Proverbios 2 - Biblia Yanowamö

Bufi jaducäwä tä a̦ ja bä nia lä bayeliblamou wei tä a̦

¹ U̦asi. Wale a̦ da ji̦lilä. Ya tä tamaö lä bufii wei tä a̦ jamö, a bufi mö shi̦lo da blucaicu.

² Bufi jaducäblamodima tä a̦ ja, a yömöca da daicu. Bufi dao a da cuicu.

³ Wa moyawäobä, i̦cali a da naco. Bufi dao wa cuobä, a wa̦ da nacläa.

⁴ Blada wa bä dayäaö nö lä cuobö weinaja, bufi jaducäwä tä yai da dayäa. Täbä nowa lä bluca wei täbä jo̦yaobä jamö, ö̦jö wa täbä dayäaö nö lä cuobö weinaja showawä.

⁵ Inaja wa cuaaö däjä, Jeobaa wa nö nia quili taö. Yai Bada wa tä nia daö.

⁶ Jeobaanö täbä bufi malä jaducäblamaö wei. Cama a wa̦nö täbä bufi ca̦i damaö. Bufi dao täbä tamabou.

⁷ Bä lä cadidou wei bä doblamabou. Bä lä bejedimou wei bä nofi bäyäbou.

⁸ Bä lä dodijaö wei bä nowamaö cuaafälöö. Showadi cama ebä lija a nia läo.

⁹ Wa bufi jaducäblobä wa tä a̦ ji̦liaö ja, wa bufi nia lä cadidou wei tä ma cui, wa nia lä dodijaö wei tä ma cui, ö̦jö wa tä nia bluca dablaö. Ai wa bä nofimaö ayao mlai, dodijidawä wa bä ca̦i bluca cuobä, ö̦jö wa tä nia ca̦i daö. Wa nia dodijaö dablou.

¹⁰ Wa bufi nia malä jaducäafälöö wei. Wa bufi damamou ja, wa bufi nia yai doblao.

¹¹ Wa bufi lä cadidou wei tänö, wa bufi ca̦i lä dao wei tänö, wa nowamamou cuquei.

¹² Ö̦jö däjä, bä doblou lä mlai bä ma cui lija, bä a̦ wa̦lidiwä lä faö wei bä ma cui lija, wa nia luluamoimi,

¹³ bä dodijaö lä moji wei bä lä cui lija. Didi tä jamö cama bä li fuu.

¹⁴ Wa̦lidiwä tä taö bufi doblaoje. Tä yai lä wa̦lidii tä ja, bä bufi doblalou.

¹⁵ Bä cadidou mlai, bä yacläjou. Bä jolemou.

¹⁶ Ö̦jö däjä, wa̦lo bä yabäcaö si lä ijejei a suwä lija wa nia nowamöo. Wa bufi taamabä a wa̦ faö ma dodijiablalou wei ma cui, wa nia luluamoimi.

¹⁷ Inaja a lä cuaaö wei a suwä lä cuinö, a mocoo däjä bä fe̦yalobö a lä däleno wei a daquei. ¿Ö̦jö tawä? Yai Bada tä a̦ nö lä wäono wei tä a̦ daö ma cui, tä a̦ waii dicoo. Jai tä a̦ danomi a cublou majölayou.

¹⁸ Cama e yafi yo shadia mö lä cule jamö a wa̦lo lä fuu wei a lä cui, a nia lä nomaö wei tä jamö a yai fuu. Bä lä nomaö wei bä cuobä jamö a coyocoblobä, a fuu.

¹⁹ Ö̦jö a suwä lija a lä joleblaö wei a lä cui, dodijidawä bä nia cuo co̦daaimi. Bä nia dodijaimi majöo.

²⁰ Wa bufi jaducäblobä wa tä a̦ ji̦liaö ja, bä lä dodijaö wei wa bä nia yai owämaö. Cama bä lä cuaaö weinaja wa nia yai cuaaö mö feduo.

²¹ Bä lä cadidou wei bä lä cui, Jeobaanö tä a̦fa ulufi lä wäyäno wei jamö, bä nia malä bälödio wei. Bä lä bejedimou wei bä lä cui, ö̦jamö bä nia cudio.

²² Ö̦jö ma cui, ö̦jamö bä doblou lä mlai bä nia cudiomi, bä nia joyamou. Bä lä jolemou wei, cau cau bä nofi lä tabou wejeinaja bä nofi fa tadamamonö, bä nia ucäblamou.