Números 16 - Biblia Yanowamö

Coleinö bä bluca lä yaclämaleno wei tä a̦

^1-2 Ai däjä, Isaeli ebä lä cuinö, Moisesi a nabä co̦camomaje. Lewi nodiwä Colei e a̦fa bada lä culenö bä luluboma, Isala bä ijilubö enö. Coado a wa̦fa lä cuono wei nija, ö̦jö bä li nodiblaliyoma. Ö̦jö Colei a lä cui nija, Lubeni nodiwä 3 ebä bada yädäblaliyoma. Eliaba bä ijilubö Dadana, Abila ecöbö yädäblou mö fedulayoma, Belede bä ijilubö e ca̦i, Ono e a̦fa lä cule. Ö̦jö bä lä cuinö, Moisesi nija bä ca̦i jubeje, Isaeli ebä nija 250 bä bada yaialalemaje, bä a̦ showadi lä ji̦liano wejei bä lä cui.

³ Ö̦jö bä fa toujublalunö, Moisesi, Aaloni cäcöbö nabä icuquemaje. Abinaja cäcöbö nowa tamaje. —Wafäcö showadi lä cuaaö wei, inaja lä waiquiwä. Tä da mladamabölö. Cafä wafäcö nofi showadi yaimamodii. Jeobaa nija Isaeli bäma ecö lä cui, bluca bämacö yaia. A yaia lä mlale, moli ma cui a cuami. Jeobaanö bluca bämalecö ca̦i cua. ¿Ö̦jö tawä? Jeobaa yama ecö nija, ¿wedi tabä cafä wafäcö nofi li shino yaimamou bufi doblao, ö̦jö lä? —bä cuma.

⁴ Moisesinö bä a̦ fa ji̦lilänö, yedu mashita jamö a möfe boblaquema, Jeobaa nija.

⁵ Ö̦jö däjä, Coleinö cama ebä ca̦i lä cuono wei bä nija, abinaja Moisesi a cuma. —Fena ja, Jeobaanö cama e yai dodijiwä lä cui e nia jömaö fenao. Cama nijamö a yaia lä waiquile a nia jömaö, cama nija täbä dodobobä a lä ajedamaö wei. Jeobaa a dobäbä a lä yaile, ö̦jö a lä cui a nia shino ajedamaö.

⁶ ’Bei. Cafä ma cui, wa bä ca̦i lä cule bä ma cui, abinaja wamacö nia cuaaö. Acanafu wama bä wacö befi ca̦i tablabä, wama bä madofi fa däalalönö,

⁷ cowa wacöbä da tablamalöje. Fena ja, ö̦jö wacöbä feyaca jamö, täbä wa̦queshi ni cle̦deli lä u̦cucamou wei wama täbä fa maquecönö, Jeobaa a lä cule jamö wama bä befi ca̦i baa fenabayo. Jeobaanö a nia lä yaiaö wei tä nö ö̦jöböamobä, ö̦jö lä. “Ö̦jö a yaia waiquia”, a nofi tamamobä. Cafä Lewi nodiwä wama ecö showadi lä cuaaö wei, inaja waiquiwä —Moisesi a cuma.

⁸ Colei nija abinaja Moisesi a cuu co̦oma. —Bei. Wamale a̦ da ji̦lilä, Lewi nodiwä wama ecö lä cuinö.

⁹ Isaeli bäma ecö nija Jeobaa a lä bufiblamou wei a lä cuinö, ö̦jönö wamacö yailema. Isaeli bluca ebä nija cafä wamacö yailema, wamacö li yai ajedemabobä. ¿Ö̦jö tawä? —a cuma—. Cama e yano jamö wamacö yai ojodamobä wamacö. Jeobaa nija Isaeli ebä bluca dodijidawä cuobä, wama bä bayeliblabä wamacö. “Ö̦jö tä nowa cuami”, ¿wamacö bufi cuu tawä?

¹⁰ ’Cafä wa ma cui, afä bä ma cui, Jeobaanö wamacö ajedemabobä wamacö li —a cuma—. Jeobaa e yano jamö, cafä Lewi nodiwä wama ecö bluca ojodamomaö waiquia lä cule. ¿Wedi tabä, “Awei, tä dodijidawä waiquiwä”, wamacö bufi cuimi? ¿Wedi tabä bä nofi lä bäyäaö wejei bä nija, bei wamacö yädäo bufi li jo̦liblalou dicoo?

¹¹ Cafänö wa bä ca̦i bluca lä cule wamacö lä cuinö, Aaloni mlai, Jeobaa wama a nabä yai toujou lä cule. Wamacö bluca nia cuaaö shelelou mö lä feduo wei, Aaloninö tä nabä li shömöanomi. Cama nija wamacö a̦ bufi jushujuwä ca̦i fabä ami —Moisesi a cuma.

