Números 22 - Biblia Yanowamö

Balaconö Isaeli ebä wafäblamaö lä bufino wei tä a̦

¹ Ö̦jö däjä, Isaeli ebä jocäa fa co̦lufälönö, Moaba ebä ulifibö fe lä yalöle jamö bä cuquema. Jelicoteli bä bälöo lä bucaduono wei jamö, Jodana u mashi jamö bä bälöa bucaduqueyoluma.

² Bei. Isaeli ebä lä cuinö, amoleo bä taamaö lä cuaaimano wejei tä ja, Balaco a moyawälayoma, Sibolo bä ijilubö e lä cui.

³ Isaeli ebä blucaoma yalo, Moaba ebä bufi nö bleaaö fe balojooma. Bä quililaliyoma yalo bä bufi nö beblaloma.

⁴ Madianateli bä bada nija abinaja Moaba ebä cuma. —Quiji bä bluca lä juimi bänö, bämacö ulifibö mö nia watäblaöje. Baca bänö moimoima bä waicaö nö mlao lä culajeinaja bämalecö nia tablaöje—bä cuma. Ö̦jö cudeenö, Sibolo bä ijilubö Balaco e lä cui, Moaba ebä ca̦i lä cuono wei a bada showawä lä cui,

⁵ abinaja a cuaama. Balaama e bulamaö bufima, Beolo bä ijilubö e lä cui. Bedolo jamö a bälöoma, Amaba tä ulifi jamö, Euflade u sibo jamö tä ulifi lä blale jamö. Balaama a bulamaö bufii ja, abinaja a nowa nia tamaje. “Ejido jamö culanö shomiteli bä fa juimanö, bä cublawä jödödöwä. Camiyä yamacö lä bälöle tä mashi jamö bä bälöa bucadublaa lä cubiyei.

⁶ Bä nö wa̦lojaö yalo, yamacö nö doblobimi waiquiwä. Jabo, ö̦jö lä. Yamalecö bayeliblabä, wa bä nia wafäö. Inaja wa bä taamaö balöono wei ja, camiyä bei yamacö ishou nomöjöobä. Yama bä nö bleaamaö ja̦toquei. Yama bä yashublaö bälayou fa cui. Bäfä malä dale. Showadi wa wa̦ nö wa̦lojaö talei. Showadi wa täbä bayeliblamaö däjä, bä bayeliblamou. Wa täbä wafäö däjä, bä nö showadi bleaaö”, a nowa nia tamaje.

⁷ Ö̦jö cudeenö, Moaba ebä bada sho, Madianateli bä ca̦i bada sho, bä alayofälöma. Isaeli ebä wafäblaö ja, tä nowa nia lä coamano wejei, bä blada ca̦i showabomaje. Balaama nija bä fa waloicunö, Balaco a wa̦no bada wäyämaje.

⁸ Cama bä nija abinaja Balaama a cuma. —Camiyä nija wamacö mio fe jalu balöobä. Fena ja bämacö yömölaö cadidio fenaobä. Jeobaanö wale yömölaö lä cuaaö weinaja ya wa̦no wäyäö cadidio wä —a fa cunö, Balaama nija Moaba ebä bada cuo fe jaluma.

⁹ Balaama nija Yai Bada tä wawälayoyoluma. Abinaja a cuma. —Cafä nijamö fei bä lä cule ¿wedi bei bä li? —a cuma.

¹⁰ Yai Bada tä nija abinaja Balaama a cuma. —Sibolo bä ijilubö Balaco e lä cuinö, Moaba ebä ca̦i lä culenö, bä camiyä nija lä shömano wei, fei bä li. Abinaja bä cuu.

¹¹ Ejido jamö culanö, shomiteli bä fa juimanö, bä jo̦wa cublawä jödödöwä. Bä wafäblamaö fa bufiojenö, wale bulaöje. Inaja ya bä taamaö balöono wei ja, cama bä nia jo̦wa ishou nomöjöo. Bä yashublaö wababeje —a cuma.

¹² Abinaja Yai Bada a cuma, Balaama nija. —Fei bä nija wa nia nocaomi. Täbä wafäblaö ma bufii däjä, quiji wa bä nia wafäblaimi. Bä li bayeliblamobä bä li waiquiwä —a cuma.

¹³ Ö̦jö cudeenö Balaama a jocäblou fa fenablalonö, Balaco bada ebä nija abinaja a cuma. —Bä da co̦jamö. Cafä wamacö nijamö wamale nocamabou bufi ma doblao wei, Jeobaanö wale noshi umabou —a cuma.

