Números 13 - Biblia Yanowamö

Canaana tä ulifi lä bomano wejei tä a̦

¹ Moisesi nija abinaja Jeobaa a cuma.

² —Canaana tä ulifi jamö, bä shömöa da balölö, Isaeli wama ecö nija ya tä ulifi lä jöböale tä ulifi bomaö balöobeje. Isaeli bä ijilubö 12 ebä nija bä yaiablalou lä nodiaö wei, ö̦jö bä lä cui nija, moli wa bä fa yaialalönö, 12 wa bä nia shömaö. Bada wa bä nia shino yaiablaö, cama ebä ca̦i yai lä cuo wejei —a cuma.

³ Ö̦jö cudeenö, Balana tä ulifi lä blocole jamö culanö, Moisesinö bada bä shömölema, Jeobaanö tä tamaö lä bufino weinaja showawä. Bä lä shömöleno wei, bada bä shino bluca cuoma, Isaeli ebä ca̦i lä bälöono wejei.

⁴ Bä bada lä shömöleno wei, abinaja bei bä a̦fa cuoma. Lubeni ebä nija, Saculo bä ijilubö Samua e fa yailönö a shömölema.

⁵ Simeoni ebä nija, Oli bä ijilubö Safada e fa yailönö ö̦jö a ca̦i shömölema.

⁶ Judawä ebä nija Jefone bä ijilubö Calebi e fa yailönö ö̦jö a ca̦i.

⁷ Isacala ebä nija José bä ijilubö Icalo e fa yailönö ö̦jö a ca̦i.

⁸ Eflaini ebä nija, Nuni bä ijilubö Osea e fa yailönö, ö̦jö a ca̦i nomöjöwä.

⁹ Bejamino ebä nija, Lafu bä ijilubö Badi e fa yailönö, ö̦jö a ca̦i.

¹⁰ Sabulono ebä nija, Sodi bä ijilubö Cadielo e fa yailönö, ö̦jö a ca̦i mö feduwä.

¹¹ José bä ijilubö Manasesi ebä nija, Susi bä ijilubö Cadi e fa yailönö, ö̦jö a ca̦i.

¹² Dani ebä nija, Jemali bä ijilubö Amielo e fa yailönö, ö̦jö a ca̦i.

¹³ Aselo ebä nija, Micaelo bä ijilubö Sedulu e fa yailönö, ö̦jö a ca̦i.

¹⁴ Nefitali ebä nija, Babisi bä ijilubö Nabi e fa yailönö, ö̦jö a ca̦i.

¹⁵ Cadö ebä nija, Maqui bä ijilubö Jewelo e fa yailönö, ö̦jö a ca̦i.

¹⁶ Tä ulifi bomabeje, Moisesinö bä shömabä bä lä yaialaleno wei, ö̦jö bä a̦fa bluca cuoma. Nuni bä ijilubö Osea a wa̦fa lä cuono wei, Moisesinö Josué a wa̦fa jilaa majöquema.

¹⁷ Canaana tä ulifi bomaö balöobeje, Moisesinö bä shömaö ja, abinaja bä nowa tama. —Neque tä ulifi jamö wamacö fa juläfälönö, tä ulifi lä jefubö wei jamö wamacö fa alufälönö,

¹⁸ wama tä ulifi möö cuaabä. Ö̦jamö bä lä bälöle, jai bä nö wa̦lojabä bä mömou cuwä da möje. Täbä lä bälöjöi täbä bluca da mö.

¹⁹ Cama bä lä bälöle bä ulifibö ca̦i dodijidawä da möje. Ulifi jamö bä bälöblawä bädawä ja, ala nabänö bä yai ji̦coloblawä ja, ö̦jö wama tä nia ca̦i möö.

²⁰ Bä ulifibö ishabina ca̦i da möje. Fii dodijidawä fibä ca̦i ublajawä da möje. ¿Ö̦jö tawä? Bä bufi nö da wa̦lojoicu. Wamacö juu co̦imabä jamö, ö̦jamö bä nii lä cublai, ai wama bä ca̦i nii yefiboimabä —bä nowa talema. ¿Ö̦jö tawä? Uba a jaba wacäö a cuoma.

²¹ Bä aa fa showadaalunö, tä ulifi bluca bomaö cuaamaje. Sini tä ulifi lä blocole tä ulifi jaba fa bomöcöfälöjenö, täbä ulifi bluca bomaö cuaaö showaoje däjä, Leobo tä ulifi jamö bä waloquema, Amada yo lä bale jamö.

