Proverbios 1 - Biblia Yanowamö

Bämacö bufi nia lä jaducäo wei tä a̦

¹ David bä ijilubö Salomo e a̦ faö lä moyawäono wei, ei tä a̦, Isaeli ebä lija a bada lä läono wei a lä cui.

² Bä bufi jaducäblobä, dodijidawä bä ca̦i damamobä, ei tä a̦ li oni. Bä bufi lä dao wei bä a̦ ji̦liaö walalaobeje.

³ Bufi dao bä ca̦i cuobeje, ei tä a̦ ja bä nia damamou, bä cadidobä, bä ca̦i dodijabä. Ai täbä nofimaö ayao mlajei, dodijidawä täbä ca̦i bluca cuobeje, ei tä a̦ li.

⁴ Bä bufi jaducäa lä mlai bä bufi dao fe yadiobä, ei tä a̦. Fiya oshe bä damamobä. Bä bufi ca̦i walalaobä.

⁵ Bä bufi jaducäwä lä waiquii, ei tä a̦nö bä bufi nia balalayou. Bä bufi dao lä waiquii, ei tä a̦nö bä bufi nia shaliliablalou.

⁶ Ei tä a̦ ja bä damamou ja, tä a̦ wäyäö lä yacläaö wejei ma cui, bä bufi wedinajamou mlai ja, tä a̦ nia ji̦liaö cadidiablalouje. Täbä a̦ faö ma yacläablalou wei ma cui, tä a̦ nia doaö cadidiablalouje. Bä bufi lä dao wei bä a̦ ma cui, bä a̦ nia ji̦liaö shalilioje. Bä bufi dayäamabeje bä a̦ faö ma yacläablalou wei ma cui, tä a̦ nia ji̦liaö shalilio si ijejeo fe yadioje.

⁷ Jeobaa a nö quili lä taö wejei, bä bufi jaba jaducäaö lä cuimadi. Ö̦jö ma cui, bä bufi jaducäblou lä moji wei bä lä cui, bä yömölamou lä moji wei, ö̦jö bä lä cui, bä bufi nö jaducäblobimi waiquiwä.

Fiya bä lä yömölamou wei tä a̦

⁸ U̦asi. Faafä ya lä cuinö bä yömölaö ja, wale a̦ da ji̦lilä. Naafänö wa lä damaö wei tä a̦ wai dijä.

⁹ Dodijidawä wa cuobä, tä a̦ malä cui. Jai baushi wa yojobou, jai dobä wa cö jalebou, tä a̦ cuwä.

¹⁰ U̦asi. Bä doblou lä mlai bänö wa lulubou bufi doblaoje ja, bä nosie fua dijä.

¹¹ Abenaja bä cuu dao. —Jabo. Camiyä yamacö lija a da nocaiquiyo. Ai bäma bä shäö showadao bädaobä, bämacö da lämo. Bä mojoduo däjä bäma bä shäö da showadao.

¹² Nomawä bä didiaöje ja, bä fe bateliaöje däjä, mashita anö jai bä comi sufaö, bä dablou lä mladou weinaja, bäma bä da tabla.

¹³ Täbä nowa lä bluca wei bäma bä madofi doaö wä. Bäma bä däaö lä läablaö wei, bämacö yafibö jamö bäma bä nia bluca tabou.

¹⁴ Camiyä yamacö lija wa co̦cablou ja, blada bäma bä bluca sheleleblaö weicätä —bä cuu dao.

¹⁵ ¿Ö̦jö tawä, U̦asi? Ö̦jö bä lija wa yauo mlai. A da wasöo. Cama bä fubä jamö, a fuu fe yadio dijä.

¹⁶ Wa̦lidiwä tä jamö bä malä läläaö wei. Bä nö i̦yä bleaamabeje, bä shi malä jalimou wei. ¿Ö̦jö tawä?

¹⁷ Bä yalo lä yäö wei bä shäbeje, bä ma lämou wei ma cui, bä yalo moyawe ja bä nia shämou daomi.

