Proverbios 4 - Biblia Yanowamö

Bä ijilubö ebä lä cadidamaö wei tä a̦

¹ Ijiluyä wamacö. Faafä yanö bämacö yömölaö ja, wamale a̦ da ji̦lilä, bufi walalawä wamacö yai cuobä.

² Cafä wamacö lija dodijidawä ya tä a̦ malä wäyäö wei. Ya tä a̦ lä wäyäö wei tä a̦ nofi mojodubo dijejä.

³ Oshe ya cuo däjä, ya yamioma cudeenö, nayänö wale nofimaö fe balojooma. Fayänö wale luluboma.

⁴ Wale damaö ja, abenaja wale nowa tama. —Bei wa bufinö wale a̦ da lofotolä. Bä nowa lä taö wei wa tä a̦ nofi jaducäbou ja, dodijidawä wa nia cudio.

⁵ Tä a̦ nofi mojodubo dijä. Bä yömölaö ja ya tä a̦ lä wäyäö wei tä a̦ joya dijä. A bufi da jaducäicu. A bufi da moyaweicu.

⁶ Bufi jaducäwä tä lä cui, tä daa dijä. Bufi jaducäwä wa tä nofimaö ja, ö̦jö tänö wa bayeliblou cuquei.

⁷ ’Wa bufi yai jaducäblobä, abenaja wa yai cuaabä. Bufi jaducäwä tä lä cui, tä nofi mö da blucabo. Madofi wa bä däaö bufii ma doblao wei ma cui, bufi moyawä tä shi̦lo yai da dälä.

⁸ ’Bufi jaducäwä tä ja, a bufi mö da blucaicu. Ö̦jö tä ja wa bufi mö blucao ja, wa wa̦fa nia doblao wäyämamou. Bufi jaducäwä tä lä cui, jai wa tä fa̦locobou wa tä tabou ja, dodijidawä wa nofi nia wawädowä tamamou.

⁹ Bufi jaducäwä tä lä cuinö wa nia shi̦lo liyäjäblou. Jai jole jole cäcönö wa bufi nia baushiblaö. Jai baushi wa yojobou wa nia tablamaö.

¹⁰ U̦asi. Wale a̦ da ji̦lilä. Bä yömölaö ja, wale a̦ da dälä, dodijidawä wa cudiobä.

¹¹ Wa bufi jaducäwä ca̦i bälöobä, bä damaö waiquioma. Wa cadidobä, bä luluboma.

¹² Wa cuaaö lä bädao wei tä ma cui ja, wa doblou cuquei. Wa ma lobaablalou wei ma cui, wa shominajaablalou mlai ja, dodijidawä wa nia cuo showao fe yadio.

¹³ Wa lä yömölaö wejei, bä a̦ da lofotolä. Tä a̦ fuje dijä. Ö̦jö tä a̦ ja, a bufi mö shi̦lo da blucaicu. Wa lä yömölamou wei tänö wa dodijidawä cudiobä tä malä cui.

¹⁴ Bä doblou lä mlai bä lija a nocaa dijä. Wa̦lidiwä talewä bä lä cuaaö weinaja, a ca̦i cuaa dijä.

¹⁵ Tä wa̦lidiwä tabeje jamö, a fu dijä. A ajedo dijä. Wa̦lidiwä etä da wailö. Afä tä yai jamö, a da cadidofälö.

¹⁶ Wa̦lidiwä tä taö showao mlaoje däjä, bä doblou lä mlai bä bufi nofi jushublao yalo bä mibloimi. Ai a nö bleaamaö showao mlaoje däjä, bä nö miobimi.

¹⁷ Täbä niibö cuami däjä, bä nö nii lä bufijabö wejeinaja, wa̦lidiwä tä malä bufijaö wejei. Nashiwä toubä lä bufijalajeinaja, waitelimou tä ca̦i malä bufijalajei.

¹⁸ Ö̦jö ma cui, bä lä dodijaö wei bä lä cui, bä bufi walalawä ca̦i bälöaö yalo, motoca shi̦i balaö lä cuaaö weinaja, bä dodijidawä balafälöö. Ya̦cumö motoca a yo̦loloblou däjä, a mömou shi dowäjäwä lä culenaja showadawä.

¹⁹ ¿Ö̦jö tawä? Bä doblou lä mlai bä lä cui, tä mö didi suble jamö bä fuu. Bä lä wäcäcamaö wei tä lä cui, tä daimije. Bä bufi dao mlalanö bä nö mojodili bleaafälöö.

²⁰ U̦asi. Camiyä lija a yömöca da daicu. Cafä lija ya tä a̦ lä wäyäö wei tä a̦ da ji̦lilä.

²¹ Tä a̦ nofi bluca da jaducälä. Tä a̦ shi̦lo da bufibo.

²² Ya tä a̦ lä wäyäö wei tä a̦ lä däaö wei a lä cui, dodijidawä a nia bälödio. Demi dodijiwä a nia cudio.

²³ Bei a bufi yai da nowamöo. Wa bufi shominajaaö mlaobä, a moyawäa da dodijiicu. Täbä bufi daeo fa balöonö, täbä cuaaö malä majöo wei.

²⁴ A jolemo dijä. Wa wa̦ wa̦lidiwä lä faö wei tä lä cui, tä da blajamalö.

²⁵ Wa nia lä cadidou wei jamö, a mamo shi̦lo da showaicu, wa mö lä yaile jamö.

²⁶ Wa nia lä cuaaö wei tä ja, a bufi da moyaweicu. Wa bufi moyawä ca̦i bälöaö däjä, wa cuaaö lä bädao wei jamö ma cui, dodijidawä wa nia cuo.

²⁷ Wa nia yai lä cadidou wei jamö, wa mamicö bao mlai ja, wa yai shalilofälöbä. Wa̦lidiwä tä jamö mamicö icudo dijä.