Números 21 - Biblia Yanowamö

Canaanateli bä mö lä watäblaleno wejei tä a̦

¹ Canaanateli bada anö, Isaeli ebä a̦fa juu ji̦lilema. Aladateli bä ca̦i lä cuono wei a bada cuoma. Neque jamö cama ebä ca̦i bälöoma. ¿Ö̦jö tawä? Adalimiteli bä nö mayo jamö bä a̦fa juu fa ji̦lilänö, cama ebä fa toujublamalönö, bä nabä quea showadaquemaje. Bä nabä fa quealujenö, ai bä demi däalalemaje.

² Ö̦jö däjä, Jeobaa nija Isaeli ebä a̦ nö wäoma. —Fei yama bä nö bleaamabä, cafänö yamalecö nö wa̦lojoblamaö ja, yama bä shabonobö mö nia bluca watäblaö showadao —bä cuma.

³ Jeobaanö Isaeli ebä a̦ fa ji̦lilänö, Canaanateli bä noshi ö̦jödadalema. Cama bä befi ca̦i shabonobö mö bluca watäblaö showadalayomaje. Ö̦jö cudeenö, Oloma tä a̦fa ulifi jilaquemaje.

Olu cäcö nö idubö mödamaö lä bufino wei tä a̦

⁴ Olo cäcö tabi fa feicöfälöjenö, modu Wacä u jamö yo shadia mö lä cui jamö bä aa culayofälöma, Edomöteli bä ulifibö jamö bä a̦yoafälöbä. Bä lä juimadi jamö, ya̦cumö bä bufi wa̦lidiaafälöma.

⁵ Yai Bada a wa̦fa tamaje. Moisesi a ma cui, a wa̦fa ca̦i tamaje. —¿Wedi tä tabä ei tä ulifi lä blocole jamö yamacö nomabä, Ejido jamö yamalecö co̦lei cublelei? Eja nii bä cuami. Mau u ca̦i cuami. Fei yama täbä showadi lä waö wei, ya̦cumö yama täbä wa̦li waö mojiaö dodijia lä cule —bä cuma.

⁶ Ö̦jö däjä olu wayu bä ja, Jeobaanö bä nabä shömöquema. Olu bänö bä si fa wädöjenö, Isaeli bluca ebä nomalaliyoma.

⁷ Moisesi nija bä fa icuicunö, abinaja bä cuma. —Yamacö doblou dicoa mlaa lä cule. Jeobaa ma cui nija, cafä wa ma cui nija, yamacö jölaö dicooma. Jeobaa nija yamalecö nö bayeli da naca, olu bä blajaamaö co̦obä —bä cuma. Ö̦jö cudeenö, Moisesinö bä nö bayeli nacama.

⁸ Bä nö bayeli fa nacanö, Moisesi nija abinaja Jeobaa a cuma. —Olu cäcö lä wayu wei cäcö nö idubö da basucu. Fii defi jamö wa cö nö idubö fa basucunö, wa cö nö idubö befi ca̦i i̦taabä. Ö̦jö däjä, olu bänö bä si lä wädöfajei bä lä cuinö cäcö nö idubö mödaöje ja, bä nia demi cuo fe yadio —a cuma.

⁹ Einaja Jeobaa a cuma cudeenö, duo shibä ja Moisesinö olu cäcö nö idubö basublalema. Fii fi jamö cäcö fa shadimacönö, olu bänö bä si lä wädöno wejei bä lä cui, cäcö nö idubö mödaöje däjä, bä demi cuo fe yadioma.

Isaeli ebä bälödou lä cuaafälöno wei tä a̦

¹⁰ Isaeli ebä jocäa fa co̦lufälönö, Obodo jamö bä bälöblaquefälöma.

¹¹ Obodo jamö bä jocäa fa co̦lufälönö, Ijeabalimi jamö bä bälöblaa majöquefälöma, Moaba ebä ulifibö lu̦locu ja, motoca a lä faimaö wei tä mashi jamö.

¹² Ö̦jamö culanö bä jocäa fa co̦lunö, Selede tä yalö lä möamobe jamö bä bälöblaa majöquema.