¹² Ö̦jö däjä, Eliaba bä ijilubö ecöbä nacamaö bufima, Dadana, Abila ecöbö lä cui. Ö̦jö ma cui, abinaja ecöbö cuma. —Yafäcö nia juimi.

¹³ Ejido tä nö ulifi niji fe lä balojoono wei jamö yamacö bälöoma. Tä nö ulifi ofi lä mlai jamö yamacö ma cuono wei ma cui, ei tä ulifi lä bloque wei jamö yamacö shämobä yamalecö co̦lema. “Inaja waiquiwä”, a bufi cuu mlai ja, bei a shino li nosiemodii bufi doblao dicoo.

¹⁴ Tä nö ulifi niji fe lä balojoi jamö, tä nö ofi lä mlai jamö yamalecö ca̦i junomi. Yama tä ulifi nofi yai tabobä tä ca̦i ulifi jöböanomi. Yamacö ficalimobä tä ma cui, uba yama totobä döabä tä ma cui, tä ca̦i jöböanomi bäwä. Yamacö mölabä, yamacö jubäbö malä mlai. Ma, yafälecö ma nacaö wei ma cui, cama nija yafäcö juu mlaicätä —cäcöbö cuma.

¹⁵ Ö̦jö cäcöbö wa̦no ja, Moisesi bejedi lä a jushudaliyoma. A fa jushudalunö, abinaja Jeobaa nija a cuma. —Cafä wa nia ma dobäböö däjä ma cui, etä da wailö. Ji̦ima bulo a bädawä ma cui, ya e däaö bädaonomi. Ya cöbä nö ca̦i bleaamaö buonomi —Moisesi a cuma.

¹⁶ Colei nija abinaja Moisesi a cuma. —Cafä sho, wa bä ca̦i lä cule bä sho, Jeobaa a lä cule jamö wamacö bluca nia juimaö. Aaloni a ca̦i. Fena ja wamacö nia bluca juimaö.

¹⁷ Bluca wamacö showadawänö, acanafu wama bä tablabä, afä wama bä madofi fa däabodunö, täbä wa̦queshi ni cle̦deli lä u̦cucamou wei täbä da maqueacöje. Ö̦jö däjä, Jeobaa a lä cule jamö wama bä befi ca̦i dodobou fenaoyolubä. ¿Ö̦jö tawä? Acanafu bä tablabeje 250 täbä nia madofi cuo. Afä wa tä nia ca̦i dodobou yädäo. Aaloni cama etä nia ca̦i dodobou showao —a cuma.

¹⁸ Ö̦jö cudeenö, acanafu bä tablabeje etäbä fa däabodujenö, acanafu bä wacö tablamaje. Ö̦jö däjä, täbä wa̦queshi ni cle̦deli lä u̦cucamou täbä maquecamaje. Jeobaa e yano jamö yoca lä cui jamö, Moisesi, Aaloni cäcöbö lä ublale jamö, ö̦jamö lä täbä ca̦i ublao mö feduo showaoma.

¹⁹ Ö̦jö däjä, cama Isaeli ebä bluca lä cule, Coleinö bä toujumaquema. Jeobaa e yano jamö yoca lä cui jamö, cäcöbö nabä icuquemaje. Ö̦jö bä bluca nija, yedu Jeobaa a shi̦i damolaliyoma.

²⁰ Moisesi, Aaloni cäcöbö nija abinaja Jeobaa a cuma.

²¹ —Fei täbä bluca lä cule bä nija cäcöbö da bayäcälö, ya täbä mö watäblaö showadaobä —a cuma.

²² Ö̦jö däjä, mashita jamö Moisesi, Aaloni sho cäcöbö möfe boblaquema, Yai Bada tä nija. Abinaja cäcöbö cuma. —Yai Bada wa tä lä bufiblamou wei wa tä. Cafä Yai Bada wa tä lä cuinö, bluca yamacö lä bälöblai yamalecö demi tabou. Yanowamö moli a doblou lä mlale jamö, bluca bä showadawä nija ¿bei wa nia jushudou showadao daanö? Inaja wa cuaabä wami —cäcöbö cuma.

²³ Ö̦jö däjä, abinaja Jeobaanö Moisesi a nowa tama.

²⁴ —Ja̦o. Fei bä bluca lä cule nija a wa̦ da fa, ö̦jö lä. Colei, Dadana, Abila bä yanobö jamö bä bayäcäblamaö da bufi —a nowa tama.

²⁵ Ö̦jö däjä, Dadana, Abila cäcöbö cuobä jamö, Moisesi a aa fa showadaalunö, ö̦jö nija Isaeli ebä bada yaua showalayofälöma.

