Números 24 - Biblia Yanowamö

¹ Jeobaanö Isaeli ebä bayeliblaö bufi lä doblaono wei tä dablaö däjä, Balaama a jaba lä cuaano weinaja a cuaaö co̦daanomi. Jeobaa a wa̦ nö dabou mö junomi. Tä ulifi lä bloque wei jamö a mö yaio cadidio showadaoma.

² Tä möö fa cuaanö, Isaeli bä ijilubö ebä nija bä yaiablalou lä nodiano wei bä bälöjou yaiblamou dalalema. Ö̦jö däjä, cama nija Yai Bada tä Bufi fa yanöcöblaicunö,

³ a wa̦no wäyäö showadaoma. Abinaja a cuma. —Beolo bä ijilubö Balaama ya e nija, Jeobaanö wawädowä täbä dablamaö. Ö̦jö ya wa̦no wäyäbä ei ya wa̦.

⁴ Yai Bada ya wa̦ ji̦liaö lä cule. Camiyä nija Yai Bada tä shino lojode lä ayainö, jai majali täbä wawädowä dablamaö. Ö̦jö ya lä cuinö, ya tä a̦no wäyäö lä cule.

⁵ ’Jacobo wama ecö lä cui —a cuma—. Yalo sibä ja wamacö wejedou lä cuaaö wei, ¡wamacö yanobö mömou liyäjäwä! Isaeli ¡dodijidawä wama ecö bälöjou cuaaö!

⁶ Desibä ublajaa lä möamobe desibä mömou liyäjäwä lä culenaja, wamacö bälöjöwä cuwä. Mau u sibo jamö ficali täcabä dodijidawä lä culenaja showawä. Fibä bada ösöwä lä liyäjäi fibä lä culenaja wamacö cuwä, Jeobaa a showawänö fibä bada yai lä döbole. Mau u casö jamö canafali bä lä culenaja showawä.

⁷ ’Isaeli ebä lä cuinö, mau bluca ubä nia tabou fe yadioje —a cuma—. Bä amishi co̦obä tä ma cui, nii bä fe liyäyabeje tä ma cui, bä mau ubö nia blucao fe yadio. Isaeli ebä ca̦i lä cule a nö nia bada wa̦lojaö ayao, Acaca ebä nö nia wa̦loblamaimi. A wa̦ nia bada ji̦limou blaucou.

⁸ ’Ejido jamö Yai Bada tänö Isaeli ebä fa co̦länö, bä ca̦i juu —a cuma—. Bei yo̦lacönö yalo ai bä nofi bäyäo lä cuaaö weinaja, etä lä tabolajei cäbä. Bä nö lä nabämou wei bä bälöblawä lä yaiblai bä mö nia watäö cuaaöje. Bei bä u nia shäöje. Shäläcawänö bä fe nia fablamaöje.

⁹ ¿Ö̦jö tawä? Öla a wa̦shimi jolou däjä a yäläo lä culenaja bä cuwä. ¿Wedinö a li yabäcaö cuquei? Isaeli ebä bayelimaö lä bufii wejei, bä nia li cama bayeliblamou mö feduo. Bä wafäblamaö lä bufii wejei, bä nia li cama wafäblamou —Balaama a cuma.

¹⁰ Ö̦jö däjä, Balaama a wa̦ ja Balaco a jushudou fa dodijilonö, imicö a̦ ca̦i shäoblou fe balojooma. Abinaja a nowa tama. —Camiyä nija bä nö lä nabämou wei wa bä wafäblabä bäfä fa nacalänö, 3 bäfä a̦ famabä ma cui, wa bä shino showadi bayelimadii dicowä.

¹¹ ¿Ö̦jö tawä? Bei. A co̦jamöö co̦o da showadao. “Bluca bä nija wawädowä bäfä bada ublamabou weicätä”, ya ma cuno wei ma cui, Jeobaa a wa̦ läa. Wa noshi umabou —a nowa tama.

¹² Balaco nija abinaja Balaama a cuma. —Wa wa̦no wäyämobä wa bä lä shömöleno wei bä nija ya wa̦ faö mada showadaoblei.