¹³ Ö̦jamö culanö bä jocäa fa co̦lufälönö, Anono u mashi jamö bä bälöblaa nomöjöquefälöma, tä ulifi lä blocobe jamö. Ö̦jö tä ulifi lä bloque wei, amoleo bä lä bälöjöi jamö tä fe ulifi wädöblawä. Amoleo bä lä bälöblai jamö, Moaba ebä bälöblawä mö lä fedui jamö, Anono u läa möamoa.

¹⁴ ¿Ö̦jö tawä? Ö̦jö cudeenö, Jeobaa a lä ishono wei si oni jamö, abinaja tä a̦ oni cuu. Sufaa yama tä ulifi jayuquefälöma, Baebe tä ulifi lä blale jamö. Anono u sibo fe yalö lä möamobe jamö yamacö jayuaö showaofälöma,

¹⁵ Ala tä ulifi fe yalöwä lä wädöle jamö, Moaba ebä ulifibö casö jamö, tä fe yalöjöwä wädöa lä showale jamö. Einaja tä a̦ oni cuu.

¹⁶ Ö̦jamö culanö, bä jocäa lä co̦layou wei, Beele jamö bä waloquema. Mau uca wa̦fa Beele cua. Ö̦jamö, mau e ubä jöböabä, Moisesi nija Jeobaanö täbä yododamaö lä bufino wei, ö̦jö e ubä showawä.

¹⁷ Ö̦jö däjä showawä, Isaeli ebä lä cuinö ei tä a̦ amowa tamaje. Abinaja bä amowabö a̦ cuma. ¡Mau ubä da faolalu! ¡Mau uca jamö tä a̦ lä yädäle, bäma tä a̦ da ta!

¹⁸ Bä ca̦i lä cuono wejei bänö, uca lä tano wejei, bada bänö uca lä dalomaleno wejei. Bada bänö fii e defibä lä showabono wejei e defibänö, e u famalemaje. Fimo bänö e u dilosholemaje. Einaja bä amowabö a̦ cuma. Ulifi bloque jamö culanö, bä jocäö lä co̦ofälöö wei, Madana jamö bä fa waloicöfälönö,

¹⁹ Naalieli jamö bä jayua fa nomöjöicöfälönö, Bamodo jamö bä waloa nomöjöquefälöma.

²⁰ Ö̦jö däjä, Bamodo jamö culanö bä jocäö fa co̦ofälönö, Moaba ebä ulifibö jamö bä waloa nomöjöquefälöma, tä fe lä yalöi jamö. Bisica cäcö ola bäfätä jamö bä bälöblaquema, tä ulifi lä bloque wei tä lä bebiblabe jamö.

Amoleo Seono a nö bada lä bleaamano wejei tä a̦

²¹ Isaeli ebä a̦no wäyäbeje, amoleo bada a nija bä shömölemaje. Seono a wa̦fa bada cuoma. Abinaja bä cuma.

²² —¿Cafä wamacö nijamö yamacö jayuobä daanö? Bei wamacö ficalibö ca jamö yamacö juu mlai ja, afä uba totobä lä cule jamö yamacö juu mlai ja, yamacö nia jayuo showadao, ¿ö̦jö tawä? Cafä wamacö maubö uca jamö ma cui, yamacö amishi nia co̦omi. Afä yama tä ulifi jayublaö showao mlao däjä, showadi bä lä jublaaö wei yo jamö, yamacö nia juu cadidou showadaofälöö, ¿ö̦jö tawä? —bä cuma.

²³ Ö̦jö ma cui, Seono a badanö Isaeli ebä jayuamanomi. Cama ebä toujublamaö fa showadalonö, tä ulifi lä blocole jamö Isaeli ebä nabä ca̦i juma. Jaasa tä ulifi jamö bä nabä fa blacölöjenö bä nabä quequemaje.

²⁴ Ö̦jö ma cui, Isaeli ebä nö wa̦lojaö fa ayaonö, bä shäalalemaje. Anono u lä cui, Jaboco u mö feduwä lä cui, ö̦jö tä ulifi lä möamobe tä ulifi däa läa lojodoa showadalemaje. ¿Ö̦jö tawä? Tä ulifi däaö lä läono wejei, Amonoteli bä ulifibö casö jamö tä fe ulifi wädöblamoma, Jasele tä jamö. Jasele tä jamö, Amonoteli bä bälöjou fe malä wädöblamono wei.

