Números 11 - Biblia Yanowamö

Yalo bä nacömaö lä dicoono wejei tä a̦

¹ Bä jocäö lä cuaafälöno wei jamö, bä doblou lä mlai tä bluca cuoma yalo, Isaeli ebä bufi bluca diclojoablaloma. Bä jölama. Bä a̦ lä fano wei, Jeobaanö bä a̦ ji̦lilema. Bä a̦ ji̦liaö däjä, a fa jushudalunö, cama bä lä cule jamö cowa wacö bada yäa showadamaquema. Wacö fa yämacönö, bä bälöjöwä lä siboblai, bä mö watäblamaö showadalayoma.

² Ö̦jö däjä, bä nofi nia ojode fa tablamonö, Moisesi nija bä a̦ nacläama. Jeobaa nija Moisesinö bä nö bayeli fa nacanö, wacö yanöcöblou co̦layoma.

³ Ö̦jö cudeenö, tä a̦fa ulifi jilaquemaje. Cama bä lä cule jamö, Jeobaanö wacö bada ömömaquema yalo, Dabela tä a̦fa ulifi jilaquemaje.

⁴ Bei. Isaeli ebä nijamö, shomi bä lä coyocoono wei bänö, yalo bä bufijadii nofi jushuamaje. Ö̦jö bä a̦ fa julejenö, inaja showawä Isaeli ebä ca̦i ö̦cöö cuaaö mö feduoma. Abinaja bä cuma. —¡Shädayai! ¡Yalo yama bä nö wabimi waiquiwä!

⁵ Ejido jamö yuli yama bä no mlai ja da wablei, ¡yama bä bufijaö fe balojoa lä cule! ¡Nii ai bä lä shadiblai bä ca̦i! ¡Ai bä ca̦i lä clededii! ¡Ai bä ca̦i, ai bä ca̦i, ai bä ca̦i!

⁶ Ö̦jö ma cui, ya̦cumö yamacö ujuduaö lä cule. Ai yama täbä nii möö mlai ja, ei manaa yama bä shino mödii dicowä —bä cuma.

⁷ ¿Ö̦jö tawä? Manaa bä lä cui, nii bä jamö bä jenabä wai lä ca̦bou wejei mobä lä culenaja, bä wai wajaquemi cuoma. Bä mömou fla̦lajaoma, bä mömou ca̦i auoma. Jai buu ubä coyocowä, bä wamou cuoma.

⁸ Nii bä löbömaöje däjä, dabö dabö ubä fa coyocoblajenö bä wamou lä cublou weinaja, inaja manaa bä ca̦i wamou cuo mö feduoma. Sibo jamö bä fa jublaanö showadi manaa bä jocaö cuaamaje. Madofi ebä ja, ai bä washishamamaje. Fii defi ca jamö, ai bä dicaamaje. Jaboca bä jamö, ai bä jaliamaje. Ai bä fa la̦majenö bä wamaje.

⁹ ¿Ö̦jö tawä? Didi däjä jemau jemau bänö tä ulifi jäläaö fe lä jaluno wei däjä, manaa bä ca̦i coyocoo fe jaluma.

¹⁰ Bei. Isaeli ebä yanobö je̦fa jamö, cama bä bluca fa öcönö, Moisesinö bä a̦ ji̦lilema. Jeobaa a jushuo fe balojooma. Moisesi a bufi ca̦i uomou dodijioma.

¹¹ Abinaja Moisesi a cuma, Jeobaa nija. —Uo. Cafä bäfä a̦ juabä ya lä cui, ¿wedi tabä wale li doblamaboimi? Cafä bäfä bufi doblamabou mlaobä, ¿wedinaja wale nofi yai li tabou? ¿Wedinaja ya li fa cuaanö, fei wa bä nabä bluca lä shömöbeno wei bä nija, wale nö bleaamaö dicoa cule?

¹² ¿Camiyänö ya bä bluca taama daanö, camiyä nija wa bä fa̦locamaö bufibä? Oshe bä yacabou lä culajeinaja ya bä tabolanö, yamacö nö badabö nija wa tä a̦fa ulifi lä wäqueno wei jamö ya bä bälabä, ¿ö̦jö ya daanö?

¹³ Fei ya bä naiqui bluca taö ja, ¿wedi jamö yalo ya ebä shäö cuobä? Camiyä nija bä nofi ojode tablamobä, bä a̦ malä nacläaö wei. “Yamacö iyabä, yalo bä da jöböbayo”, bä malä cudii wei.

