Levítico 5 - Biblia Yanowamö

Wa̦lidiwä ai tä nowa mladobä bä nia lä dodoboyoluno wejei tä a̦

¹ Moisesi a yömölaö showalanö abinaja a Jeobaa cuu co̦oma. —Bä dobloimi ja bä lä jömaö wejei bä bada lä cuinö, ai e a̦ nö wäobä a ma nacaöje däjä ma cui, e a̦ nö wäo moji dicoo ja, tä wa̦lidiwä. Tä lä möno wei tä ma cui, tä a̦ lä ji̦lileno wei tä a̦ ma cui, tä a̦ wäaimi ja, etä nowa nia co̦amaö.

² ’Abinaja ca̦i —a cuma—. Ai anö shami tä jubaö ja̦too ja, tä nia shami yädäo. Cama a nia shami cuo nomöjöo. ¿Ö̦jö tawä? Yalo a nomawä lä blale a nomawä jubaö ja̦too ja, ulifi jamö a yalo lä juu wei a ma cui, a yalo lä tabou wejei a ma cui, a lä joleaö wei a ma cui, ö̦jö a jubaö fa ja̦toonö, cama a shami cuo nomöjöo ja, etä nowa nia cuo.

³ Abinaja ca̦i. Yanowamö täbä nijamö täbä shami shami faö lä bädale tä shami jubaö ja̦too ja etä nia ca̦i shami yädäo. Etä lä yädäle etä wawäblou däjä, etä nowa nia cuo.

⁴ ’Abinaja ca̦i —a cuma—. Bufi jaducua mlalanö bä caficö cuu lä bädao weinaja, ai a wa̦ nö wäo noshi jalilao buo ja, tä wa̦lidiwä. Abinaja a lä cuu wei, “Ya jolemoimi. Jeobaa a malä cule”, a cuu lä bädao wei etä nowa nia ca̦i cuo. Wa̦lidiwä tä tamobä tä ma cui ja, dodijidawä tä tamobä tä ma cui ja, a wa̦ noshi jalilao buo ja, a bufi jaducublou däjä etä nowa nia cublou.

⁵ ’Inaja ai a cuaaö dicoo ja, etä nowa cua ja, wawädowä a wa̦ nö nia wäo —a cuma—.

⁶ Tä doblono lä mlai etä nowa mladobä, camiyä Jeobaa ya nija, yalo e nia ca̦i juimaö. Oweja ocalo a ma cui, shibo a ma cui, suwä a ca̦i fa juimanö, wa̦lidiwä etä nowa co̦amabä e ca̦i yalo fa waloicunö, a doblono lä mlai ya etä nowa mladamabä, inaja nofi bäyäalewä a nia cuaaö.

⁷ Ö̦jö ma cui, oweja ocalo a luluabä ebä blada cuami ja, joledo cäcöbö ma cui, wacocoa calaba cäcöbö ma cui, ö̦jö bä ca̦i juu dao —a cuma—. Wa̦lidiwä etä nowa co̦amabä, Jeobaa ya nija ö̦jö cäcöbö ca̦i nia shino juimaö. Ai a yalo lä cui, wa̦lidiwä ya etä nowa mladamabä a nia lä dodobou wei a. Ai a yalo mö feduwä lä cui, camiyä nija a ö̦shö nia lä dodobou wei a.

⁸ Nofi bäyäalewä nija cäcöbö ca̦i nia juu. Ö̦jönö ai a yalo däa fa balölönö, wa̦lidiwä tä nowa mladamabä, olafi nia a̦ijiblaö. Olafi fa a̦ijiblalönö, fe nia leiblamaö.

⁹ ’Ö̦jö däjä, yalo bä lä dodoblamou wei bä maqueblamobä täcö sibo jamö, yalo i̦yäbö nia yomösaö —a cuma—. Ö̦jö tä cotä ja, yalo a jö̦cöbolanö i̦yäbö nia bluca famaö. Wa̦lidiwä tä mladobä cätä.

¹⁰ Ai a yalo mashi däa fa nomöjölönö, a nia ö̦shö dodobou, yalo bä ö̦shö dodobou nodiablalobeje tä nabä lä shömano weinaja showawä. A doblono lä mlai ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö.

