Números 14 - Biblia Yanowamö

Isaeli ebänö Yai Bada a wa̦ lä waileno wejei tä a̦

¹ Ö̦jö bä a̦ fa ji̦liläjenö, bä a̦ bluca nacläama. Bä ö̦cöö fe jaludima.

² Ö̦jö däjä, Isaeli ebä a̦ bufi bluca jushujuwä ca̦i fama, Moisesi, Aaloni cäcöbö nija. Abinaja bä bluca cuma. —Ejido jamö yamacö nomaö showadao fa cunoja, tä nö doblaobö wei. Ei tä ulifi lä blocole jamö ma cui, bämacö nomablou showadao fa cunoja, tä nö doblaobö wei.

³ ¿Wedi tabä eja yamalecö nia lä shäablaö wejei jamö, Jeobaanö yamalecö li bälaö dicoa cule? Yamacö suwäbö ma cui, yamacö ijilubö ma cui, bä nia wayulefälööje. ¡Ejido jamö yamacö mö li yabaaö co̦o fa cunoja, tä nö shino doblaobö wei! —bä cuma.

⁴ Abinaja bä nowa ca̦i tayoma. —Bei. Ejido jamö bämacö mö yabaaö da co̦ofälö. Bada bäma a da yaia, ö̦jönö bämalecö lulubou co̦ofälöbä —bä nowa tayoma.

⁵ Ö̦jö däjä, cama Isaeli ebä mamo bluca mötale ja, mashita jamö Moisesi, Aaloni sho cäcöbö möfe boblaquema, Jeobaa nija.

⁶ Nuni bä ijilubö Josué a lä cui, Jefone bä ijilubö Calebi sho, cäcöbö bufi nö bleaama. Cäcöbö nö nia wajäwä fa ö̦jöböamamonö cäcöbö camishibö cacablamolayoma. Tä ulifi lä bomano wejei bä nija cäcöbö coyocooma.

⁷ Cama Isaeli ebä bluca nija abinaja cäcöbö cuma. —Yama tä ulifi bomaö ja, yama tä ulifi lä jayuqueno wei tä ulifi dodijidawä dodijiwä.

⁸ Jeobaa bäma a bufi doblamabou ja, ö̦jamö lä bämalecö nia lulubou. Ö̦jö tä nö ulifi niji lä dodijii, tä nö ofi lä mlai tä ja, bämalecö dobäö wä.

⁹ ¿Ö̦jö tawä? Jeobaa a wa̦ waii dijejä, ö̦jö lä. Ö̦jamö bä lä bälöle bä nija bä quili dijä. Lobe bäma bä nia yashublaö showadao. Bä lä bayeliblamono wei, fei däjä etä cuami waiquiwä. Jeobaanö bämalecö ca̦i cua. Bä nö quili ta dijejä —cäcöbö cuma.

¹⁰ Ö̦jö ma cui, maa mabänö cäcöbö shäyäbeje, cama bä a̦ bluca faö showadaoma. Ö̦jö däjä, Jeobaa e yano jamö, Isaeli bluca ebä nija, yedu etä shi̦i damolaliyoma.

¹¹ Moisesi nija abinaja Jeobaa a cuma. —Uo. ¿Fei bänö wale nofi wa̦libou shi wa̦lii waiquiweje daanö? Wale nö lojode ö̦jöböabeje, cama bä nija ya nö bluca ma quiliano wei ma cui, ¿wale a̦ bejedi bufiimi shi wa̦lii waiquiweje tawä?

¹² Shawala tä wayunö ya bä nö nia bleaamaö, ya tä a̦fa ulifi lä wäyäno wei jamö bä bälöo mlaobä. Ö̦jö däjä, afä bä lä nodiblou wei ya bä nia shino yai bayelibou nomöjöo. Fei bä ma bluca wei ma cui, afä ya bä nia yai blucablamaö. Fei bä ma lojode wei ma cui, afä ya bä nia yai lojodomabou —Moisesi nija a cuma.

