Números 20 - Biblia Yanowamö

María a bufi lä mlaqueno wei tä a̦

¹ Jaba a belibo ja, Sini tä ulifi lä blocole jamö Isaeli ebä waloquema. Ö̦jamö cama bä bluca fa waloicunö, Cadesi jamö bä bälöblaquema. Ö̦jamö bä bälöo däjä, María a bufi mlaquema. Ö̦jamö a didiquemaje.

Maa ma jamö mau u bada lä famaleno wei tä a̦

² Bei. Isaeli ebä amishi co̦obä, mau u cuonomi. Ö̦jö cudeenö, Moisesi, Aaloni cäcöbö nabä icuquemaje.

³ Moisesi a wa̦fa taöje ja, abinaja bä cuma. —Jeobaanö camiyä bämacö ai bä nomaa lä balömaleno wei däjä, ö̦jö däjä yamacö ca̦i nomaö mö feduo showadao fa cunoja, tä nö doblaobö wei.

⁴ Camiyä yamacö ma cui, yamacö ca̦i yalobö ma cui, ei tä ulifi lä blocole jamö yamacö bluca nomablou buobä, ¿Jeobaanö bei yama ecö li luluablalaö bäa culawä?

⁵ ¿Ei tä ulifi lä wa̦lidile jamö yamalecö ca̦i jubä, Ejido jamö bei yamalecö co̦lema tawä? Eja nii bä nö döamobö mlai. Ico fibä ma cui, uba totobä ma cui, ai fibä ma cui, eja bä nö bluca döamobimi waiquiwä. Mau yama ubä coabä ma cui, ubä ca̦i cuami cadidiwä —bä cuma.

⁶ Ö̦jö däjä, Moisesi, Aaloni cäcöbö lä cuinö, bä lä yododoono wei bä fa daböcöfälönö, Jeobaa e yano jamö bä lä fablaaö wei jamö, cäcöbö icuquema. A wa̦fa Bada doblao taböbä, mashita jamö cäcöbö möfe boblabedayoma, Jeobaa nija. Ö̦jö däjä, cama cäcöbö nija Jeobaa a shi̦i fa damolalunö,

⁷ abinaja Moisesi nija Jeobaa a cuma.

⁸ —Ö̦jö fii wa defi fa dälänö, a̦iyofä Aaloni sho wafäcönö, Isaeli wafä ebä bluca nia yododoamaö. Bä mamo bluca showao däjä, ö̦jö maa ma ja wa wa̦ fa fanö, u̦eshi jamö mau ubä lä cule ubä famaö da bufi. Inaja wa cuu ja, mau wa u bada nia famaö, cama bä ma cui, cama bä yalobö ma cui, bä amishi bluca co̦obä —a cuma.

⁹ Ö̦jö däjä, Jeobaa a lä cule jamö Moisesinö defi dälema, Jeobaanö a nowa lä tano weinaja showawä.

¹⁰ Maa ma jamö, cama Isaeli ebä bluca fa yododomaböcönö, Moisesinö bä nowa tama. —Uo. Wamacö ja̦amodou lä mlai wamacönö, ei yafälecö a̦ da ji̦lije. Wamacö amishi nia lä co̦o wei, ei maa ma ma cui ja, mau yafä ubä nia famalei —a cuma.

¹¹ Ö̦jö däjä, Moisesi boco fa yalejedalunö, fii finö ma shäa bolacaquema. Ma fa shäcönö, mau u bada bluca faa showadaaliyoma. Isaeli ebä bluca lä cule, bä yalobö ma cui, bä amishi bluca co̦o showadaoma.

¹² Ö̦jö däjä, Moisesi nija Jeobaa a wa̦ falayoma. —Camiyä yami ya lä dodijaö wei, Isaeli ebä nija wafäle dablamabä tä ma cuono wei ma cui, wafäle a̦ bejedi bufinomi dicowä. Inaja wafäcö cuaama yalo, fei bä nija ya tä ulifi nia lä jöböaö wei jamö, bäfäcö nia cafä luluboimi —a cuma.

¹³ ¿Ö̦jö tawä? Meliba u fe lä jojole ö̦jö u showawä. Ö̦jamö Jeobaa nija Isaeli ebä a̦ fa läablalonö, Jeobaa a yami lä yaile a damolaliyoma.

Edomöteli bänö Isaeli ebä jayuamaö lä mlaono wejei tä a̦

¹⁴ Cadesi jamö culanö, Edomöteli bada a lä cui nija, Moisesi a wa̦no wäyäbeje bä shömölema. Abinaja bä cuma. —A̦i. Fääshäfä Isaeli yama ecö nodiwä lä cui, yama a wa̦no bada wäyäö lä cule. Yamacö nö jaba lä bleablalono wei wa tä daö, ¿ö̦jö tawä?

¹⁵ Ejido jamö yamacö nö badabö fa waloicunö, yamacö bälöo nö dedeaö dodijioma. Yamacö nö badabö ma cui, camiyä yamacö ma cui, Ejidoteli bänö yamalecö nö bleaamamaje.