¹⁴ Ö̦jö cudeenö Balaco nija Moaba ebä bada waloa fa co̦icunö, tä a̦ wäyäö co̦ojolomaje. —Yama a ma nacano wei ma cui, a noshi umlaoma —bä cuma.

¹⁵ Balaconö cama ai ebä shömöa co̦lema. Bä shömöa lä co̦leno wei, bluca bä shömöa nomöjölema, bä a̦ showadi yai lä ji̦liaö wejei bä lä cui.

¹⁶ Balaama nija bä fa waloicunö, abinaja bä cuma. —Sibolo bä ijilubö Balaco yama e a̦no taö. Wa bufi lämou mlai ja, camiyä yamacö nija a nocaa da showadaicu.

¹⁷ Balaconö bluca täbä nija wawädowä wa nia bada ublamabou. Wa lä nacou wei wa wa̦ nia ji̦liaö. ¿Ö̦jö tawä? Jabo. Yamalecö bayeliblabä, quiji täbä lä bälöle wa bä nia wafäblaö —bä cuma.

¹⁸ Ö̦jö ma cui, Balaco a nosie lä juaö wejei bä nija abinaja Balaama a cuma. —Ma. Jeobaa ya lä bufiblalenö tä nabä shömaimi ja, ya tä taö bädao mlaicätä. Tä nabä lä shömaö wei tä ja ya nia shino cadidou. Camiyä wale dobäbä, Balaco yafi e ja, olo bä fe lajoblalei ma cui, blada bä fe lajoblalei ma cui, ma, ö̦jö ya wa̦ nö juabimi waiquiwä.

¹⁹ ¿Ö̦jö tawä? Bei. Camiyä nija wamacö mio fe jalu balöobä. Jeobaanö wale yömölaö co̦o ja, ya wa̦ nia ji̦liaö —a cuma.

²⁰ Balaama nija Yai Bada tä didi wawäa fe jalulayoma. Abinaja a cuma. —Fei bänö wa nacaö mö juu waiquiweje ja, cama bä nija a da yaulofälö. Ö̦jö ma cui, cafä bäfä tamaö lä bufii weinaja, wa nia shino cuaaö cadidio —a cuma.

Jeobaa etä a̦jelenö Balaama a nabä ublao lä läono wei tä a̦

²¹ Ö̦jö cudeenö, Balaama a jocäblou fa fenalonö, ji̦ima bulo e mabucabö ja, a döcäobä tä maquea fa fenacönö, Moabateli bada bä nija a yaua showalayofälöma.

²² Ö̦jö ma cui, Balaama a juu cudeenö, Yai Bada a jushudaliyoma. A fa jushudalunö, bei yo jamö Jeobaa etä a̦jelenö a nabä ublaa bablaquema. ¿Ö̦jö tawä? Bulo a ja, a befi ca̦i lä juimadi jamö, a nosie juamobä ecöbö ca̦i yaumalefälöma.

²³ Ö̦jö däjä, yalo bulo e lä cuinö, bei yo jamö Jeobaa etä a̦jele läa dalalema. Sibala a bada showaboma. Ö̦jö tä fa dalalönö, bei yo casö jamö a diquequelayofälöma. Bei yo jamö a cadidou co̦ofälöbä, Balaamanö a si yafelilalema.

²⁴ Ö̦jö däjä, uba totobä lä cule jamö, wiisibö yo lä jayuano wei ja, Jeobaa etä a̦jelenö a nabä ublao fe difelio co̦o majöodayoma. Ai etä mashi ma cui jamö, ai etä mashi mö feduwä ma cui jamö, jai yafi a balöcö cuwä tä cuo mö feduduo showadaoma, maa mabänö.

²⁵ ¿Ö̦jö tawä? Bulo a lä cuinö, Jeobaa etä a̦jele läa fa dalalönö, ai tä mashi mö feduwä jamö a fa docublalunö, maa mabä jamö Balaama bei mamicö jasinimaquema. Ö̦jö tä nowa ja, a si yalo yafelia co̦lalema.

²⁶ Ö̦jö däjä, Jeobaa etä a̦jele fe difelia fa co̦lufälönö, yo wai wajaquemidou co̦obä ja, a läa co̦quema. Yo wajaquemi cudeenö, jayu boco jamö ma cui ja, acasi boco jamö ma cui ja, bulo a a̦yoblobä tä cuonomi waiquiwä.

²⁷ Ö̦jö däjä, bulo anö Jeobaa etä a̦jele dablaö däjä, Balaama a befi ca̦i yälädaquema. Ö̦jö däjä, Balaama a yai bejedi fa jushudalunö, efi lä showabono wei efinö, a shäa co̦lema.

