Números 23 - Biblia Yanowamö

¹ Balaco nija abinaja Balaama a cuma. —Yalo ya bä nia lä dodoblaö wei bä maqueblamobä, 7 täbä da tablalö. Ö̦jö däjä, iba baca 7 bä da bälaquiyo, oweja 7 bä ca̦i —a cuma.

² Balaama a lä cuno weinaja, inaja showawä Balaco a cuaaö showadaoma. Ö̦jö däjä, Balaco, Balaama sho cäcöbö fa icuicunö, yalo bä dodoblaböma. Bä yalo maqueblamobä täbä ja, baca a sho, oweja a sho, bä maquedaböö bolacadoma.

³ Ö̦jö däjä, Balaco nija abinaja Balaama a cuma. —Afä wa ö̦shö lä dodobole jamö wa ublao juo däjä, camiyä ya nia bayäcäblou. Jeobaanö wale yömölaö bäqueyoluu fa cui. Ya nö daodayou. Wale yömölalei ja, cafä nija ya tä a̦ wäyäö weicätä —a cuma. Ö̦jö däjä, tä lä ösöladi jamö a judayoma, fii fibä cua lä mlai jamö.

Isaeli ebä a̦fa bayeliblamou lä wäyäno wei tä a̦

⁴ Ö̦jamö lä, Yai Bada tänö Balaama a mö fa bamalönö, abinaja Balaama e cuma. —Yalo ya bä nia lä dodoblaö wei bä maqueblamobä täbä lä cui, 7 ya täbä i̦tabou waiquia. Ö̦jö täbä jamö, baca, oweja a sho, ya bä maquedaö bolacadou waiquia —e cuma.

⁵ Ö̦jö däjä, Jeobaa a wa̦no wäyämobä, Balaama nija etä a̦ fa wäyänö, abinaja a cuma. —Balaco nijamö a dömöö da co̦fälö. Cama nija wale a̦no wäyäbä, ei ya wa̦ cuo lä cufe —a cuma.

⁶ Balaco nija a domöa fa co̦balufälönö, a ö̦shö lä dodobole etä jamö, cama a ma cui, Moabateli bada bä bluca ma cui, ö̦jamö lä bä bluca ublaoma.

⁷ Ö̦jö däjä, Balaamanö Jeobaa a wa̦no wäyäö ja, abinaja a cuma. —Alamö jamö ya cuo däjä wale nacalema. Motoca a faö lä cuaaimaö wei jamö, ö̦jö mabä bei jamö ya cuo däjä, Moabateli bada anö wale nacalema, Balaco a lä cuinö. ’Abinaja wale nowa tama. “Jabo. Yamalecö bayeliblabä, fei Jacobo ebä lä cui, wa bä nia wafäblaö. Fei Isaeli ebä lä cui, wa bä a̦fa nia wäyäö”, wale nowa tama.

⁸ ’¿Ö̦jö tawä? Yai Bada tänö bä wafäö dao lä mlai, ¿ya bä nia wafäblaö buo daanö? Jeobaanö bä a̦fa wäyäimi waiquiwä ja, ¿wedi tabä ya bä a̦fa wäyäö buobä tawä?

⁹ ’Bei macö bololo jamö ya culanö, ya bä malä dalalufe. Jefu bä jamö ya culanö ya bä möö dodijoma. Ai bä bälöblawä lä yaiblai bä nija bä yädäo mlai ja, cama bä dodijiablalou cuaaö ayao.

¹⁰ Coshi coshi bä nö wabamobimi lä culenaja, fei Jacobo ebä lä cui, bä li cuwä dodijiwä. Isaeli ebä lä cui, “Einaja ebä bluca cua”, täbä nö cubimi waiquiwä. Fei bä lä dodijale bä bufi nö mlaa lä cuquebö weinaja, ¡camiyä ya bufi nö ca̦i mlaa cuquebö wei! Cama bä bayeliblamou shi wa̦lii lä culenaja, ¡camiyä ya ca̦i cuo mö feduobä! —a Balaama cuma.

¹¹ Ö̦jö däjä, Balaama nija abinaja Balaco a cuma. —¿Wedinaja wale li taamaö dicoa cule? Camiyä nija bä nö lä nabämou wei wa bä wafäblabä bäfä ma nacaleno wei ma cui, wa bä wafäblaö mlai ja, bei wa bä li bayelimaö bufi doblao dicoo —a cuma.

¹² A wa̦ juo ja, abinaja Balaama a cuma. —Yai Bada tänö wale caficö a̦ lä famaö wei tä ja, ¿ya wa̦ shino yai shaliloimi daanö? —a cuma.

¹³ Balaco abinaja a cuu nomöjöoma. —Jabo. Wa bä bebiblaa dablaö co̦obä, ai tä jamö bäfäcö nia dolecou co̦ofälöö. Bluca wa bä nia dablaimi, bä bälöa lä ajedele wa bä nia shino bebiblaa möö co̦o. Ö̦jamö wa culanö, wa bä nia yai wafäblaö, wale bayeliblabä —a cuma.

