waloa ja̦toquei —a cuma.

²¹ A wa̦ beshili dodijiablalodii ja, a bufi taamama. A wa̦ faö dodijiablalou fe blacäjoma.

^22-23 Ö̦jö däjä, suwä lijamö a yaua showalayoma. Baca a nia lä shäö wejei däjä, a mojodili luluamou lä culenaja showawä. Biyomö a nia lä fuwäaö wejei jamö, a mojodili loblao lä culenaja showawä. Jaya a nia lä ja̦amabou wejei jamö, a mojodili läläaö lä culenaja showawä. A fa ja̦amabojenö, a niyablaleije. Inaja showawä, a nia lä shämou wei jamö, a fiya mojodili yaua showalayofälöma.

Bä nofi fiya lä nacao wei tä a̦

²⁴ ¿Ö̦jö tawä? Ijiluyä wamacö. Wamale a̦ da ji̦lilä. Ya tä a̦ lä wäyäö wei tä a̦ da ji̦liaje.

²⁵ Ö̦jö bä suwä lä cuaaö weinaja, bä cuaaö bufi doblao dijä. Cama bä fubä jamö, bä ca̦i fuu bashio dijä.

²⁶ Inaja bä suwä lä cuaaö wei bä lä cuinö, bluca täbä wa̦lidiamaö malä waiquilajei. Bä lä nomamano wejei bä ca̦i bluca fe balojowä.

²⁷ Ö̦jö bä yafibö jamö bä lä fuu wei bä lä cui, bä lä nomaö wei bä cuobä jamö bä li fuu, cama bä nia cadidiwä lä nomaö wei jamö.