¹³ Ö̦jö ma cui, abinaja Moisesinö Jeobaa a nowa tama. —Ejido tä ulifi jamö, cafä wa lojodenö fei wa bä co̦lema cäbä. Wa bä nö bleaamaö nomöjöo dicoo ja, Ejido jamö bä lä bälölenö tä a̦ ji̦liaöje däjä,

¹⁴ Canaanateli bä nija tä a̦ nia wäaöje. ¿Ö̦jö tawä? Cafä Jeobaa wanö, fei wa bä ca̦i lä cule tä a̦ ji̦libou waiquiaje. Cafä Jeobaa wawädowä wa malä dablamou wei. Cafä wa lä cuo wei a ölajashinö bä fe yojoa. Ölajashi comadiwä ajamö wa culanö, wa fa balöonö wa bä jalu däjä lulubou. Didi däjä ma cui, cowa wacö comadiwä jamö wa fa cuonö, wa bä ca̦i lulubou fe jaluu.

¹⁵ ’¿Ö̦jö tawä? —Moisesi a cuma—. Fei wa bä waicaö showadao dicoo ja, wa wa̦fa lä ji̦libodujei bä bluca bälöjou lä yaiblai bä lä cui, abinaja bä nia cuu.

¹⁶ “Quiji bä nija Jeobaa a wa̦ nö wäo ja, tä a̦fa ulifi wäquema ma cui, ö̦jamö bä lulubou doblonomi. Bä lulubou doblonomi yalo, tä ulifi lä bloque wei jamö bä bluca shäalalema”, bä nia cuu.

¹⁷ ’Jeobaa wa lä cui, a lojode da damolalu, wa wa̦ nö wäo ja wa lä cuno weinaja showadawä —a cuma—. Abinaja wa cuma.

¹⁸ “Jeobaa ya jushudou si ijejewämi”, wa cuma. “Ya bä lä nofimaö wei, showadi ö̦jö tä nia shino wawäö”, wa cuma. “Bä cadidou ma mlai ma cui, bä nofi ma jushuaö wei ma cui, ya bufi nia asio”, wa cuma. “Ö̦jö ma cui, ya tä nowa tabobä tä cua ja, ya bufi nia lämoimi. Cama bä ma cui nija, bä ijilubö ebä ma cui nija, bä fääshä ebä ma cui nija, ö̦jö bä ijilubö ebä ma cui nija, ö̦jö bä nija ya tä nowa nia tabou nodiablalou showao”, wa cuma.

¹⁹ ’¿Ö̦jö tawä? —a cuma—. Wa bä lä nofimaö wei, showadi ö̦jö tä nia wawäö fe balojoo cudeenö, fei bä cadidou lä mlale, etä nowa da mladamalö. Wa etä nowa showadi lä mladamaö weinaja showawä. Ejido jamö bä jaba lä cuono wei däjä ma cui, äyämö bä lä juimi däjä ma cui, showadi wa etä nowa mladamaö cuaaö malä showale —a cuma.

Jeobaanö Isaeli ebä nö lä bleaamano wei tä a̦

²⁰ Ö̦jö däjä, abinaja Jeobaa a cuma. —Awei, ya bufi cuu waiquia lä cule. Ya etä nowa mladamaö waiquia, wa lä cufenaja showawä.

²¹ Ö̦jö ma cui, ei ya wa̦ lä cui ya wa̦ bejedi. Ya cua shi lä wa̦lile ya wa̦ nö wäo lä cule. Ya lä doblale ya lä cui, ya wa̦ nia shominajaö majöomi.

^22-23 Bä nö badabö nija ya tä a̦fa ulifi ma wäqueno wei ma cui, ei bä doblou lä mlai bänö tä nia ulifi möimi waiquiweje. ’Ejido jamö ma cui, ei tä ulifi lä blocole jamö ma cui, cama bä nija wawädowä ya shi̦i dablamou wawädooma —a cuma—. Ya nö lojode ö̦jöböamobä, bluca ya nö quiliama. Ö̦jö tä bluca ma dablaö wejei ma cui, wale bejedimou shino wabadii dicooje. 10 wale wabaö cua waiquiaje. Wale a̦ ca̦i ji̦liblaimije. Ö̦jö cudeenö, ei bänö, wale nofi lä wa̦libou wejei bä lä cuinö, ya tä a̦fa ulifi lä wäqueno wei tä nia ulifi dablaimije.