¹⁴ ’Ya bä ca̦i dodijidawä cuobä ya nö yamili bleaaö lä cule —a cuma—. Ya bä nia lä bayeliblaö wei tä ja, ya nö wa̦lojabimi.

¹⁵ Inaja wale nia taamaö dicoo ja, ya demi cuo bufiomi waiquiwä. Bäfä bufi doblamabou ja, wale shäa da showadaalö, ya nö nia bleaaö lä buo wei ya tä dablaö mlaobä —Moisesi a cuma.

¹⁶ Abinaja Jeobaa a cuma, Moisesi nija. —Isaeli bada ebä nija, iba 70 wa bä fa yododoblamalönö, eja bä ca̦i da waloiquiyo, wa bä yai nosiemou lä dale. Iba yano jamö wa bä ca̦i fa juimanö, ö̦jö bä sho wamacö nö daobä.

¹⁷ Ö̦ja ya fa itolunö bäfä a̦ nia wayomaö. Cafä nija ya Bufi lä yanöcöblaqueno wei ya Bufi nia sheleleblamou majöo. Cama bä nija ya Bufi nia yanöcöblamou sheleleo. Ö̦jö däjä, Isaeli ebä dodijidawä cuobä wa nia bayeliblaöje, wa nö yamili bleaaö mlaobä.

¹⁸ ’Isaeli wa ebä nowa ca̦i bluca tabä —a cuma—. Iba dodijidawä bä cuobä, bä nia taamamou, fena ja bä nö daobä. Yalo bä waö wejeicätä. Bä nofi ojode tablamobä bä a̦ lä nacläano wei, camiyä Jeobaa yanö ya bä a̦ malä ji̦lileno wei. “Yalo bä ja ¿wedinö yamalecö nia dobäö? Ejido jamö yamacö yai dodijidawä cuoma”, bä cuma. ¿Ö̦jö tawä? ’Ja̦o —a cuma—. Yalo bä ja ya bä nia dobäö, ö̦jö lä. Bä nia iyaö.

¹⁹ Bä iyaö däjä, moli tä mö nia didi tablamaö bädaomije. Bolacabö ca̦i mlai. 5 ca̦i mlai, 10 mlai, 20 mlai.

²⁰ Bä iyaö showao däjä, ai a belibo nia famaö co̦oje. Bä jaba lä iyano wei tä jalu cublou co̦o däjä, bä nia iyaö waiquidou. Ya̦cumö, bei bä fiyocacö jamö bä nia yalo fablou. Yalo bä ja bä camishi nia yoluu. Camiyä Jeobaa yanö ya bä ca̦i lä cule wale waii dicooje yalo, inaja ya bä nia taamaö. Camiyä ya lä cule jamö bä a̦ nacli malä fano wei, bä nofi ojode tablamobä. “¿Wedi tabä Ejido bäma tä ulifi tabi li feia dicoquema?”, bä malä cuno wei —Jeobaa a cuma.

²¹ Ö̦jö ma cui, abinaja Moisesi a cuma. —Fei ya bä ca̦i lä cule, yamacö bluca fe balojowä. Wa̦lo yamacö, 600.000 tä jamö yamacö ma jayuaö wei ma cui, yalo wa bä nia lä jöböaö wei bä ja, yamacö iyaö showao däjä, ¿ai yama a nia belibo famaö co̦o daanö?

²² Oweja bä ma cui, baca bä ma cui, ¿wedi jamö yama bä yalo bluca fa däanö yama bä nia omalei? Bä iyabä, modu u jamö bä yuli bluca lä juu wei bä ma co̦cablamolayou wei ma cui bä nö obimi —Moisesi a cuma.

²³ Abinaja Jeobaa a cuma, Moisesi nija. —Uo. Camiyä Jeobaa ya lä cui, ¿ya nia dobloimi majöa daanö? Cafä nija ya lä cufenaja wa tä cublou möbä, ö̦jö lä —a cuma.

Bada bänö Jeobaa a wa̦no moli lä wäyäno wejei tä a̦

²⁴ Ö̦jö däjä, Moisesi a faa fa co̦lunö, bluca täbä nija Jeobaa a wa̦no wäyäö showadaoma. Isaeli bada ebä nija, 70 bä fa yododoblamalönö, Jeobaa e yano jamö bä ublaa fe fa̦yoblamalema.

