Números 6 - Biblia Yanowamö

Jeobaa nija bä yaiamou bufi lä doblaono wei tä a̦

¹ Moisesi nija abinaja Jeobaa a cuma.

² —Isaeli ebä da yömöla. Camiyä Jeobaa ya nija bä ajedobä, bä nia lä yaio wei bä a̦ nö nia wäo. Bä a̦ nö wäo däjä, suwä bä ma cui, wa̦lo bä ma cui,

³ uba nashiwä toubä ja bä nia wasöo. Täbä shi lä wa̦limaö wei ai toubä mö feduwä ma cui ja, bä nia ca̦i wasöo. Ö̦jö ubä showawä ja, ai toubä ma tablaö wejei ma cui ja, bä nia ca̦i wasöo. Uba dude ubä ma cui, ubä nia ca̦i coaimije. Bä ma bou wei ma cui, shi̦liqui bä ma cui, bä ca̦i nia waimije.

⁴ Bä yaiobä, bä nö nia lä dedeaö wei tä jödödöwä cubloimi showao däjä, uba bä nia waimije. Bei mobä ma cui, bei sibä ma cui, bä bluca nia waimi waiquiweje.

⁵ ’Bä yaiobä bä nö nia lä dedeaö wei tä jödödöwä cubloimi showao däjä, bä feta u̦cu bäblamou mlai ja, bä fetaucu noshi nia umlao —a cuma—. Bä a̦ nö wäo ja, bä nö nia jo̦wa lä dedeaö wei tä cubloimi showao däjä, camiyä Jeobaa ya nija bä nia yaio, iba dodijidawä bä cudiobä. Bä fetaucu nia labablou.

⁶ ’Camiyä nija bä nö nia yaio lä dedeaö wei tä jödödöwä cubloimi showao däjä, nomawä a lä cule jamö bä nia ajedoimi —a cuma—.

⁷ Bä yaia cudeenö, bä nia ajedou bädaomi. Camiyä Yai Bada ya nija, bei bä fetaucu fa labalalunö, iba bä yaia malä dablamou wei. Bä nö̦ö e cadidiwä ma cui, bä fö̦ö e yai ma cui, cama mashi ai e ma cui, ö̦jö ai e lä cui e ma mladou wei ma cui, a lä nomalöfe a ja, bä nia ajedoimi, bä shamiblou mlaobä.

⁸ Camiyä nija bä nö nia yaio lä dedeaö wei tä jödödöwä cubloimi showao däjä, camiyä Jeobaa ya lä cui nija, dodijidawä bä nia cudio.

⁹ ’Iba a lä yaimolayono wei a lä cule jamö, ai a nomaö bädao ja, tä nia wa̦lidiblou —a cuma—. A nia shamiblou showadao. Jeobaa ya lä cui nija, dodijidawä a cudiobä, fetaucu noshi nia lä umlaono wei a lä cui, cama a ma cui, bei fetaucu ma cui, a nia shamiblou majöo. Fetaucu shami ja, 7 tä mö didi fa tablamalönö fe si nia cobejeblamou, a dodijidablou co̦obä tä lä cublole däjä.

¹⁰ ’Ö̦jö tä fena ja, iba yano jamö yoca lä cui jamö, yalo cäcöbö ca̦i nia juu —a cuma—. Joledo cäcöbö ma cui, wacocoa calaba cäcöbö ma cui, ö̦jamö nofi bäyäalewä nija yalo cäcöbö nia ca̦i icuo.

¹¹ Yalo cäcöbö ca̦i fa icuicunö, wa̦lidiwä etä mladobä, nofi bäyäalewänö yalo ai a nia dodobou. Ai a yalo mö feduwä lä cui, a nia ö̦shö dodobou mö feduo. ’A lä nomalöfe a ja, iba a lä yaimolayono wei a wa̦lidioma yalo, tä nowa cua ma cule, nofi bäyäalewä a nia läo —a cuma—. Ya etä nowa mladamabä tä nia taö. Ö̦jö däjä showawä, Jeobaa ya lä cui nija, dodijidawä fetaucu ca̦i cudalou co̦obä, fetaucu nia ca̦i yaio co̦o.

¹² Cama a jaba yaio däjä, a fe nia didi lä cuaano weinaja a nia cuaaö co̦o. Oweja ocalo a nia ca̦i wa̦lo juu, wa̦lidiwä etä nowa co̦amabä a nia dodobou. A lä nomalöfe a ja, a shamilaliyoma yalo, a nia jaba lä yaiono wei etä nowa cuami majöwä.