²⁴ Ö̦jö ma cui, ya nosie juamobä a Calebi lä cui, a lä juno wei jamö ya ca̦i nia li juu. A bufi li shomi yalo, bei bufi cadidiwänö wale a̦ juaö cudeenö, ö̦jamö ya ca̦i nia li juu. Cama ebä lä nodiblou wei bänö, tä nia ulifi lojodobou nodioje.

²⁵ ’Bei —a cuma—. Täbä yalö lä möamobe jamö, Amalecoteli bä sho, Canaanateli bä sho bä bälöjöwä waiquiwä yalo, fena ja wamacö mö nia yabaaö co̦o showadaofälöö. Tä ulifi lä bloque wei jamö wamacö waloobä, modu Wacä u jamö yo shadia mö lä cule jamö bä ca̦i da juläfälö —a cuma.

²⁶ Moisesi, Aaloni cäcöbö nija abinaja Jeobaa a cuma.

²⁷ —Fei bä lä cule ¿camiyä nija bä a̦ bufi nia jushuwä ca̦i faö shi wa̦lii waiquiwä daanö? Bä bluca dobloimi waiquiwä. Isaeli ebä a̦ bufi jushujuo ca̦i lä faö wei, ya bä a̦ ji̦liaö waiquia.

²⁸ Ö̦jö bä nija wafäle wa̦no wäyäö da co̦o. “Jeobaa yafä a̦no wäyäö lä cule”, wafä bä nowa ta. Ei ya wa̦ lä cui, ya bejedimou. Ya jolemoimi. Ya bä cuu lä ji̦lileno weinaja, inaja showawä ya bä nia taamaö.

²⁹ Tä ulifi blocoobä jamö, bä nomawä nia yabucuomobodayou. ’Lasha 20 a famaö lä waiqui wejei bä bluca ma cui, lasha 20 a jamö bä lä jayuaö wei bä ca̦i bluca ma cui, ö̦jö ya bä a̦fa bluca taö —a cuma—. Camiyä nija bä bufi bluca jushujuwä ca̦i lä fano wei,

³⁰ ya tä a̦fa ulifi lä wäqueno wei jamö ya bä bälömabobä, moli ma cui ya bä nia jumaimi. Jefone bä ijilubö Calebi e sho, Nuni bei ijilubö Josué e sho, ö̦jö cäcöbö shino.

³¹ Ö̦jö ma cui, bä ijilubö ebä nia jo̦wa lä wayuafälöno wejei, ö̦jö ya bä nia shino jumaö ayao. Bada bänö etä ulifi nofi ma wa̦libono wejei ma cui, ö̦jamö bä ijilubö ebä nia shino dodijidawä bälöo.

³² ’¿Ö̦jö tawä? —a cuma—. Cama bä lä cui, ei tä ulifi lä blocole jamö bä nia nomawä jilamou cuaaö.

³³ Tä ulifi wa̦lidiobä jamö bä ijilubö ebänö, oweja ebä ca̦i juu showaoje däjä, lasha 40 a nia famaöje. Tä ulifi lä blocole jamö, bada bä lä cui bä jödödöwä nomablou showao mlao däjä, bä nö nia bluca bleaaö. Cama bada ebä cadidonomi tä nowa ja, bä nö nia bluca bleaaö balöo.

³⁴ Tä ulifi bomaöje däjä, 40 tä mö didi lä tablamaleno wejeinaja, inaja showawä bä nö bleaaö showai däjä, lasha 40 a nia famaö cuoje. ¿Ö̦jö tawä? Täbä mö didi lä tablamaleno wejeinaja, lasha ya nia famaö cuo. Lasha 40 a famaö mlao showaoje däjä, bä doblou lä mlaono wei tä nowa ja, bä nö nia bleaaö. ’Ya nö lä yuo wei tä nia dablaöje —a cuma—. Inaja wafä bä nowa ta.

