Levítico 6 - Biblia Yanowamö

Täbä mölamaöje ja bä nia lä dodobou wejei tä a̦

¹ Moisesi nija abinaja Jeobaa a cuma.

^2-3 —Abinaja ai bä cuaaö si ijejeo fa dicoonö, Jeobaa yanö ya tä nowa tabou. Ai anö, cama bä showawä ma cui, a mölamaö. Etä madofi nowamabä a ma cui, e däaö läo. Etä majöaö ma cui etä co̦amaimi. A tomömou. A fa waitelionö etä däaö fe yadio. Ai etä madofi nofi lä mojodulayono wei etä ma tabole ma cui, a wa̦ mojodumou. A wa̦ nö wäamaö ma cujei a jolemou.

⁴ ’Inaja a cuaaö fa dicoonö, etä nowa cuo däjä, täbä nia co̦amaö —a cuma—. Tä lä tomöleno wei tä ma cui, etä nia co̦amaö. A fa waitelionö, tä däa fe lä yadileno wei tä ma cui, tä nia ca̦i co̦amaö. Etä nowamabä etä ma cuono wei ma cui, a däa lä läleno wei etä nia ca̦i co̦amaö. Ai etä madofi nofi mojoduu bädao ja, etä dablaö ma cui a wa̦ faimi ja, etä nia ca̦i co̦amaö.

⁵ Ai etä madofi tabou lä bädao wei etä ma cui, a wa̦ nö wäamabeje jamö a jolemoma ja, etä nia jödödöwä co̦amaö. ’¿Ö̦jö tawä? —a cuma—. Wa̦lidiwä etä nowa co̦amabä, Jeobaa ya nija yalo a ca̦i juimaö däjä, ö̦jö däjä showawä, cama etäbä madofi lä cuono wei nija, täbä nia bluca co̦amaö. Abinaja ca̦i. Täbä lä co̦amaö wei däjä, etä nowa fe nia doledamaö showadao. Ö̦jö täbä nowa lä cui ja, jai 5 täbä fe usucuwä shedequeblaö däjä, ai moli täbä nia yädäblamaö co̦o.

⁶ ’Wa̦lidiwä etä nowa co̦amabä, Jeobaa ya nija a yalo nia lä dodobou wei, nofi bäyäalewä nija ö̦jö a nia ca̦i yalo juu —a cuma—. Oweja wa̦lo a nia ca̦i juu, a lä dodijidai, etä wai jalili yädäa lä mlai. Ö̦jö a yalo lä cui, cafänö wa nowa wa̦fa nia jayublaö. “Tä nowa co̦amabä, ö̦jö waiquiwä”, wa nofi tabobä.

⁷ Ö̦jö däjä, a doblono lä mlai ya etä nowa mladamabä, camiyä Jeobaa ya lä cule jamö, inaja nofi bäyäalewä a nia cuaaö. Ö̦jö däjä, a doblono lä mlai ya etä nowa nia mladamaö. Bä nö bleaamaö lä bädao wei ai tä ma cui ja, ö̦jö tänö etä nowa ma cule ma cui, ya etä nowa nia mladamaö.