¹⁴ Ö̦jö däjä, Sofimi tä ulifi lä ösöi jamö a ca̦i dolequebefälöma, Bisica cäcö bololo jamö. Yalo bä lä dodoblamou wei bä maqueblamobä, 7 täbä tablaö co̦layoma. Ö̦jö däjä, bä yalo maqueblamobä täbä ja, baca, oweja a sho, bä maquedaö bolacadaö cuaaö co̦oma.

¹⁵ Balaco nija abinaja Balaama a cuma. —Bayäcäle jamö Jeobaa ya mö baamaö däjä, afä wa ö̦shö lä dodobole jamö a ublaa da jeicu —a cuma.

¹⁶ Jeobaanö Balaama a mö fa baamalönö, a wa̦no wäyäbä, Balaama nija etä a̦ fa wäyänö, abinaja a cuma. —Balaco nijamö a cua da co̦lufälö. Cama nija wale a̦no wäyäbä, ei ya wa̦ cuo lä cufe —a cuma.

¹⁷ Balaco nija a cua fa co̦lufälönö, a ö̦shö lä dodobole etä jamö, a ublaoma. Cama nija Moaba ebä bada ca̦i ublao ajedeoma. Balaama nija abinaja Balaco a cuu showadaoma. —¿Wedinaja Jeobaa bei tä cuu cufe? —a cuma.

¹⁸ Ö̦jö däjä, Balaamanö Jeobaa a wa̦no wäyäö ja, abinaja a cuma. —A yömöca da daicu, Balaco. Wale a̦ ji̦lia da dodijidalä, Sibolo bä ijilubö wa e lä cuinö.

¹⁹ Yanowamö bämacö lä culenaja, Yai Bada a cuwämi. A ca̦i jolemoimi. A bufi nia shominajaaö lä majöo wei etä cuami. A wa̦ lä cadidou wei tä ja, ¿a nia cuaaö nomöjöomi daanö? A wa̦ nö lä wäo wei, ¿etä nia bejedi cubloimi daanö?

²⁰ ’Bei. Ya bä yai bayelimabä wale nosiemöledayou lä cufe. Camanö inaja täbä bayeliblaö cuo waiquio däjä, camiyä ya e a̦ nö läblou bashiobimi.

²¹ Fei Jacobo ebä lä cui, bä doblou lä mlai etä dabloimi. Isaeli ebä lä cui nija etä wa̦lidiwä dablamoimi. Jeobaa a lä bufiblaö wejei a lä cuinö bä ca̦i cua lä cule. Ö̦jö a nofi doablaöje.

²² ’Ejido jamö Yai Bada tänö bä fa co̦länö bä ca̦i juu lä cuimi. Bei yo̦lacönö yalo ai bä nofi lä bäyäo weinaja, etä tabouje.

²³ Fecula bä a̦ nö faablalou wei ma cui, fei Jacobo bä shäbeje bämi waiquiwä. Isaeli ebä doblamaö mlaobeje tä cuami. Fei Jacobo ebä lä cui, Isaeli ebä showawä lä cui, ö̦jö bä a̦fa wayoaöje ja, abinaja täbä nia shino cuu. “Bejedi lä Yai Bada nija ö̦jö bä bayeliblamou fe balojowä”, bä nia shino cuu.

²⁴ ¿Ö̦jö tawä? Quilii mlai ja, jai öla a waiteli jocädou lä culenaja bä cuwä. A nabä lä juu wei a waicaö showao mlao däjä, i̦yäbö waö showao mlao däjä, a nia yäläo buomi —Balaama a cuma.

²⁵ Balaco abinaja a cuma, Balaama nija. —¡Uo! Wa bä wafäblaimi waiquiwä ja, bä bayelimaö buo dijä, ö̦jö lä —a cuma.

²⁶ Ö̦jö ma cui, Balaama abinaja a cuu mö feduoma. —Cafä nija ya wa̦ mada fablei. Jeobaanö wale nowa bluca lä taö weinaja, ya cuaaö cadidiobä ya malä cui —a cuma.

²⁷ Balaama nija abinaja Balaco a cuma. —Bei. Jabo. Ai tä jamö bäfä nia lulubou nomöjöodayou. Ö̦jamö wa cuo däjä, Yai Bada tänö bä wafäblamaö ja̦toa bäquei fa cui, wale bayeliblabä —a cuma.

²⁸ Ö̦jö cudeenö, Beolo cäcö bololo ja, Balaama a lulubodayoma, tä ulifi lä bloque wei tä lä bebiblabe jamö.

²⁹ Ö̦jö däjä, abinaja Balaama a cuma, Balaco nija. —Yalo ya bä nia ö̦shö lä dodoblaö wei bä maqueobä, 7 täbä tablaö da co̦lo. Ö̦jö däjä, iba baca 7 bä da bälaquiyo, oweja 7 bä ca̦i —a cuma.

³⁰ Balaama a lä cuno weinaja, Balaco a cuaaö fa showaonö, bä yalo maqueblamobä täbä ja, baca, oweja a sho, bä dododaö bolacadoma.