¹¹ ’Ö̦jö ma cui, joledo cäcöbö luluabä etä cuami ja, wacocoa calaba cäcöbö luluabä etä cuami ja, abinaja a nia cuaaö —a cuma—. A doblono lä mlai etä nowa wa̦lidiwä mladobä, lo̦shi mobä fa washishanö, ji̦bä si nia cobejeblaö. Jaboca blowäjäjäwä a ja, si cobejewä ji̦bä fe fa lajoblamalönö, ji̦bä nia ca̦i juimaö. Dabö dabö ubänö ji̦bä fe nia liyäyaimi. Täbä wa̦queshi nö cle̦deli lä u̦cucamou wei täbä shuu möcashi nia ca̦i jushishaimi. Wa̦lidiwä tä nowa mladobä ji̦bä malä cui —Jeobaa a cuma.

¹² ’Nofi bäyäalewä nija ji̦bä ca̦i fa junö, ö̦jönö moli ji̦bä nia maoaö —a cuma—. Wale dobäö bufi lä doblao wei ya tä nofi tabobä, ö̦jö moli ji̦bä lä maoamou wei, yalo bä lä dodoblamou wei bä maqueblamobä täcö jamö, ji̦bä nia ö̦shömaö yädämou. ¿Ö̦jö tawä? Wa̦lidiwä tä nowa mladobä ji̦bä.

¹³ Ö̦jö däjä, täbä wa̦lidiblou lä ja̦too wei ai tä ma cui ja, ö̦jö tänö etä nowa ma cule ma cui, ya tä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö. Ai ji̦bä mashi lä jäblou wei, nofi bäyäalewänö ji̦bä wabä ji̦bä. Lo̦shi mobä ja ya dobämou däjä bä lä cuaaö weinaja showawä —a Jeobaa cuma.

Etä nowa wa̦lidiwä nia lä co̦amaö wejei tä a̦

¹⁴ Ö̦jö däjä, Moisesi nija abinaja Jeobaa a cuu nomöjöoma.

¹⁵ —Camiyä Jeobaa ya nija etä nowa co̦amabeje tä bluca cublawä. Etä nowa cua ja, täbä ca̦i jubeje, iba täbä nia yaio. Ai anö etä ca̦i juimi dicoo ja, tä wa̦lidiwä. “Ya jolemou daanö”, cama a bufi cuu ma mlai ma cui ya etä nowa tabou. ¿Ö̦jö tawä? Wa̦lidiwä etä nowa co̦amabä, Jeobaa ya nija oweja wa̦lo a nia ca̦i juimaö, a lä dodijidai, etä wai jalili yädäa lä mlai. Ö̦jö a nowa yalo lä cui, cafänö wa nowa nia jayublaö, iba yano jamö showadi täbä nowa wawämaö lä culajeinaja showawä. ’¿Ö̦jö tawä? —a cuma—. Wa̦lidiwä etä nowa co̦amabä a.

¹⁶ Jeobaa ya lä cui, wale dobäbä etä ma cuono wei ma cui, a ca̦i junomi cudeenö etä nowa fe nia doledou majöo. Ö̦jö täbä nowa lä cui ja, jai 5 täbä fe usucuwä shedequeabodayou däjä, ai moli täbä nia yädäblamaö co̦o. ¿Ö̦jö tawä? Nofi bäyäalewä nija ö̦jö bluca tä nia comi jöböaö. Ya etä nowa mladamabä, nofi bäyäalewänö a nia oweja shäö, wa̦lidiwä etä nowa co̦amabä a oweja lä cui. Ö̦jö däjä, ya etä nowa nia mladamaö.

¹⁷ ’Jeobaa yanö ya tä bluca taö lä wasöö wei tä ja, tä nofi wa̦lidiwä mojodubolanö ai a yacläö däjä, tä lä wasömamou wei moli tä taö fe yadio ja, etä nowa nia co̦amaö —a cuma—.

¹⁸ Nofi bäyäalewä a nija, oweja wa̦lo a nia ca̦i juu, a lä dodijidai, etä wai jalili yädäa lä mlai. Ö̦jö a nowa yalo lä cui, cafänö wa tä nowa wa̦fa nia jayublaö. “Tä nowa co̦amabä, ö̦jö waiquiwä,” wa nofi tabobä. A yacläö lä ja̦toono wei ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö.

¹⁹ ¿Ö̦jö tawä? Wa̦lidiwä tä nowa co̦amabä a. Jeobaa yanö ya tä nowa malä tabole.