Números 32 - Biblia Yanowamö

Canaana tä mashi bucadu jamö ai bänö tä a̦fa ulifi lä bono wejei tä a̦

¹ Lubeni ebä yalobö blucao fe balojooma. Baca bluca bä tabomaje. Cadö ebä yalobö blucao mö feduoma. ¿Ö̦jö tawä? Calaada tä ulifi mööje däjä, Jaseleteli bä lä bälöjono wei tä ulifi ca̦i mööje däjä, bä bufi waiyoma. Baca bä dodijidawä iyadibä tä ulifi malä cuono wei.

² Ö̦jö cudeenö, Cadö ebä lä cui, Lubeni ebä ca̦i lä cui, bada bä nija bä a̦ fama. Bada bä nija bä a̦ lä fano wei däjä, Moisesi a cuoma. Eleasala a ca̦i, nofi bäyäalewä a lä cui. Bä ca̦i lä cuono wejei bä ca̦i bada. Ö̦jö bä nija abinaja bä cuma.

^3-4 —Bämacö juimabä jamö, Jeobaa a ishou fa baläläonö, bä jaba lä bälöjono wei bä yashublalema. Ö̦jö bä ulifibö jamö bämacö bälöblao nomöjöa lä cule. Adalodo tä ulifi ma cui, Dibono tä ulifi ma cui, Jasele tä ulifi ma cui, Nimila tä ulifi ma cui, Ebono tä ulifi ma cui, baca bä iyabä ö̦jö tä ulifi bluca dodijidawä dodijiwä. Eleale tä ulifi ma cui, Sebama tä ulifi ma cui, Nebo tä ulifi ma cui, Beono tä ulifi ma cui, inaja showawä. Yamacö yalobö iyabä, tä ulifi dodijidawä dodijiwä. ¿Ö̦jö tawä? Cafä bämacö nosie juabä yamacö lä cuinö, baca yama bä bluca malä tabole, ¿ö̦jö daanö?

⁵ ’Bämacö nosie juabä yamacö lä cuinö, bämacö bufi doblamabou waiquia ja, Jodana u bucadu jamö yamalecö shöma dijejä. Ei tä ulifi jöböa da showadabaje, yama tä ulifi nofi tabobä —bä cuma.

⁶ Ö̦jö ma cui, Cadö ebä nija, Lubeni ebä ca̦i nija, abinaja Moisesi a cuma. —Eja cafä wamacö loblalou juo däjä, ¿aifä bei bä wayu nia juu ayao daanö?

⁷ Cafä wamacö juu lä mlai tänö, aifä wama bä bufi nia ujudamaö dicoo. Isaeli ebä nija Jeobaanö tä ulifi lä jöböqueno wei jamö, cama bä nia ca̦i juu mojio mö feduo showao. Inaja dicoo mlai –Moisesi a cuma.

¹⁶ Ö̦jö däjä, Moisesi nija bä fa ajedeblaliyolunö, abinaja bä cuma. —Camiyä yamacö owejabö ji̦colobä, eja yama bä nia tablaö. Ijiluyä bä ca̦i dodijidawä cuobeje, yama bä shabono nia ca̦i taö.

¹⁷ Ö̦jö däjä, yamacö ishobä yama bä showabolanö, Isaeli yama ebä wayu lulubobä yamacö juu weicätä. Bucadu jamö bä nia bälöo lä cadidio wei jamö yama bä ca̦i waloo showao mlao däjä, ö̦jamö yamacö nia juu showao. ’Ala nabänö ijiluyä bä nia ca̦i ji̦coloblao juoje —bä cuma—. Täbä nö lä nabämou wei täbä malä bälöblai.

¹⁸ Isaeli bucadu jamö ebä nia bluca lä bälöjou wei jamö, tä ulifi lojodoaö showao mlaoje däjä, camiyä yamacö yafibö jamö, yamacö nia co̦o jaöomi.

¹⁹ Jodana u bucadu mashi jamö tä nia ulifi lä lojodobou wejei jamö, camiyä yamacö ulifibö nia cuomi —bä cuma—. Camiyä yamacönö yama tä nofi ulifi tabobä, Jodana ei u mashi jamö yama tä nofi tabou malä waiquile, motoca a faö lä cuaaimaö wei tä mashi jamö —bä cuma.

²⁰ Ö̦jö cudeenö, abinaja Moisesinö bä nowa tama. —Ja̦o. Wamacö lä cuu weinaja wamacö cuaabä, ö̦jö lä. Bämacö ishobä jamö Jeobaanö bämalecö lulubou däjä, wamacö ishobä wama bä nia showabou.

²¹ Jodana u jamö Jeobaanö bämalecö ca̦i bucaduo däjä, wamacö ishobä wama bä lä showabou wei wamacö nia bluca juu. Bämacö wayu jubä jamö, bä nö lä nabämou wei bä bluca yashublamou showao mlao däjä, ö̦jamö wamacö nia cudio.

²² ’Jeobaanö tä ulifi yai lä yanöcömabou wei däjä, ö̦jö däjä eja wamacö nia shino co̦o co̦imaö —a cuma—. Inaja wamacö cuaaö ja, “Inaja waiquiwä”, Jeobaa nija wamacö nofi nia tamamou. Isaeli ai ebä mö feduwä ma cuinö, inaja showawä wamacö nofi nia tabou mö feduoje. Ö̦jö däjä, ei tä ulifi ja wamacö cudiobä, Jeobaanö wamacö nia yai bälöa lojodomabou.