Números 10 - Biblia Yanowamö

Sinai cäcö däjämö culanö Isaeli ebä lä jocälayono wei tä a̦

¹¹ Ejido jamö culanö Isaeli ebä fa julufälönö, ö̦jö lasha a waicoma. Ai a lasha faö co̦o däjä, belibo 2 a lä cublole däjä, 20 tä mö jalu cublou däjä, Jeobaa a wa̦no oni didiobä a yano fe lä yojoblaliyono wei a ölajashi ösöa co̦malema.

¹² A ösöa fa co̦malönö, Sinai tä ulifi lä blocole jamö culanö, Isaeli ebä jaba wayumö jocälayofäloma. Balana tä ulifi bloque jamö, ölajashi a yanöcöa nomöjöquema.

¹³ Bä jaba lä jocäfälöno wei däjä, Jeobaanö Moisesi a nowa lä tano weinaja bä cuaaö showaoma.

¹⁴ Judawä ebä juu balöama. Cama a wa̦fa oni yalejebou ca̦i balömabolajenö, cama bä fa yaiicunö bä juu nodiama. Aminadaba bä ijilubö Naasono a badanö, ö̦jö bä ca̦i cuoma.

¹⁵ Isacala ebä bluca mö feduwä lä cui, Suala bä ijilubö Nataniel a badanö, ö̦jö bä ca̦i li cuo mö feduoma.

¹⁶ Sabulono ebä mö feduwä showadao lä cui, Elono bä ijilubö Eliaba a badanö, ö̦jö bä ca̦i li cuo mö feduoma.

¹⁷ Jeobaa e yano ucaö lä co̦ofälöö wejei däjä, Jesono ebä lä cuinö, Melali ebä ca̦i lä cuinö, e shino ca̦i yano juu yauamaje. E yano bälabeje ö̦jö bä li cuoma.

¹⁸ Ö̦jö bä no jamö, Lubeni a wa̦fa oni yalejebou ca̦i balömabolajenö, cama ebä fa yaiicunö bä juu nodiama. Sedulu bä ijilubö Elisulo a badanö, ö̦jö bä ca̦i cuoma.

¹⁹ Simeoni ebä bluca mö feduwä lä cui, Sulisadai bä ijilubö Selumiele a badanö, ö̦jö bä ca̦i li cuo mö feduoma.

²⁰ Cadö ebä bluca mö feduwä showao lä cui, Jedolo bä ijilubö Eliasafa a badanö, ö̦jö bä ca̦i li cuo mö feduoma.

²¹ Ö̦jö däjä, Coado ebä jocäö juoma. Cama Jeobaa etäbä lä yaiono wei bä ca̦i madofi jumaje. E yano i̦taa waiquiqueno wejei ja, etäbä ca̦i waloo juoyolumaje.

²² Ö̦jö bä no jamö, Eflaini a wa̦fa oni yalejebou ca̦i balömabolajenö, cama ebä fa yaiicunö bä juu nodiama. Amiudo bä ijilubö Elisama a badanö, ö̦jö bä ca̦i cuoma.

²³ Manasesi ebä bluca mö feduwä lä cui, Bedasulo bä ijilubö Camalieli e badanö, ö̦jö bä ca̦i li cuo mö feduoma.

²⁴ Bejamino ebä bluca mö feduwä showao lä cui, Jedeoni bä ijilubö Abidano a badanö, ö̦jö bä ca̦i li cuo mö feduoma.

²⁵ Ö̦jö bä no jamö, Dani a wa̦fa oni yalejebou ca̦i balömabolajenö, cama ebä fa yaiicunö bä juu nodiama. Colo ja bä nofi bluca bäyäbou coloomaje. Amisadai bä ijilubö Ayeselo a badanö, ö̦jö bä ca̦i cuoma.

²⁶ Aselo ebä bluca mö feduwä lä cui, Oclano bä ijilubö Bajelo a badanö ö̦jö bä ca̦i li cuo mö feduoma.

²⁷ Nefitali ebä bluca mö feduwä lä cui, Enano bä ijilubö Aila a badanö, ö̦jö bä ca̦i li cuo mö feduoma.

²⁸ ¿Ö̦jö tawä? Isaeli ebä jocäö lä cuaano wei däjä, inaja showawä bä showadi juu balöadalou cuaama.

Moisesinö bä jeli e lä nacano wei tä a̦

²⁹ Ö̦jö däjä, bä jeli Obaba e nija Moisesi a wa̦ fama, Jedolo bä ijilubö a lä cui nija. Ö̦jö Moisesi bä shö̦ö e lä cui, Madianateli a cuoma. Abinaja bä jeli e nowa tama. —Yamacö jocäö a lä cule. Jeobaanö tä a̦fa ulifi lä wäyäno wei jamö yamacö nia juu. ¿Ö̦jö tawä? “Cafä wamacö nija ya tä ulifi nia jöböaö”, a cuma. Camiyä yamacö nija a da yauiquiyo, dodijidawä bäfä tamabou weicätä. Jeobaanö Isaeli yama ecö dodijidawä tamabobä tä a̦fa malä wäyäno wei —e nowa tama.

³⁰ Ö̦jö ma cui, abinaja Obaba e cuma. —Ma. Ya juu mlaicätä. Iba tä ulifi jamö ya li co̦a co̦layou, camiyä yamacö nijamö.

³¹ Ö̦jö däjä, abinaja Moisesi e cuu fe blacäjoma. —Yamalecö daaö dicoo dijä. ¿Ö̦jö tawä? Yamacö bälödou cuaafälöbä, cafänö wa tä ulifi malä dale, yamalecö lulubofälöbä.

³² Camiyä yamacö nijamö wa yauaö ja, Jeobaanö yamalecö bayeliblaö lä cuaaö weinaja, cafä bäfä nia ca̦i bayeliblaö cuaaö mö feduo showao —a cuma.

³³ Ö̦jö däjä, Jeobaa ecö jamö culanö, bä jocäa fa showadaalunö, bä juu showao däjä, 3 tä mö jalu cublaliyoma. Jeobaa a wa̦no oni didiobä defi ca ca̦i balölayomaje, bä nia lä yanöcöo wei tä dayäö balöodayobeje.

³⁴ Bä jocädou lä cuaafälöno wei däjä, Jeobaa cama ölajashi showadi e juu fa feyacaafälönö, bä ca̦i li juma.

³⁵ Jeobaa a wa̦no oni didiobä defi ca ca̦i jocädou lä cuaafälöno wejei däjä, abinaja Moisesi a showadi cuma. —¡Bei! ¡Jeobaa! ¡Co̦jamö! Cafä nija bä nö lä nabämou wei wa bä sheleleblamabä. Wa nofi lä wa̦libou wejei, wa bä yashublaö baläodayobä —a showadi cuma.

³⁶ Defi ca ca̦i yanöcöo co̦oje däjä, abinaja a showadi cuu nomöjöoma. —¡Bei! ¡Jeobaa! ¡A mö yabaö da co̦ima! Isaeli yama ecö lä tetei yama ecö ca̦i bluca cuo co̦obä —a showadi cuu nomöjöoma.