¹³ Camiyä wale dobäbä, afä yafi ja olo wa bä fe lajoblalei ma cui, blada wa bä fe lajoblalei ma cui, Jeobaa ya wa̦ nia yai juaö cadidio showaoma. Jeobaanö tä nabä shömaö lä mlai, ya tä nia taö bashio bädaomi. Yai Bada tänö wale caficö a̦ lä famaö wei tä ja, ya wa̦ nia shino cadidou showaoma.

¹⁴ ¿Ö̦jö tawä? Bei. Iba bä nijamö ya nia co̦o ma cui, Isaeli ebä lä cuinö wamacö nia obi lä taamaö wejei ya tä a̦ wäyäö balöo —a cuma.

¹⁵ Ö̦jö däjä, Jeobaa a wa̦no wäyäö ja, abinaja a cuma. —Beolo bä ijilubö Balaama ya e nija, Jeobaanö wawädowä täbä dablamaö. Ö̦jö ya wa̦no wäyäbä ei ya wa̦.

¹⁶ Yai Bada ya wa̦ ji̦liaö. Tä Bada lä ayainö tä lä dale tä lä cui, camiyä nija tä jömaö. Camiyä nija Yai Bada tä shino lojode lä ayainö, jai majali wawädowä täbä dablamaö. Ö̦jö ya lä cuinö, ya tä a̦no wäyäö lä cule.

¹⁷ ’A nia obi lä cuo wei ya tä möö —a cuma—. Ya blajawä dablaö balöa lä cule. Jacobo ai e lä cui, jai shidicali a nia bada bädou. Isaeli ai e lä cui, bada a nia bada wawäblou. Moabateli bä fe nia bada shäamaö. Sede ebä fe nia ca̦i shäamaö.

¹⁸ Edomöteli bä nia yashublaöje, Seili tä jamö bä lä bälöle. Isaeli ebä nö wa̦lojaö showalanö, bä nö lä nabämou wei bä fa yashublalöjenö, bä ulifibö nia däaö läoje.

¹⁹ Cama bä shabonobö jamö bä lä feiblou wei bä mö nia watäblaöje. Jacobo ebä lä cui, ö̦jö bä nö nia shino wa̦lojaö fa ayaonö, bä nosie nia juamou blaucou —Balaama a cuma.

²⁰ Amalecoteli bä wawädoablaö fa nomöjöonö, Jeobaa a wa̦no wäyäö co̦o ja, abinaja a cuma. —Bluca bä bälöjou ma yaiblamono wei ma cui, Amalecoteli bä lä cui, ö̦jö bä shino yai bälöo lojodoo dodijioma. Ö̦jö ma cui, ya̦cumö bä mö nia watäblamou shi wa̦lii —a cuma.

²¹ Queniteli bä wawädoablaö fa nomöjöonö, Jeobaa a wa̦no wäyäö co̦o ja, abinaja a cuma. —Wamacö lä bälöle wamacö ulifibö lojodoa. Bei macö jamö wamacö bäcabö jifuadayoa.

²² Ö̦jö ma cui, Asiliateli bänö wamacö nabä queoje däjä, wamacö fa däalalöfälöjenö, Caino wama ecö bäcabö mö nia watäblamou —a cuma.

²³ Jeobaa a wa̦no wäyäö co̦o ja, abinaja a cuma. —¡Shädayai! Yai Bada tä inaja cuaaö däjä, ¿wedi jamö bä lä cui bä nia yai demi cuo?

²⁴ Shible jamö culanö, canawä bä bada jamö täbä befi ca̦i nia caläimaö. Asiliateli bä ma cui, Ebeloteli bä ma cui, ö̦jö bä nö nia bleaamaöje. Ö̦jö ma cui, cama täbä mö nia ca̦i watäblamou mö feduo —a cuma.

²⁵ Ö̦jö däjä, Balaama a shu̦lucua fa showadalunö, a co̦a co̦layoma. Balaco a ma cui, a ca̦i aa mö fedua showalayofälöma.