Nehemías 1 - Biblia Yanowamö

Nemianö Judawä ebä nö bayeli lä nacano wei tä a̦

¹ Camiyä ya lä cui, Acalia bä ijilubö Nemia ya wa̦. Susateli bä shabonobö jamö ya cuoma, Besiateli a bälöo lä dodijii, a bada lä läono wei jamö. ¿Ö̦jö tawä? Bada a läo showai ja, lasha 20 a fa famalönö, abenaja tä cublaliyoma. Quileu a belibo ja,

² Judawä jamö culanö ai bä fama waloquema. Ö̦jö bä lija, Judawä jamö bä shee lä jäblaliyono wei ya bä wa̦lima, shomi täbä ulufibö jamö bä bälaqueno lä mlajei bä lä cui. Jelusale ya tä shabono ca̦i wa̦lima.

³ Ya bä fa wa̦linö, abenaja wale nowa tamaje. —Judawä ebä ulufibö jamö bä shee lä jäblaliyono wei, bä nö bayeliblobimi fe balojowä, shomi täbä ulufibö jamö bä bälaqueno lä mlajei bä lä cui. Bä dobloimi waiquiwä ja, bä quilii. Jelusale jamö bä alabö na blaa bädaa. Bä lä joleblaaö wei jamö, bei yocabä fe lä lao wei täbä bluca bada ö̦shölaliyoma —wale nowa tamaje.

⁴ Ya bä a̦ ji̦liaö däjä ya wa̦ ca̦i loa showadaquema. Ya bä a̦ nofi ojode taö showao däjä ya wa̦ nö dedeama. Iyaö mlai ja, Yai Bada tä fedu jamö lä culadi tä lija ya wa̦ fadima.

⁵ Abenaja ya e cuma. —Jeobaa wa tä. Yai Bada wa tä fedu jamö lä culadi. Yai Bada wa tä nö Bada lä quiliaö wei wa. Cafä wa wa̦ nö wäo ja, wa bä nowa taö ja, showadi wa wa̦ cadidou. Wa lä nofimaö wejei bä lä cui, showadi wa bä nofimaö shi wa̦lii, wa tä tamaö lä bufii wei tä a̦ nofi lä jaducäbou wejei bä lä cui.

⁶ Camiyä lija a yömöca da daicu —ya e cuma—. A mamo da showaicu, cafä lija Isaeli ya ebä nö bayeli lä nacale wale a̦ ji̦liaö walalaobä. Cafä wa nosie fuamobä ya. Jalu däjä ma cui, didi däjä ma cui, cafä wa nosie fuamobä, Isaeli ebä lä cui, ö̦jö ya bä nö bayeli nacadii. ’Cafä lija Isaeli yama ecö doblou lä mlai ya wa̦ nö ca̦i wäo —ya e cuma—. Bejedi lä, camiyä ya ma cui, fayä yama ecö bluca ma cui, yamacö dobloimi.

⁷ Cafä lija yamacö nofi lä jushuaö wei yamacö. Cafä wa nosie fuamobä a Moisesi lä cui lija wa tä tamaö lä bufino wei yama tä taimi. Yama tä a̦ nofi showadi jaducäbobä tä a̦ ma cui, yamacö showadi cuaaö nodiablalobä tä a̦ ma cui, yamacö cuaaimi.

⁸ ’Cafä wa nosie fuamobä a Moisesi lä cui, ö̦jö wa nowa lä tano wei tä a̦ nofi da jaducälä —ya e cuma—. Abenaja Jeobaa wa lä cuno wei. Cafä lija yamacö dobloimi ja, bä bluca lä bälöblai bä lijamö yamalecö nia jo̦wa sheleleblamama.

⁹ Ö̦jö ma cui, cafä lija yamacö mö yabajadou co̦o ja, wa tä tamaö lä bufii wei yama tä a̦ nofi jaducäbou ja, ö̦jö tä a̦ ja yamacö cadidou majöo ja, yamalecö nia jo̦wa co̦ama. ¿Ö̦jö tawä? Afä wa bä ma shelelemabou ma blajaaö wei ma cui wa bä nia co̦ablaö cuaama. Afä wa tä ulufi lä yaibole jamö, wa bä nia jo̦wa bälaö co̦oma, ö̦jamö wa bä ca̦i fa cuonö, wa wa̦fa shi̦lo jayumadibeje. Inaja wa cuma.

¹⁰ ’Cafä wa nosie fuamobä bä waiquiwä —ya e cuma—. Afä bä li. Cafä wa lofotenö wa bä co̦lema, wa nö lä wa̦lojaö wei wanö.

¹¹ Jeobaa wa tä. Cafä lija camiyä ya nö bayeli nacao. Afä ai bä lä cui, wa nö quili taö bufi lä doblao wejei, ö̦jö bä nö ca̦i bayeli nacao mö fedua lä cule. Cafä wa nosie fuamobä yamacö lä cui lija a yömöca da daicu. ¿Ö̦jö tawä? Cafä bä nosie fuabä ya lä cui, fei däjä, Besiateli bada ya wa̦ wayomaö däjä, tä da dodijidablamalä, bada anö wale nofi ojodabobä —ya e cuma, Jeobaa lija. ¿Ö̦jö tawä? Bada a lä cuinö toubä coabä, showadi ya e toubä tama.