Nehemías 2 - Biblia Yanowamö

Jelusale jamö bada tänö Nemia a lä shimöleno wei tä a̦

¹ Bada tä Adajeje a läo showalanö, lasha 20 a fa famalönö, nisana a belibo cuo däjä, bada tänö nashiwä toubä nia fa coanö toubä babou ajedeoma. Ya toubä fa dälänö, bada a lija ya e toubä jibäquema. ¿Ö̦jö tawä? Bada a lä cule jamö, ya bufi ca̦i jaba jalujuwä cuonomi.

² Camiyä lija abenaja bada a cuma. —¿Wedi tä nowa ja wa mömou bufi li jalujuwä? Wa nofi jalili lä mlai. Shomi tänö mlai, wa bufi nö nami yai bleaaö waiquia —a cuma. Ö̦jö däjä, ya bufi quilijou dodijioma.

³ Bada a lija abenaja ya cuma. —¡Dodijidawä cafä wa bada cudiobä! Bejedi lä wa wa̦. Ya bufi nö bleaaö lä. Camiyä yamalecö nö badabö lä didiblaano wejei jamö, a shabono wa̦lioblaliyoma malä cui. Bei yocabä fe lä lao wei täbä bluca ca̦i bada ö̦shölaliyoma —ya cuma.

⁴ Ö̦jö däjä, abenaja bada a cuu nomöjöoma. —Tä a̦ wäa da shaliliba, bä bayeliblabä —a cuma. Inaja a cuma cudeenö, Yai Bada tä fedu jamö lä culadi tä lija, lobe ya nö bayeli nacao showadaoma.

⁵ Ö̦jö däjä, bada a lija ya wa̦ fama. —Ja̦o. Inaja wa bufi cuu ja, Judawä jamö wale da shimölö, ö̦jö lä, camiyä yamalecö nö badabö lä didiano wejei a shabono jamö. ¿Ö̦jö tawä? Cafä wa nosie fuamobä ya lä cui, wale nofi ojodabobä ya waiquiwä ja, ö̦jamö wale shimabä, ya bä shabonobö dodijidablaö co̦obä —ya e cuma.

⁶ Bada bä suwäbö e diclämabou ajedelanö, abenaja camiyä lija bada a cuu nomöjöoma. —¿Wedinaja belibo wa bä nia lublamaö cuo, ö̦jö lä? ¿Wedi däjä eja bei wa nia waloo co̦o? —a cuma. ¿Ö̦jö tawä? Inaja tä fa cuonö, bada tänö dodijidawä wale shimölema. Ya nia waloo lä co̦o wei ya tä a̦fa ca̦i jayumaö cadidio showadaoma.

⁷ Bada lija abenaja ya cuu nomöjöoma. —“Inaja waiquiwä”, bada wa bufi cuu ja, bucadu jamö afä ai wa bä lämabou mö lä fedule bä bada lija, ya tä a̦ oni jibäajalobä, sibä da jibäba. Judawä jamö ya fuu däjä, wale jayuamabeje.

⁸ Asafa lija ya si oni jibäaö mö feduobä si ca̦i, fii fibä nowamabä wa lä lämabole a lä cui lija. Camiyä lija fibä fa jibäanö, ya fibä baquecabä. Ö̦jö tefibä baquecamanö, Jeobaa etä yafi jamö nacö fe ala lä fa̦yoono wei jamö, ya yocabä dodijidablaö co̦obä. Jelusale jamö ya bä alabö na ca̦i tablaö co̦obä. Camiyä ya nia lä cuo wei, ya yafi ca̦i taö showadaobä —bada lija ya cuma. ¿Ö̦jö tawä? Yai Bada ya lä bufiblalenö, dodijidawä wale bayelibou showaoma yalo, bada anö wale dobälema, ya nacou ja ya e lä cuno weinaja showawä.

⁹ Bada anö bä bucadu jamö lämabou mö lä feduono wei bä lija ya fa waloicunö, bada ya etä a̦ oni jibäbejeloma. ¿Ö̦jö tawä? Wale ca̦i fubeje, bada anö cama ai ebä shimölema. Cama sodado ebä ca̦i lä cuono wejei, ai bä cuoma. Cabayo bä jamö bä befi ca̦i lä läläaö wei ebä ca̦i.