²⁶ Ö̦jamö a fa waloicunö, bluca bä lä cule bä nija Moisesi a wa̦ fama. —Fei bä doblou lä mlale bä yanobö jamö, bä bayäcäblou da showadaalo, ¿ö̦jö tawä? Cama etäbä madofi ca̦i jubaö buo dijejä, cama bä nö bleaabä jamö, wamacö nö ca̦i bleaaö mö feduo mlaobä —a cuma.

²⁷ Ö̦jö cudeenö, Colei, Dadana, Abila bä yanobö jamö bä bayäcäa fa showadaalönö, Dadana, Abila sho cäcöbö wawälayoma. Bä lä fablaaö wei jamö cäcöbö ublaquema. Cäcöbö suwäbö ma cui, cäcöbö ijilubö ma cui, oshe ebä wai ma cui, ö̦jamö bä bluca ublaa ajedemaboböma.

²⁸ Ö̦jö däjä, abinaja Moisesi a cuma. —Bei. Camiyä ya cuaaö bufi lä doblao weinaja ya cuaaimi. Jeobaanö tä nabä li fa shömöbanö ya tä li taö. ¿Ö̦jö tawä? Ya wa̦ bejedi dablamobä ei ya wa̦.

²⁹ Jeobaa a shominajaaö mlai ja, showadi yanowamö täbä nomaö lä cuaaö weinaja, ya̦cumö fei bä cublou ja, wamale jolemou dablabä cätä. “Ei malä cui, Jeobaanö a shömano malä mlai”, wamale nofi tabobä tä nia cuo.

³⁰ ’Ö̦jö ma cui, ai däjä wama tä dablaö balöono lä mlai, Jeobaanö fei däjä tä taö nö quiliaö ja, fei wama bä nia li jolemou dablaö —a cuma—. Mashita a caficö fa leledalunö, cama bä bluca sufaö nö mlao showadao ja, ö̦jö wama bä shino nia jolemou dablaö. Cama bä ma cui, cama etäbä ca̦i bluca ma cui, bä lä nomaö wei bä cuobä jamö, demi bä bluca queo showadaofälöö ja, “Jeobaa a nofi wa̦libomaje yalo bä li sufamolayoma”, wama bä nofi nia tabou —Moisesi a cuma.

³¹ A wa̦ faö waicou däjä, bä lä ublale jamö tä mashita bada iclacadaliyoma.

³² Mashita a caficö fa leledalunö, cäcöbö sufaa showadaamalema, cama ebä ca̦i bluca lä cule bä sho. Colei ebä ca̦i bluca sho. Madofi ebä ca̦i.

³³ Inaja tä fa cublalunö, cama bä ma cui, cama ebä bluca ma cui, bä lä nomaö wei bä cuobä jamö, demi bä bluca queo fa showadaofälönö, mashita a comablou co̦layoma. Cama Isaeli ebä bluca nija bä dablamou mladou showadalayoma.

³⁴ Bä si̦lalamou nö lä quiliaö wei bä a̦ ja, Isaeli ebä ublaa fe lä fa̦yoono wei bä quilili blajao showadaolaliyoma. —¡Mashita anö bämalecö sufalö! —bä cuolanö bä bluca docuolaliyoma.

³⁵ Jeobaa nija täbä wa̦queshi ni cle̦deli lä u̦cucamou wei täbä befi ca̦i lä dodobono wejei bä nö ca̦i blea showadaamalalema. ¿Ö̦jö tawä? Jeobaa a lä cule jamö wacö bada fa famalönö, ö̦jö 250 bä mö bluca watäblamaö showadalayoma.

Acanafu bä tablabeje täbä madofi lä co̦amaleno wei tä a̦

³⁶ Ö̦jö däjä, Moisesi nija abinaja Jeobaa a cuma.

³⁷ —Nofi bäyäalewä Aaloni bä ijilubö Eleasala e lä cui, ö̦jö a da yömölalö. Wacö lä yäle jamö acanafu bä tablabeje täbä madofi lä jilai, täbä co̦ablamaö da bufi. Wacöbä jilawä lä showai, blajawä wacöbä nia shäyäjamou. Ö̦jö täbä madofi malä yaile,

³⁸ täbä doblou fa mlacunö täbä mö lä watäblamolufe etäbä madofi lä cui. Camiyä Jeobaa ya nija täbä dodobomaje cudeenö, täbä yaia. ’Ö̦jö cudeenö, wa täbä yadicamaö fa bufinö, täbä nia faujublamaöje —a cuma—. Jenasiwä täbä nia tablaöje. Ö̦jö däjä, ö̦jö lä täbä jenasiwänö, yalo bä lä dodoblamou wei bä maqueblamobä täcö lä cui, täcö fe nia yojoblaöje. Inaja wamacö fa cuaanö, Isaeli ebä lä cuinö täcö dablaöje däjä, ya lä cuaafe showadi tä nofi nia jaducubodiije —a cuma.

