Proverbios 6 - Biblia Yanowamö

Shomi etä nowa co̦amaö läo lä wasöno wei tä a̦

¹ U̦asi. Aifänö madofi bä lä däleno wei bä nowa co̦amaimi bädawä ja, cafänö wa bä nowa co̦amabä wa wa̦ nö wäo dicoo ja, wa nö bleaaö cuquei. Abenaja tä cublou dao. Afä ai a lija bä mölaö fa mlacunö, madofi etäbä jibäaö mojije. Ö̦jö ma cui, aifänö bä nowa nö co̦amabimi ja, cafanö wa bä nowa nia jo̦wa coamaö läo ja, etäbä jibäaö fe yadioje.

² ¿Ö̦jö tawä? Inaja wa cuaaö ja, cafä wa wa̦nö wa nö bleaamamou waiquiwä. Wa wa̦ nö lä wäono wei tänö, wa nö doblobimi waiquiwä ja,

³ abenaja wa cuaabä, U̦asi. A da fujeblalu. Cafä lija bä blada nia lä nacaö wejei bä lija, wa möfe bolanö a fuu da showadaicu, wa nofi ojode tablamobä. Cafä lija tä nowa nacabeje wa waiquiwä malä cui.

⁴ Lobe, mio mlai ja, wa fuu showadaobä.

⁵ A da fucäo. A nia lä shäö wei lija, jaya a lobe lä fucäo weinaja showawä. A fuwäamou mlaobä, yalo bä lä yäö wei bä fucäo lä lobadalenaja showadawä.

Bä moji lä wasöno wei tä a̦

⁶ Wamacö lä moji wei wamacö lä cui, cowe bä ja bä bufi da möblo. Ö̦jö bä lä cuaaö wei tä ja, wamacö bufi fa daeonö, bä bufi da jaducäicu.

⁷ Cowe bä lija bada a läobä etä cuami. Bada bä lija bä nosiemamou ma mlai,

⁸ belibo shi̦i loo däjä, bä nii taöje. Bä nii lalou däjä, bä lä cule jamö bä ca̦i fuuje.

⁹ ¡Wamacö lä moji wei! ¿Ö̦jamö wamacö bälödia shi wa̦lii waiquia cule? Wamacö lä mile, ¿wedi cä däjä wamacö nia yai jocädou?

¹⁰ Showadi, moli wamacö nia jo̦wa midou balöo. Moli wamacö nia bälödou fa balölonö, wamacö bococu nia modoleo.

¹¹ Inaja wamacö cuaaö showao däjä, wamacö nö fo̦lili bleaabä, yedu afä tä nia bädou. Täbä madofibö lä lämaö wei a bädou lä culenaja showawä. A waitelimobä a madofi tabolanö, lobe täbä madofibö bluca fucäaö lä showadao weinaja showawä.

Wa̦lidiwä talewä bä lä cuaaö wei tä a̦

¹² Wa̦lidiwä talewä bä lä cui, bä yai doblou lä mlai, bä jolemou ca̦i shi̦lo fuadalou.

¹³ Bä nia lä cuaaö wei tä ja, ai bä a̦ wasööje, bä a̦ faö mlaobä. Bei mamocu ma cuinö, bei imicö ma cuinö, bä a̦ wasödaöje.

¹⁴ Bä nia lä cuaaö wei tä ja, bä bufi wa̦lidilanö bä bufi dayäablalou. Bä wa̦nomou ja showadi täbä shi jalijamadiije.

¹⁵ Ö̦jö cudeenö, cama bä nö nia quilili yedu beblalou. Bä wa̦lidio cadidiobä etä fa bädalunö, bä jalou co̦obä, etä nia cuomi.

Jeobaanö tä bluca taö nofi lä wa̦libou wei tä a̦

¹⁶ Jeobaanö ei 6 täbä nofi wa̦lidiwä wa̦libou. 7 tä ma cui, tä möö bufiomi fe balojowä.

¹⁷ Cama bä lä jimöo wei tä lä cui, tä nofi wa̦libou. Bä lä jolemou wei tä ca̦i. No mlai ja bä lä shäö wejei tä ca̦i.

