Proverbios 5 - Biblia Yanowamö

Suwä bä ja bä lä wa̦liyoblou wei tä a̦

¹ U̦asi. Ya wa̦ faö lä moyawäo wei wale a̦ da ji̦lilä. Ya wa̦ bufi dao ca̦i lä faö wei tä a̦ ja, a yömöca da daicu,

² wa bufi shi̦lo yai walalaobä. Bufi jaducäwä wa wa̦ shi̦lo yai fabä.

³ Wa̦lo bä yabäcaö si lä ijejeo wejei bä suwä lä cui, bä a̦ showadi dodijiablalou malä cui. Buu ubä ja täbä icuamaö si ijejewä lä culajeinaja, cama suwä bä a̦nö täbä bufi tadamaöje. Dabö dabö si ujudidiwä ubä nia lä coaö wejei jamö täbä fuu si lä ijejeinaja, cama bä a̦ ja täbä luluamou cuwä.

⁴ Täbä nia ma dodijou wei ma cui, ya̦cumö täbä caficö yai co̦wami faö majöo. Maocoli ubänö täbä caficö lä cuaaö weinaja showawä. Sibala bänö bä nö ninili bleaaö lä cuaaö weinaja, täbä nö yai bleaaö majöo.

⁵ Ö̦jö a suwä lija täbä lä icuo wei, bä nia lä nomaö wei jamö, bä luluamou. Bä lä nomaö wei bä cuobä jamö, bä mamicö shalilou.

⁶ Ö̦jö a suwä lä cui, dodijidawä a cuobä tä jamö, a cadidoimi. A nia doblou lä mlai tä jamö, a fa mojolulufälönö, a mojodili ca̦i fuu showawä.

⁷ ¿Ö̦jö tawä? U̦asi. Wale a̦ da ji̦lilä. Ya tä a̦ lä wäyäle, tä a̦ waii dijä.

⁸ Ö̦jö a suwä lä cui lija a ajedo dijä. Cama e yafi yoca lä jolele jamö a fuu dijä,

⁹ shomi a lija wa madofibö jibäamou dicolu. A bufi asimou lä mlainö, wa nö bleaamaö dicoicu.

¹⁰ A cuaa dijä. Cafä wa nö wa̦lojoablalou tänö wa bä madofi ma lululeno wei ma cui, shomi täbänö bä madofi däaö dicoo mlaobeje. Afä wa bä madofi däabä, cafä wa ojodamou nö ma wa̦lojano wei ma cui, shomi bä yafibö jamö bä cua majöa dicoicu.

¹¹ Ya̦cumö, wa wa̦liyoblou cadidio däjä, wa fe nia lä wädödou wei jamö, wa la̦wä nö blea dicoicu.

¹² Ö̦jö däjä, abenaja wa nia cuu. —¡Shädayai! Wale cadidamaöje ja, ya bä a̦ nofi wa̦libou dicooma. Wale ma wasöno wejei ma cui, ya bä a̦ nö waiblaö dicooma.

¹³ Wale lä damano wejei, ya bä a̦ ji̦liblanomi. Wale lä yömölano wejei bä lija ya yömöca daonomi.

¹⁴ Wale nofi lä yododoano wejei däjä, ya yai lä wa̦lidiono wei, wawädowä wale dalalemaje —wa nia cuu.

¹⁵ Afä wa uca nofi yaibou lä culenaja, afä suwä a nofi yai cadidiwä da yaibo. Mau ufä yai dodijidawä caläö lä waiquile jamö, wa amishi shi̦lo yai co̦o ayaobä. ¿Ö̦jö tawä?

¹⁶ ¿Shomi bä lä cublai bä lija, maufä ubä nia liyäyamou cuaaö daanö? ¿Täbä lä fublaaö wei jamö, maufä wa ubä joyabä bei ubä?

¹⁷ Ma. Shomi wa bä ajedamaö mlai, suwäböfä a cadidiwä sho wafäcö shi̦lo yai dodijou ayaobä.

¹⁸ Wa dodijobä, ö̦jö a waiquiwä, wa fiyao däjä wa suwä lä däleno wei a ja, wa bufi shi̦lo yai doblalobä.

¹⁹ Suwäböfä a dodijidawä. A fuu liyäjäwä. Ö̦jönö wa lä nofimaö wei tä ja, a bufi shi̦lo yai da doblalo. Ö̦jö wa shi̦lo yai möö bufi doblaobä.

²⁰ U̦asi. Afä a ma mlai ma cui, ¿wedi tabä wa bufi nia li waiyou dicoo? ¿Wedi tabä suwä shomi wa nia li fa̦locaö?

²¹ Bämacö cuaaö lä bädao wei tä ma cui, Jeobaanö tä dablaö malä jödödöi. Bämacö lä cuablalou wei bämalecö daö.

²² Wa̦lidiwä talewä bä lä cui, cama bä nofi lä jushuaö wei tä blucanö bä dobloimi cadidiwä. Bä showadi lä cuablalodii wei tänö, ya̦cumö cama bä mayo wawäblou.

²³ Bä bufi nö yai jaducäblobimi ja, bä shominajablou si ijejewä. Bä ca̦i wasömamou fa mlacunö, bä nomablou.