³⁵ Camiyä Jeobaa ei ya wa̦. Cama bä bluca doblou lä mlale, camiyä wale nabä lä toujolajei, ei tä ulifi lä blocole jamö bä nia waicou. Bejedi lä ya bä nia waicaö. Ö̦jamö bä nia nomablou —a Jeobaa cuma.

Canaana tä ulifi lä bomano wejei bä lä nomalaliyono wei tä a̦

³⁶ ¿Ö̦jö tawä? Tä ulifi bomabeje, Moisesinö bä lä shömöleno wei bä lä cui, bä doblonomi. Tä a̦fa ulifi wayu wäyäö fa co̦bojolojenö, cama bä a̦nö Isaeli ebä bluca jushuamalalemaje. Moisesi nija bä a̦ bufi bluca jushujuwä ca̦i fama.

³⁷ Tä a̦fa ulifi wayu wäyäö lä co̦ojolono wejei bä lä cui, wayu ai tänö Jeobaanö bä nomaa showadaamalalema.

³⁸ Ö̦jö ma cui, Nuni bä ijilubö Josué a lä cui, Jefone bä ijilubö Calebi a lä cui sho, ö̦jö cäcöbö shino demi cuo showao fe yadioma. Tä ulifi bomabeje bä ai lä juno wei bä bluca nomalaliyoma.

Canaana jamö bä juu fe yadiobä bä wabäo nö lä bleaano wei tä a̦

³⁹ Bä nia waloamaö lä mlai, Isaeli ebä bluca nija Moisesinö tä a̦ wäyäö däjä, bejedi lä bä bufi wa̦lidiblaliyoma. Jeobaa a wa̦no ja, bä bufi fa wa̦lidiblalunö, bä nomöa däayou ja bä ö̦cöma.

⁴⁰ Ö̦jö tä fena ja bä jocäa fa fenalönö, tä ulifi lä jefubö wei jamö bä juu fe yadioma. Abinaja bä cuolanö tä lä ösöle jamö bä dolequebefälöma. —Bei. Eja bämacö cua waiquia lä cule. Jeobaanö tä a̦fa ulifi lä wäyäno wei jamö bämacö juu fe da yadio. Bejedi lä bämacö doblonomi dicowä —bä cuma.

⁴¹ Ö̦jö ma cui, abinaja Moisesi a cuma. —Jeobaanö tä tamaö lä bufii wei, ¿wedi tabä wama tä taimi showawä? Wamacö doblobä tä cua malä mlai.

⁴² Bä ju dijä. Bä nö lä nabämou wei bänö, wamacö nö blemalaleije. Jeobaanö wamacö ca̦i juu malä mlai.

⁴³ ¿Ö̦jö tawä? Ö̦jamö Amalecoteli bä ma cuinö, Canaanateli bä ma cuinö, wamacö nö dabou waiquiaje. Wamacö nabä fa queicujenö, wamacö nia shäablamou. Jeobaa wama a wa̦ ji̦liaö mladou majölayoma cudeenö, ö̦jönö wamacö ca̦i cuo mlaicätä —a cuma.

⁴⁴ Ö̦jö ma cui, tä ulifi lä jefubö wei jamö bä jole juu bashio bädaoma, tä lä ösöi jamö. Jeobaa a wa̦no oni lä didile defi ca cuo feyaö showaoma ma cui, Moisesi a ca̦i cuo feyaö showao däjä, bloque bä aa bälayoma.

⁴⁵ Ö̦jö däjä, tä ulifi lä ösöle jamö Amalecoteli bä lä bälöono wei bä sho, Canaanateli bä lä bälöono wei bä ca̦i sho, bä nabä dömöa mö balayofälömaje. Bä nö bluca blemalalemaje. ¿Ö̦jö tawä? Oloma tä ulifi jamö ma cui, bä nosi fa dälöfälöjenö, bä nö bleaamaö cuaafälömaje.