¹³ ’Camiyä nija bä lä yaio wei bä lä cui nija, ya tä nabä yai lä shömöaö wei ei ya wa̦ —a cuma—. Bä nö nia yaio lä dedeaö wei tä jödödöwä cublou däjä, iba yano jamö bä ca̦i nia juimaöje.

¹⁴ Camiyä Jeobaa wale dobäbeje bä nia yalo jöböaöje. Bä ö̦shö nia lä dodobou wejei, oweja ocalo moli bä nia wa̦lo jöbäöje, etä wai jalili yädäa lä mlai. Wa̦lidiwä etä nowa mladobä, oweja ocalo moli bä ca̦i nia suwä jöböaöje, etä wai jalili ca̦i yädäa lä mlai. Wale a̦ oquemabobeje, oweja moli bä ca̦i nia wa̦lo jöböaöje, etä wai jalili ca̦i yädäa lä mlai.

¹⁵ ’Ö̦jamö bä nia dodobou yädämou lä showadao wejei, wöö a jamö nii juluno mlai bä ca̦i nia didibouje —a cuma—. Si cobejewä ji̦bä yai lä dodijidai ji̦bä ja, dabö dabö ubä lä coyocoblamou wei bä ca̦i bada, dabö dabö ubänö nii jenasiwä bä lä ya̦lemou wei bä ca̦i wai. Lo̦shi mobä ca̦i dodobou lä yädämou wejei mobä ca̦i. Uba nashiwä toubä dodobou lä yädämou wejei toubä ca̦i.

¹⁶ ’Camiyä nijamö, nofi bäyäalewä bänö bä nia dodobouje —a cuma—. Wa̦lidiwä etä nowa mladobä bä nia yalo lä shämou wei bä nia dodobouje. Bä ö̦shö dodobobeje bä ca̦i yalo.

¹⁷ Jeobaa wale a̦ oquemabobeje, oweja bä nia lä shämou wei bä ca̦i nia dodobouje, nii juluno mlai bä lä didibou wejei bä ca̦i showadawä. Lo̦shi mobä nia lä yädämaö wejei mobä ma cui, uba nashiwä toubä nia ca̦i lä yädämaö wejei ubä ma cui, nofi bäyäalewä bänö ö̦jö bä nia bluca dodobou yädämou showadaoje.

¹⁸ ’Ö̦jö däjä, camiyä nija bä lä yaimolayono wei, bä fetaucu lä yaiono wei bä fe si nia cobejeblamou —a cuma—. Iba yano jamö yoca lä cui jamö, bä fetaucu lä yaiono wei bä fetaucu fa joyamolunö, bä fetaucu nia yaaöje. Jeobaa wale a̦ oquemabobeje a yalo ö̦shömaö feyacaobeje jamö, bä fetaucu nia yao bäfätäo.

¹⁹ ’Ö̦jö däjä, jaboca a jamö nofi bäyäalewä bänö oweja jalima bei faco fa ucälöjenö, wöö a jamö nii a juluno mlai moli a ca̦i shuwäjäwä fa däläjenö, nii moli a ca̦i jenasiwä wai fa yädämacöjenö, bä lä yaimolayono wei bä nija bä nia däamaö balöoje —a cuma—. ¿Ö̦jö tawä? Bä lä yaimolayono wei bä fetaucu lä yaiono wei bä fe si cobejeblamou waiquilayono wei ja, ö̦jö bä fe lä malocoblaleno wejei bä nija bä nia däamaöje.

²⁰ Ö̦jö däjä, camiyä Jeobaa ya nija, nofi bäyäalewä bänö bä nia dodoablalaö cuaaö nomöjöoje. Nofi bäyäalewä bä li iyabä, ö̦jö ebä li yaia. ¿Ö̦jö tawä? Yalo bei balöcö ma cui, bei wacu ma cui, ö̦jö bä showadi lä dodoablalaö wejei, nofi bäyäalewä bä befi li waiquiwä. Ö̦jö bä nija fei bä nia yädäblou. Inaja iba bä lä yaio wei bä cuaaö fa balöonö, nashiwä toubä coaö co̦o daoje.

²¹ ’¿Ö̦jö tawä? —Jeobaa a cuma—. Camiyä nija bä yaiobä bä a̦ nö lä wäo wei bä lä cui bä nija ya tä nabä lä shömöaö wei ei ya wa̦. Camiyä Jeobaa wale dobäbeje, ya tä a̦fa bluca lä jayumafe, ö̦jö bä ja wale nia shino dobäö cadidouje, bä lä yaio wei bänö. Ai täbä yädämaö ojodeje ja, täbä yädämaö daoje. Camiyä nija bä nia lä yaio wei tä ja bä a̦ nö wäo waiquiwä ja, cama bä nija tä nabä lä shömamou wei tä ja bä nia cadidou.