²² Neque tä ulifi jamö bä fa alufälönö, Eblono tä jamö bä waloa nomöjöquema. Ö̦jamö lä, Anaco nodiwä bä lä yaläjei bä bälöoma, Aimano, Sesai, Damai bä a̦fa lä cule. Eblono tä shabono lä cui, yedu ja tä blao balöoma. Täbä nö badabö jaba lä cuono wei bänö, Ejido jamö Soana tä shabono taö fa balöojenö, lasha 7 a fa famalöjenö, ö̦jö Eblono tä shabono taö nomöjöomaje. Ö̦jö bä yafibö cuo showaoma. Tä ulifi bomabeje ö̦jamö bä fa waloicunö,

²³ Esecolo tä fe yalö lä möamobe jamö bä waloa fa majöbalunö, uba cäcö bada shi̦co yaua dalalemaje. Cäcö bada yaua fa dalalöjenö, toto befi ca̦i fa manölöjenö, cäcö befi ca̦i yalucua co̦lefälömaje. Ai bä mö feduwä lä cuinö, ai bä ca̦i nii yefia mö fedulefälömaje. Ai bänö, ai cäbä. Ai bänö, ai cäbä.

²⁴ ¿Ö̦jö tawä? Isaeli ebä lä cuinö, uba cäcö bada lä manöleno wejei tä nowa ja, ö̦jö tä fe yalö lä möamobe, Esecolo tä a̦fa ulifi jilaquemaje.

Tä a̦fa ulifi wäyäö lä co̦ojolono wejei tä a̦

²⁵ Tä ulifi lä bomano wejei bä lä cui, 40 tä mö didi fa tablamalöjenö, bä co̦blou co̦layoyoluma.

²⁶ Balana tä ulifi lä blocole jamö bä waloa fa co̦icunö, Cadesi jamö bä co̦blaliyoma, Moisesi, Aaloni sho cäcöbö lä cuinö Isaeli ebä ca̦i bluca lä cuböono wei jamö. Ö̦jö bä bluca nija tä a̦ wäyäö showadaojolomaje. Nii bä ca̦i waloa lä co̦queno wejei bä ca̦i mömamaje.

²⁷ Moisesi nija abinaja bä cuma. —Wa tä nabä ulifi lä shömano wei jamö, yama tä ulifi mödayoma. Tä nö ulifi niji fe balojowä, tä nö ulifi ofimi. Täbä nii ai lä cublai, ei bei täbä.

²⁸ ’Ö̦jö ma cui, ö̦jamö bä lä bälöle bä lojode —bä cuma—. Bä shabonobö bada fe balojowä. Ala nabänö bä ji̦coloblawä talei. Abinaja ca̦i. Anaco nodiwä yama bä ca̦i bada dalalema. ¿Ö̦jö tawä?

²⁹ Neque tä ulifi jamö, Amalecoteli bei bä bälöblawä. Tä ulifi lä jefubö wei jamö, idida bä ma cui, jebuseo bä ma cui, amoleo bä ma cui, ö̦jamö ö̦jö bä bälöjöwä mö feduwä. Modu u sibo jamö, Canaanateli bä bälöblawä, Jodana u sibo jamö ca̦i —bä cuma.

³⁰ Ö̦jö bä a̦ ja, Moisesi nija bä a̦ bluca ma fano wei ma cui, Calebinö bä a̦ wasölema. Abinaja a cuma. —Bei. Bämacö aa fa showadaalöfälönö, bäma tä ulifi däa da showadao, camiyä bämacö bälöo läo nomöjöobä. Bämacö nö wa̦lojabä bämacö waiquiwä malä cui —Calebi a cuma.

³¹ Ö̦jö däjä, Calebi sho ai bä lä juno wei bä a̦ läblaliyoma. —Ma —bä cuma—. Ö̦jamö bä lä bälöle bäma bä nia yashuu dobloimi. Bämacö nö nia wa̦lojaimi. Cama bä nö nia shino wa̦lojaö ayao —bä cuma.

³² Inaja bä fa cuaanö, tä ulifi lä bomano wejei bänö, tä a̦fa ulifi wayu tamaje. Abinaja Isaeli ebä nija bä cuma. —Yama tä ulifi bomabä yamacö lä juno wei jamö, tä ulifi wayu talei. Ö̦jö tä ulifi wayunö ö̦jamö bä lä bälöle bä nomablou. ¿Ö̦jö tawä? Ö̦jamö yanowamö yama täbä lä dalaleno wei, bä bada bluca yaläjäwä dodijiwä bä lä talei.

³³ Anaco nodiwä yama bä ca̦i ö̦jamö dalalema, täbä yaläjäwä ca̦i jaba lä bälöono wei täbä nodiwä. Ö̦jö bä li bada yaläjäwä ayao cudeenö, sequi sequima bä wai mömou wiisibö lä culenaja, yamacö mömou tablamalemaje. ¿Ö̦jö tawä? Inaja camiyä yamacö nofi tamamoma. Cama bä ma cuinö, inaja showawä yamalecö nofi ca̦i tabomaje —bä cuma.