³⁹ Ö̦jö cudeenö, acanafu bä tablabeje täbä madofi lä cui, nofi bäyäalewä Eleasalanö täbä madofi co̦alalema, täbä lä ö̦shölayono wei bänö, täbä madofi lä dodobono wejei täbä lä cui. Duo shibänö täbä madofi tablamoma. Täbä fa co̦alalönö, jenasiwä täbä yadicamaö bufima, Jeobaa nija bä yalo maqueblamobä täcö lä cui, täcö fe yojoblaabeje.

⁴⁰ Täcö fe lä yojoblaleno wejei tänö, Isaeli ebä bufi nia jaducumaboma. Jeobaa nija nofi bäyäalewä lä mlai, Aaloni ebä lä mlai, bä ajedou bashio bädao mlaobä. ¿Ö̦jö tawä? Jeobaa nija täbä wa̦queshi ni cle̦deli lä u̦cucamou täbä dodobou bädao fa bashiojenö, Colei sho, cama ebä nö bluca bleaa lä culaliyono weinaja bä cuaaö dicoo mlaobä. Moisesi nija Jeobaanö Eleasala a taamaö lä bufino weinaja, inaja showawä a cuaama.

⁴¹ Ö̦jö ma cui, ö̦jö tä fena ja, Isaeli ebä bluca lä culenö, Moisesi, Aaloni cäcöbö nabä fa icuicöjenö, bä a̦ bufi jushujuwä ca̦i faö co̦oma. —Cafä wafäcönö Jeobaa wafä ebä shämalema —bä cuma.

⁴² Moisesi, Aaloni cäcöbö nabä icuo waiquioje däjä, Jeobaa e yano jamö bä mö yaiblou nomöjölayoma. Tä fa mödalöjenö, ölajashi a sublenö, yano a fe fa̦yoa dalalemaje. Jeobaa a shi̦i bada wawäblaliyoma.

⁴³ Ö̦jö däjä, Jeobaa e yano jamö bä lä fablaaö wei tä mashi ja, Moisesi, Aaloni sho cäcöbö fa icuicunö,

⁴⁴ Moisesi nija abinaja Jeobaa a cuma.

⁴⁵ —Fei bä bluca lä co̦camole bä nija cäcöbö da bayäcädalu, ya bä mö watäblaö showadaobä —a cuma. Ö̦jö däjä, mashita jamö cäcöbö möfe boblaa showadaquema, Jeobaa nija.

⁴⁶ Aaloni nija abinaja Moisesi a cuma. —Acanafu bä lä jiqueamou wei, afä wa tä madofi fa dälänö, yalo bä lä dodoblamou wei bä maqueblamobä täcö jamö, afä tänö wa wacöbä jiqueabä. Täbä wa̦queshi ni cle̦deli lä u̦cucamou wei wa täbä fa maqueabodunö, Jeobaa wa wa̦ oquejeblamaö co̦obä, fei bä bluca lä co̦camole bä nijamö lobe tä ca̦i da lälälö. Jeobaa a lä jushuole etä wawäblou waiquia. Etä wayu quea waiquiquei lä cufe —a cuma.

⁴⁷ Ö̦jö cudeenö, Moisesinö a nowa lä taö weinaja, inaja showawä Aaloni a cuaama. Bä bluca lä co̦camole bä möamo jamö etä ca̦i läläa möamoblaliyoma. Cama bä nija tä wayu quea waiquiquema. Täbä wa̦queshi ni cle̦deli lä u̦cucamou wei, madofi etä jamö täbä fa maquequecönö, Jeobaa nija bä doblou lä mlai etä nowa mladamaö bufima.

⁴⁸ Bä lä demi wei bä nijamö, nomawä bä nijamö ca̦i, Aaloni a läblou möamoblaliyoma. A fa läblalunö, tä wayu mladou co̦layoma.

⁴⁹ ¿Ö̦jö tawä? Bluca bä nomalaliyoma. Ö̦jö tä wayunö bä lä nomalaliyono wei, 14.700 bä cuoma. Colei a lä cuinö, cama ebä nö ca̦i bleaaö lä balölaliyono wei, ö̦jö bä ca̦i.

⁵⁰ Tä wayu mladou co̦layou ja, Moisesi nijamö Aaloni a cua co̦layoma, Jeobaa e yano jamö bä lä fablaaö wei jamö.