¹⁸ Ö̦jö ma cui, fei bä doblou lä mlai, bä lämou bufi lä doblao wei bä lä cui, cama bä nia shämou ayao. Täbä ma shu̦lucaö wejei ma cui, cama bä nia shi̦lo nomaö ayao.

¹⁹ ¿Ö̦jö tawä? Ai täbä madofibö däaö läobeje, bä waitelimou fe lä blacäjou wei bä lä cui, cama bä shi̦lo shämou ayalayou. Täbä madofi doaö fe lä yadio wejei tä showawänö, bä nomaö.

Bufi Jaducäwä tä lä cui

²⁰ Täbä lä fuu wei jamö, Bufi Jaducäwä tä lä cui, a comöö. Nii bä showadi lä lulublaaö wejei jamö a wa̦ nacläaö.

²¹ Bä a̦ lä bashicou wei jamö ma cui, ö̦jamö a wa̦ i̦cali faö. Bada bä lä loblaaö wei jamö ma cui, ö̦jämö a wa̦ ca̦i faö mö feduo.

²² Bufi Jaducäwä tä lä cui, abenaja a cuu. —Ja̦o. Wamacö bufi jaducäo bufio lä mlai, “Dodijidawä yamacö cuo waiquiwä”, ¿wamacö bufi nia cuu shi wa̦lii daanö? Wama tä a̦ noca lä i̦cablalaö wei, ¿showadi wama tä a̦ noca nia i̦cablaladii dicoo? Wamacö bufi jaducäwämi nö lä beblalou wei, ¿wamacö bufi ca̦i jaducuwä bälöobä wama tä a̦ ji̦liaö bufiomi waiquiwä tawä?

²³ ’Bämacö lä wasöö wei wamale a̦ da ji̦lilä —a cuu—. Ya bufi lä cuu wei ya tä a̦ nia wawämaö. Cafä wamacö lija ya wa̦ nia wawädoo showadao.

²⁴ Bämacö yömölaö däjä wamale a̦ ji̦liblanomi yalo, bei ya imicönö bämacö nacaö däjä wamale a̦ fuanomi yalo,

²⁵ camiyä lija wamacö yömölamou mojioma cudeenö, wamacö ca̦i wasömamou bufionomi cudeenö,

²⁶ abenaja ya nia cuaaö. Cafä wamacö nö lä bleaaö wei däjä, bämacö noca nia i̦cablalaö mö feduo. Wamacö nö quilili lä bleaaö wei däjä, bämacö nö nia waiblaö.

²⁷ Maa yedu a bada quei lä cuaaö weinaja, quili quili tänö, yedu wamacö nö quilili nia bleaaö. Wadoli yedu a bada lofote yacolemou lä cuaaimaö weinaja, yedu wamacö nö nia quilili beblalou. Wamacö nia bayeliblamoimi. Wamacö bufi nia fo̦liblou.

²⁸ ’¿Ö̦jö tawä? —a cuu—. Camiyä Bufi Jaducäwä ya lija wamacö nö bayeli nacao ma cui, ya wa̦ nia fuomi. Wamale dayäblalaö ma cui, ya nia dabloimi.

²⁹ Wamacö bufi daobä wama tä bufino malä mlai. Jeobaa wama a nö quili tabä tä ma cuono wei ma cui, inaja wamacö bufi cunomi.

³⁰ Camiyä lija wamacö yömölamou mojioma. Bämacö wasöö ja, wamale a̦ wailema.

³¹ Ö̦jö cudeenö, cafä wamacö mayo nia wawäblaliyo. Wamacö bufi ca̦i lä cuaablalodii wei tä ja, wamacö bufi nia jushuolaliyo.

³² ’Bä bufi jaducäblou bufio lä mlai bä mö fuluo yalo, bä malä nomablou wei —a cuu—. Bä bufi jaducäwämi nö lä beblalou wei, bä mojoduo bufi doblao yalo, bä mö malä watäblamou wei.

³³ Ö̦jö ma cui, wale a̦ lä ji̦liaö wei a lä cui, bufi yanöcölanö a nia bälöo lofotoo. Tä cublou lä bädao wei tä ma cui ja, a bufi nia jalujoimi —a cuu. Einaja Bufi Jaducäwä tä lä cui a cuu.