¹⁸ Wa̦lidiwä tä lä dayäaö wejei tä ca̦i. Wa̦lidiwä tä jamö bä mamicö lä bälöcöblalou wei tä ca̦i.

¹⁹ Bä a̦fa jole lä wäyäö wejei tä ca̦i. Cama bä bälöa dodijidamabou lä mlai tä ca̦i. Ö̦jö tä nofi bluca wa̦lidiwä wa̦libou, Jeobaanö.

Suwä bä ja bä lä yabäcäo wei bä nofi lä nacao wei tä a̦

²⁰ U̦asi. Cafä lija faafä ya lä cuinö ya tä tamaö lä bufii wei tä a̦ nofi da jaducälä. Naafänö wa lä damaö wei tä a̦ nofi mojodubo dijä.

²¹ Ö̦jö tä a̦nö a bufi yai da baushiblamolu. Baushi bä lä jalebou wejeinaja, inaja showawä ö̦jö tä a̦nö a da liyäjäblalu.

²² Wa fuu lä bädao wei jamö ma cui, ö̦jö tä a̦nö wa nia luluamou. Wa lä mio wei jamö ma cui, ö̦jö tä a̦nö wa nia nowamöo. Wa la̦ö co̦o däjä ma cui, ö̦jö tä a̦nö wa nia yömölamou co̦o.

²³ Yafä tä a̦ lä wäyäö wei, cowa wacä lä culenaja tä a̦ malä cule, wa bufi walalaobä. Ö̦jö tä a̦nö wa bufi cadidou ja, wa lä wasömamou wei tänö, dodijidawä wa nia cudio.

²⁴ Ö̦jö däjä, wa̦lidiwä talewä a suwä lija wa nia nowamöo, wa bufi taamabä a wa̦ suwä shomi faö lä dodijiablalou wei a lä cui lija.

²⁵ Ö̦jö wa suwä liyäjäwä möö ja, a bufi daeo dijä. Wa lä mödii wei tänö a bufi taamamo dijä.

²⁶ Tä nowa malä cule. Showadi bä lä dodoo wei bä suwä lä cui bä ofäö däjä, nii bä wai bädawä ja, bä noshi ö̦jödao. Ö̦jö ma cui, shomi a suwäbö lä cuinö wa nofi lä lämaö wei, tä nowa yai cua. Wa nomaö dao.

²⁷ ¿Ö̦jö tawä? Sicö lä lucäbou wei sicönö cowa wacä ja̦loaö ja, ¿sicö nia ö̦shöömi daanö?

²⁸ Amanafu bä cadicaö ja, ¿a mamicö si nia tolojobloimi daanö?

²⁹ Inaja showawä, cama ai a suwäbö lä yabäcaö wei a lä cui, ö̦jö tä ja, cama a mayo nia wawäblaliyou.

³⁰ A lä tomömou wei a lä cui, a ofi yalo ai bä niibö lämaö ja, ¿a nofi wa̦liboimije daanö?

³¹ A fuwäaöje ja, tä nowa nia lä co̦amaö wei, etä fe nia doledamaö majöoje. Moli tä lä däleno wei ja, 7 täbä nia jibäamaö majöoje. Tä nowa lä co̦amaö wei däjä, cama e yafi jamö täbä bluca lä tabole ma cui, täbä doaö daoje.

³² ¿Ö̦jö tawä? A lä joleblalou wei a lä cui, a bufi yai daomi. Cama a cadidiwä wa̦liablamou.

³³ A shäöje däjä a nia canosio. A nö nia ca̦i waiblaöje. A dobloimi lä jimamou wei etä nia mladoimi.

³⁴ A bufi lä jalublou wei a lä cui, a nia jushudou fe malä balojoo wei. A nö yuo däjä, a lä yabäcäo wei a nofi nia asiblaimi.

³⁵ Wa tä nowa co̦amabä wa bä ma jibäö wei ma cui, wa ma dobädii wei ma cui, wa wa̦ nia oquemaimi.