²⁵ Ö̦jö däjä, ölajashi a jamö Jeobaa a fa itolunö, Moisesi a wa̦ wayomama. Cama nija a Bufi lä yanöcöblaqueno wei a Bufi shedequeblamoa fa majölönö, bada 70 bä nija a Bufi yanöcöa shedequeomobodayoma. Bada bä nija a Bufi fa yanöcöomobodunö, a wa̦no wäyäö showadaomaje. Ö̦jö ma cui, moli bä inaja cuaaö fa showadaonö, bä cuaaö co̦daanomi.

²⁶ Bei. Bada bolacabö cäcöbö cuo lä feyano wei cäcöbö nija, Jeobaa a Bufi ca̦i fa yanöcöicunö, täbä lä bälöblaono wei jamö a wa̦no ca̦i wäyäböö mö feduo feyama. Ai a lä cui, Edado a wa̦fa cuoma. Ai a mö feduwä lä cui, Medado a wa̦fa cuo mö feduoma. Cäcöbö a̦fa ma onibono wejei ma cui, Jeobaa e yano jamö cäcöbö junomi.

²⁷ Ö̦jö däjä, fiya a fa lälälönö, Moisesi a yömöladayoma. —Bämacö lä bälöblale jamö, Edado, Medado sho Jeobaa a wa̦no wäyäböö feyaa lä cubijeli —a cuma.

²⁸ Ö̦jö däjä, Nuni bä ijilubö Josué e lä cui, Moisesi a showadi lä bayeliblano wei, a wa̦ faö nomöjöoma. Moisesinö bä lä yaileno wei bä nijamö a Josué coyocooma. Abinaja a cuma. —Bada tä, Moisesi. Quiji cäcöbö a̦ da wasö —a cuma.

²⁹ Ö̦jö ma cui, abinaja Moisesi e cuma. —“Cafänö yami wa wa̦no shino wäyäbä”, ¿bei wale nofi tabou dicoa cule? A bufi jalujo dijä. Jeobaa bluca ebä nija a Bufi yanöcöblou fa cunoja, tä nö doblaobö wei. Bluca bänö a wa̦no wäyäö fa cunoje ja, tä nö ca̦i doblaobö wei —a cuma.

³⁰ Ö̦jö däjä, bä lä bälöblale jamö Moisesinö bada bä ca̦i co̦a co̦layoma.

Bocolamö bä bluca lä yaläimano wei tä a̦

³¹ Jeobaanö wadoli a bada fa shömölönö, modu u fedu jamö culanö, bocolamö bä yaläimama. Bä bluca yajadodoaö yäö fa shuliloimanö, bä yäö jö̦lölou cuaaimama. Isaeli ebä lä bälöblamono wei jamö ma cui, tä ulifi fe lä fayoono wei jamö ma cui, ebä queolaliyoma. ¿Ö̦jö tawä? Moli tä jalu ja, bä juu fe nö lä wädöquebö wei jamö, bä blajawä bläläö fe fayoomobodayoma.

³² Isaeli ebä lä cuinö bä nabä juu fa showadaojenö, bä co̦ablamaje. Bä co̦aö fe fa weyalöjenö, bä yanöcöblou mlai ja, bä co̦abladii fe jalumaje. Ö̦jö tä fena ja ma cui, bä co̦ablaö fe weyaa co̦layomaje. Ebä lä bolacamiono wei bä ma cui, 10 ebä ca̦i bada yododoblamoma. Ö̦jö däjä, bä shi̦licabeje, bä lä bälöblamono wei jamö bä maquecaö jödödomaje.

³³ Ö̦jö ma cui, yalo bä nia fa wajenö, bä jaba wadicaöje däjä, cama bä nija Jeobaa a lä jushuono wei tä bädaliyoma. Tä nö lä quiliaö wei tä wayunö, bä nö blemalalema.

³⁴ Ö̦jö cudeenö, tä a̦fa ulifi jilaquemaje. Ö̦jamö yalo bä ja bä bufi waiyou nofi lä jushuano wei bä nomawä didiquemaje yalo, Quiblodadaba tä a̦fa ulifi jilaquemaje.

³⁵ Quiblodadaba jamö culanö bä jocäö fa co̦ofälönö, Aselodo jamö bä waloquema. Ö̦jamö bä yanöcöblaquema.