¹⁶ Yamacö nofi nia ojode fa tablamonö, Jeobaa nija yamacö a̦ nacläama. Yamacö a̦ fa nacläanö yamalecö a̦ ji̦lilema. Jeobaa etä a̦jele fa shömölödunö, Ejido jamö yamalecö co̦lema. Fei däjä Cadesi jamö yamacö bälöblaa lä cule, cafä wamacö sibobö ajede ja.

¹⁷ ’¿Ö̦jö tawä? —bä cuma—. ¿Cafä wamacö ulifibö jamö yamacö jayuobä daanö? Bei wamacö ficalibö ca jamö yamacö juu mlai ja, afä uba totobä lä jilale jamö yamacö juu mlai ja, yamacö nia jayublou showadaofälöö. Cafä wamacö maubö uca jamö ma cui, yamacö amishi nia co̦o buomi. Showadi bä lä jublaaö wei yo jamö, yamacö nia cadidofälöö. Afä yama tä ulifi jayuaö showao mlao däjä, jayu yamacö boco mashi jamö ma cui, acasi yamacö boco mashi jamö ma cui, ö̦jamö lä yamacö nia bao bädaomi. ¿Ö̦jö tawä? —bä cuma, Edomöteli bada a nija.

¹⁸ Ö̦jö ma cui, abinaja Edomöteli a bada cuma. —Ma. Eja bä jayuo dijä, bämacö nabä nia queo mö bao —a cuma.

¹⁹ Ö̦jö däjä, Isaeli ebä a̦ wabäo co̦oma. —Showadi bä lä jublaaö wei yo jamö, yamacö nia shino juu. Camiyä yamacö ma cui, yamacö yalobö ma cui, afä mau ubä ja yamacö amishi co̦o bädao ja, yama tä nowa nia co̦amaö. ¿Ö̦jö tawä? Bei yamacö mamicönö, yamacö nia jayuo bädao, ¿ö̦jö tawä? —bä cuma.

²⁰ Ö̦jö ma cui, Edomöteli bada a wa̦ lojodoama. —Ma. Wamacö nia jayuo bädaomi —a cuma. Ö̦jö däjä, bada tänö cama ebä ca̦i bluca wawäa showalaliyoma. Bä ishobä täbä ca̦i madofi bluca tabomaje.

²¹ Inaja bä fa cuaanö, Edomöteli bänö Isaeli ebä jayuamanomije. Inaja tä cuoma cudeenö, Isaeli ebä juu a̦yoaö showadaoma.

Aaloni a bufi lä mlaqueno wei tä a̦

²² Cadesi tä ulifi jamö culanö Isaeli ebä aa fa culofälönö, Olo cäcö däjämö cama bä bluca waloquema.

²³ Ö̦jamö, Olo cäcö däjämö bä lä bälöblaono wei jamö, Jeobaa a wa̦ fama, Edomöteli bä sibobö ajede ja. Moisesi, Aaloni cäcöbö nija abinaja a cuma.

²⁴ —Aaloni a bufi mlao ajedou lä cule. Cama bada ebä jaba lä cuono wei bä nija a nia co̦cao. Isaeli ebä nija ya tä ulifi lä jöböale jamö ya nia waloamaö malä mlai. Meliba u fe lä jojole jamö camiyä ya wa̦ ja, wafäcö ja̦amodonomi yalo, ö̦jamö ya nia waloamaimi.

²⁵ ’Olo cäcö jamö, Aaloni a ma cui, bä ijilubö Eleasala a ma cui, ö̦jö cäcöbö ca̦i da dolequebo —a cuma—.

²⁶ Aaloni nija, nofi bäyäalewä bä camishibö lä yaio wei, wa bä nia jayublamadayou. Ö̦jö bä ja, Eleasala wa nia didiamaö nomöjöo. ¿Ö̦jö tawä? Ö̦jamö Aaloni a bufi nia mlao. Cama ebä jaba lä cuono wei bä nija a nia co̦cao —a cuma.

²⁷ Inaja Moisesi a cuaaö cadidioma, Jeobaanö a nowa lä tano weinaja showawä. Cama Isaeli ebä mamo bluca showao däjä, Olo cäcö jamö cäcöbö ca̦i dolequebefälöma.

²⁸ Ö̦jamö lä, Moisesinö Aaloni camishi ebä jayublamaledayoma. Bä fa jayublamalödunö, ö̦jö ebä ja, bä ijilubö Eleasala a didia nomöjömaquema. Ö̦jö cäcö bololo showawä ja, Aaloni a bufi mlaa showadaquedayoma. Ö̦jö däjä, Moisesi, Eleasala sho cäcöbö dömöa co̦baliyofälöma.

²⁹ Aaloni a cuami fa dalalöjenö, Isaeli ebä bluca wajäblaliyoma. A nomöa yubou showaoje däjä, 30 tä mö didi cublaliyoma.