²⁸ A shäa fa co̦lönö, yalo a ma cui, Jeobaanö a wa̦ famalema. Balaama nija abinaja bulo e cuma. —¿Wedinaja bäfä li taamaö ja, 3 wale li shäö dicoa cule? —a cuma.

²⁹ Abinaja Balaama a cuma. —Jai wale nö waiblaö wale ca̦i cuaablalou fa dicoonö, bäfä si li yafelimaö lä cufe. Sibala ya yai bou fa cunoja, bäfä nö shäa cadidilebö wei —a cuma.

³⁰ Ö̦jö däjä, bulo a wa̦ faö co̦oma. —Uo. Wale malä dale. Yedu jamö, wa oshe lä cuono wei däjä ma cui, bäfä showadi da döcömaboblei ya showawä malä cui. Inaja ya cuaaö bädaobä ya malä mlai. —Bejedi lä —Balaama a cuma—. Inaja wale tamaimi.

³¹ Ö̦jö däjä, Jeobaanö Balaama nija a̦jele a damalalema. Sibala a bada showabolanö, bei yo jamö a läoma. A fa dalalönö, yedu mashita jamö Balaama a möfe boblaquema.

³² Jeobaa etä a̦jele lä cuinö, abinaja Balaama a nowa tama. —¿Wedi tabä yalofä 3 wa si li yafelimaö cuaaö cufe? Bäfä li yai doblamaö lä mlai, camiyä ya li yai läa mö baa. Wa lä cuaale tä wa̦lidiwä. Ya tä bufiimi cudeenö, ya läa lä cuboyoi.

³³ Afä yalofä anö wale li ublaa fa dalalönö, 3 a li docublou culayoma. Camiyä nija a docublou mlao fa cunoja, bäfä nö shäa showadaalebö wei, cama ya nö shino demi taa ayalebö wei —a a̦jele cuma.

³⁴ Ö̦jö däjä, Jeobaa etä a̦jele nija abinaja Balaama a cuma. —Ya doblonomi. Äyämö ya lä juimi jamö, wale nabä lä ublaono wei ya tä daö fa mlacunö, ya li inaja cuaama. Ja̦o. Ya lä cuaale wa tä a̦fa wa̦lidiwä taö ja, ya mö yabaö co̦ofälöö weicätä, ö̦jö lä —a cuma.

³⁵ Balaama nija abinaja Jeobaa etä a̦jele cuma. —Quiji bä nijamö a yauaö da showaofälö. Ö̦jö ma cui, wa wa̦ nia lä faö wei, camiyänö bäfä a̦ famaö lä bufio weinaja, inaja wa wa̦ nia shino faö cuo —a cuma. Ö̦jö cudeenö, Balaco bada ebä nijamö a yauaö co̦ofälöma.

Balaco nijamö Balaama a lä waloqueno wei tä a̦

³⁶ Balaama a ca̦i lä waloo wejei, bada tä Balaconö tä a̦ fa ji̦lilänö, a shi jalimolayoma. A möö mö baobä, Moaba ai ebä lä bälöle jamö a julayoma, Anono u sibo jamö, Moaba ebä ulifibö fe lä wädöle jamö.

³⁷ Balaama nija abinaja Balaco a cuu mö baoma. —Wa juu showadaono lä mlai, ¿camiyänö bäfä nacanomi daanö? ¿Wedi tabä wale fe li walou showadao mlao cublelei? “Bluca bä nija wale nia wawädowä umblamabou”, ¿wa bufi cunomi tawä? —Balaco a cuma.

³⁸ —Inaja a cu dijä —Balaama a cuma—. Bäfäcö möyou malä waiquile. Ö̦jö ma cui, ya wa̦ faö däjä, tä nia cublou lä showadao wei ya tä taboimi. Yai Bada tänö wale caficö a̦ famaö lä bufio wei tä a̦ ja, ya wa̦ li cadidobä ya li —a cuma.

³⁹ Ö̦jö däjä, Balaconö Balaama a ca̦i fa alufälönö, Quiliaduso jamö cäcöbö waloquema.

⁴⁰ Ö̦jamö bä ö̦shö dodobä, Balaconö yalo bä shämalema. Baca bä sho, oweja bä sho bä fa shäamalalönö, Balaama nija bä mashi wamama. Cama nijamö bä bada lä cuono wei bä nija, bä ca̦i mashi wamaö mö feduoma.

⁴¹ Ö̦jö tä fena ja, Balaconö a fa nacalänö, Bamobaala jamö, Balaama a ca̦i dolequebefälöma. Ö̦jamö Balaama a culanö, Isaeli ebä bälöa lä ajedeono wei bä bälöa bebiblaa dalalema.