¹⁰ Ö̦jö ma cui, Olonoteli a wa̦fa Sabalada lä cuinö, ö̦jö tä a̦ fa ji̦lilänö a jushudaliyoma. Amonoteli a wa̦fa bada Dobia ma cui, inaja showawä. Isaeli ebä bayeliblamaö fuu nofi wa̦liboböma.

Bä alabö na nia taö lä co̦ono wejei tä a̦

¹¹ Inaja tä fa cuonö, Jelusale jamö ya fa waloicunö, 3 ya tä mö didi tablamalema.

¹² Ö̦jö däjä, iba bolacadabö ya bä ca̦i jocäblou fe jalulayoma. Cabayo a jamö ya diclälanö ya fuma. Ai ya bä ca̦i yalo funomi. ¿Ö̦jö tawä? Jelusale jamö ya shabono dodijidablaö co̦obä, Yai Bada ya lä bufiblalenö wale bufi lä taamano wei, moli a ma cui lija ya tä a̦ wäanomi showawä.

¹³ Tä lä yalöi jamö yoca lä jolele yo ja, ya didi fa falönö, Dacono uca yo shadia mö lä cule jamö ya fuma, shami täbä lä joyaö wejei yoca lä jolele yo jamö ca̦i. Ya fuu lä cuaafälöno wei, Jelusale jamö bä alabö na lä wa̦liolaliyono wei ya täbä möö dodijodii cuaafälöma. Yocabä fe laobä täbä lä ö̦shölaliyono täbä ca̦i.

¹⁴ Ö̦jö däjä, u fe lä jojole jamö yoca lä jolele yo ja, ya fuu cuaaö fa showaimadunö, bada e uca lä cule jamö ya fuu nomöjöoma ma cui, ya lä dicläo wei a cabayo jayuobä etä cuonomi.

¹⁵ Ö̦jö däjä, tä lä yalöi jamö ya didi ola jamö fuu fa showaofälönö, ö̦jamö ya bä alabö na ca̦i möö dodijou cuaafälöma. Ö̦jö däjä, ya mö yabaö fa co̦imanö, tä lä yalöi jamö yoca lä jolele yo ja, ya faa fa co̦lojolonö, ya yafia co̦layoma.

¹⁶ Bada bänö bä lä lämabono wejei bä lä cuinö wale danomije. Ya didi lä funo wei tä ma cui, ya lä cuaano wei tä ma cui, tä danomije. ¿Ö̦jö tawä? Judio bä ma cui, nofi bäyäalewä bä ma cui, bä a̦ showadi lä ji̦liadino wejei bä ma cui, ö̦jö ya bä yömölanomi showawä. Bä bada lä yädäono wei bä ma cui, bä nia yai lä ojodamono wei bä ma cui, ya bä yömölaö showaa mlai ja, bä cudio showaoma.

¹⁷ Ö̦jö däjä, ö̦jö bä lija abenaja ya cuma. —Bämacö nö lä bleaale wama tä daö. Jelusale tä shabono lä wa̦liolaliyono wei bä yafibö blaa lä cule. Bä yocabä fe laobä täbä lä ö̦shölaliyono wei täbä ca̦i wa̦lidiwä jilawä showawä. ¿Ö̦jö tawä? Bei. Jelusale tä shabono ja, ala bäma nacö taö da co̦o, bämacö doblou lä mlai tä ja, bämacö quilii mladobä —ya cuma.

¹⁸ Yai Bada ya lä bufiblaö wei a lä cuinö wale dodijidawä waloa fe lä yadimaqueno wei tä ja, ya bä yömölaö showadaoma. Besiateli bada anö wale nowa lä tano wei tä ca̦i ja. Ö̦jö däjä, abenaja bä cuma. —Ja̦o. Bei. Bämacö queo da showadao, ala bäma nacö i̦tamaö co̦obä —bä fa cudalunö, dodijidawä bä ojodamobä bä bufi lofotoamayoma.