Números 12 - Biblia Yanowamö

María a lä wa̦lidiblaliyono wei tä a̦

¹ Moisesinö Ediobiateliyoma a suwä dälema yalo, ö̦jö a suwä nowa ja, bä amiyobö María a ma cuinö, bä a̦iyobö Aaloni a ma cuinö, Moisesi a wa̦fa taböma.

² Abinaja cäcöbö cuma. —Jeobaa a wa̦no wäyämobä, ¿Moisesi a wa̦ shino wayomaö ayao daanö? ¿Camiyä yafäcö a̦ ca̦i ji̦limou mö feduobä, yafäcömi daanö? —cäcöbö cuma. Inaja cäcöbö lä cuno wei, Jeobaanö cäcöbö a̦ ji̦lilema.

³ ¿Ö̦jö tawä? Cama Moisesi a jömamono lä mlai a cuoma. Ai bä jömöo lä mlai bä bluca ma bälöblamono wei ma cui, Moisesi a shino yai jömamonomi dodijiwä.

⁴ Ö̦jö cäcöbö a̦ ja, yedu Jeobaa a wa̦ nocalayoma. Moisesi, Aaloni, María, abinaja ö̦jö bä nowa bluca taö showadaoma. —Cafä 3 wamacö lä cui, iba yano jamö bä da juima —bä nowa tama. Ö̦jamö bä juu fa showadaonö,

⁵ ölajashi a bada comadiwä jamö Jeobaa a fa itoimanö, cama e yano jamö yoca lä cui jamö a fa ublaalunö, Aaloni, María sho cäcöbö nacaa ajedelema. Cäcöbö icua showadaquema.

⁶ Cäcöbö fa icuicunö, abinaja a cuma. —Wafäle a̦ da ji̦li. Cafä wamacö nija ya wa̦no wäyälewä a cuo däjä, jai majali etä jamö, ö̦jö nija ya dablamou talei. Ya fa majalimomanö ya wa̦ wayomaö.

⁷ Ö̦jö ma cui, ya nosie juamobä a Moisesi lä cui, inaja ya taamaimi. Ya nabä bluca lä shömaö wei tä ma cui ja, “Ö̦jö showadi a cadidole cätä”, ya nofi yai tabou.

⁸ ’Cama wawädowä ya wa̦ li wayoblaamaö —a cuma—. Shominaja ya etä a̦ wäyäö yacäablaloimi. Cama nija Jeobaa wawädowä ya e dablamou. ¿Ö̦jö tawä? Wale nosie yai lä juaö wei, ö̦jö iba a. Inaja Moisesi ya nofi ma tabole ma cui, ¿wedi tä tabä wafäcö jölaö li quiliimi, ö̦jö lä? —Jeobaa a cuma.

⁹ Ö̦jö cäcöbö nija Jeobaa a jushudou fa showadalonö a aa co̦layofälöma.

¹⁰ Jeobaa e yano jamö culanö, ölajashi a ösöa co̦layono wei ja, María a wa̦lidiwä damoa jälaliyoma. Täbä sicö lä jodemaö wei tä wayunö, sicö mömou au nö quilijio nö mlaoma. María nija Aaloni a mö fa yaiicunö, sicö jode dalalema.

¹¹ Moisesi nija abinaja Aaloni a cuma. —Shädayai, bada tä. Yafälecö nö bleaamaö dicoo dijä. Jai yafäcö bufi daomi yafäcö a̦ cuaaö dicoo ja, yafäcö dobloimi waiquiwä.

¹² Suwä bä nija ijilu nomawä a faö däjä, ya̦jicö mashi blälälayou cudeenö, a mömou wa̦lidiwä lä culenaja, María sicö taamaö dicoo dijä —a cuma.

¹³ Ö̦jö däjä, María a nö bayeli nacabä, Jeobaa nija Moisesi a wa̦ nacläama. —Yai Bada wa lä cuinö a da jalomalö. ¿Ö̦jö tawä? Ya wa̦ fe blacäjou lä cule, wa jalomabä.

¹⁴ Ö̦jö ma cui, abinaja Moisesi nija Jeobaa a cuma. —Ja̦o. Ö̦jö ma cui dodijidawä a nia cublou showadaomi. Bä fö̦ö enö a möcö cläshaö bädao fa cunoja, a lä cläshano wei tä nowa ja, a quilii showalanö 7 tä mö didi nö tablamalebö wei. ¿Ö̦jö tawä? Inaja showawä, wamacö yanobö sibo jamö wama a fa ji̦coloblalönö, 7 a fe nia didi cublou. Ö̦jö däjä, wama a nia shino famaö co̦o —a cuma.

¹⁵ Ö̦jö cudeenö, täbä lä bälöle tä sibo jamö, María a ji̦colobouje däjä, 7 tä mö didi tablamalemaje. Bä jocäö showadaofälöö mlai ja, María a nia faö lä co̦o wei tä nö dabou balöomaje.

¹⁶ Ö̦jö däjä, María a wawäblamaö fa co̦lojenö, bä jocäa majölayofälöma. Aselodo jamö culanö bä jocäa fa majölofälönö, Balana tä ulifi lä blocole jamö bä bälöblaquema.