²⁵ Ö̦jö däjä, Isaeli ebä lä cuinö, amoleo bä shabonobö bluca däa fa lälöjenö, ö̦jamö bä bälöa läaliyoma. Ebono tä shabono ma cui jamö, ai täbä shabono lä ajedeono wei ma cui jamö, ö̦jamö lä bä bälöjöo läolaliyoma.

²⁶ Ö̦jö Ebonoteli bä shabonobö jamö, amoleo a bada Seono lä cui, a jaba bälöoma, Isaeli ebä lä cuinö a bada lä shäleno wejei. Ö̦jamö Moaba ebä jaba bälöoma ma cui, Seononö bä nabä quea mö baa fa dicoblaicunö, Moabateli bada a nija etä ulifi däa lälema. Tä ulifi däa lä läleno wei, Anono u jamö tä fe ulifi wädöblamoma.

²⁷ Ö̦jö cudeenö, amowa bä a̦ shino lä taö wejei, abinaja bä amowabö a̦ cuu talei. ¡Jabo! ¡Ebono jamö bä da juimaje, Seono a bada bälöa lä läono wei jamö! ¡A shabono i̦tamaö da co̦oyoje, a da lojodoblaliyoje!

²⁸ Ebonoteli bä shabonobö jamö wacö bada ömöoma, Seono a bälöa lä läle jamö. ¿Ö̦jö tawä? Seono ebä wayu lä juno wei, jai cowa wacö bänö tä ulifi waicaö lä culenaja bä cuoma. Ebonoteli bä shabonobö jamö wacö jaba fa ömöicunö, wacöbä lä yäblou wei, Ala jamö ma cui, wacö bada quea blajaa fa showadalunö, Moabateli bä mö watäblamolayoma, Anono u ola jamö, bä bälöo lä lojodoodayono wei bä lä cui.

²⁹ Moabateli wamacö lä cui, ¡wamacö nö bleaabä wamacö! Wamacö nö blea waiquia, Quemosi a jole lä bufiblamole wama ecö lä cui. Ö̦jö wama ecö lä cui, wa̦lo wama ecö quilili yashublamou waiquia. Suwä wama ecö däablamou, Seono a wa̦fa bada lä cule nija.

³⁰ Ebonoteli bä shabonobö jamö Moabateli bä nia bälöa dabloimi nomöjöo. Dibonoteli bä shabonobö lä blajale jamö ma cui, ö̦jamö yama tä ulifi wa̦lidiamaö lä cuaafälöno wei, Medeba jamö ma cui, yama wacö ömöa blajaa showadaamalema.

Basanateli a nö bada lä bleaamano wejei tä a̦

³¹ Inaja tä fa cuonö, amoleo bä ulifibö jamö Isaeli ebä bälöo läoliyoma.

³² Ö̦jö däjä, Jasele tä ulifi bomabeje, Moisesinö bä shömölema. Ö̦jamö amoleo bä fa yashublalöjenö, ö̦jö bä shabonobö lä cublamono wei bä ma cui, bä shabonobö däa läabodayomaje.

³³ Ö̦jö däjä, Basanateli bä beliyobö jamö bä juu fa nomöjöofälönö, Basanateli bada anö cama ebä ca̦i bluca wawäa mö baalayoma. Oco a wa̦fa bada cuoma. Edei tä jamö bä ishobä, bä nabä wawäa mö balayomaje.

³⁴ Ö̦jö ma cui, Jeobaanö abinaja Moisesi a nowa tama. —Oco a nö quili ta dijä. Cama a ma cui, cama ebä ca̦i bluca ma cui, cama bä ulifibö ma cui, cafä nija ö̦jö ya tä noshi bluca ö̦jödabou waiquia. Ebono jamö amoleo a bada Seono da bälöoblei, ö̦jö wa da taamableinaja, fei wa nia ca̦i tablaö nomöjöo —a cuma.

³⁵ Ö̦jö cudeenö, Oco ma cui, bä ijilubö ebä ma cui, cama ebä bluca ma cui, bä shäalalemaje. Moli ma cui a feiblonomi. Ö̦jö däjä, cama bä ulifibö jamö Isaeli ebä bälöo läo majöolaliyoma.